ཧོ་ལི་ཧྥེང་གིས་ཨ་རིའི་ཆའོ་ཧྲུའེ་ཐེབས་རྩའི་སྲོལ་གཏོད་པ་ཏཱ་ལི་ཨོའུ་ལ་ཐུག་འཕྲད་གནང་།

ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན་ནམ། ཀྲུང་དབྱང་ནོར་སྲིད་གཞུང་ལས་ཁང་གི་ཀྲུའུ་རེན་ཧོ་ལི་ཧྥེང་གིས་ཟླ3པའི་ཚེས31ཉིན་པེ་ཅིན་དུ་ཨ་རིའི་ཆའོ་ཧྲུའེ་ཐེབས་རྩའི་སྲོལ་གཏོད་པ་ཏཱ་ལི་ཨོའུ་དང་ཐུག་འཕྲད་གནང་ནས། ཕྱོགས་གཉིས་ཀྱིས་སྤྱིའི་དཔལ་འབྱོར་གནས་བབ་དང་། ཀྲུང་གོ་དང་ཨ་རིའི་དཔལ་འབྱོར་ཚོང་དོན་འབྲེལ་བའི་ཐད་ཀྱི་ལྟ་ཚུལ་བརྗེ་རེས་བྱས།

ཧོ་ལི་ཧྥེང་གིས་བསྟན་དོན། ད་ལོའི་ཚུན་ལ་ཀྲུང་གོའི་དཔལ་འབྱོར་བརྟན་པོའི་ངང་འཕེལ་རྒྱས་ཕྱིན་པ་དང་། བཟང་ཕྱོགས་སུ་འཕེལ་བའི་འཕེལ་རྒྱས་ཀྱི་རྣམ་པ་སྲུང་འཛིན་བྱས་ནས། རྒྱལ་ཡོངས་གཅིག་གྱུར་གྱི་ཁྲོམ་ར་ཆེན་པོ་གྲུབ་པ་དང་། མགྱོགས་མྱུར་ངང་འཛད་སྤྱོད་ཀྱི་སྦས་ཤུགས་བཏོན། ཀྲུང་གོའི་ཕྱོགས་ཀྱིས་ཕྱོགས་ཡོངས་ནས་བཅོས་སྒྱུར་སྔར་ལས་ཟབ་སྤེལ་བྱེད་ཅིང་། མ་རྩའི་ཁྲོམ་རའི་ཆུ་ཚད་མཐོ་བའི་ཕྱི་ཕྱོགས་སྒོ་འབྱེད་ལ་སྐུལ་འདེད་གཏོང་བ་དང་། རྒྱལ་སྤྱིའི་དངུལ་གཏོང་མཁན་ཀྲུང་གོའི་མ་རྩའི་ཁྲོམ་རའི་འཛུགས་སྐྲུན་ཁྲོད་ཞུགས་པར་དགའ་བསུ་ཞུས་ནས། འཕེལ་རྒྱས་ཀྱི་གོ་སྐབས་མཉམ་སྤྱོད་བྱེད་རྒྱུ་ཡིན།

ཏཱ་ལི་ཨོའུ་ཡིས་བསྟན་དོན། ཀྲུང་གོའི་དཔལ་འབྱོར་སྤྱི་ཚོགས་འཕེལ་རྒྱས་ཀྱི་གྲུབ་འབྲས་ཚང་མའི་མིག་མཐོང་ལག་ཟིན་ཡིན་ལ། ཨ་རི་དང་ཀྲུང་གོའི་དཔལ་འབྱོར་ཚོང་དོན་མཉམ་ལས་ཐད་མུ་མཐུད་དུ་སྟོབས་ཤུགས་འབུལ་འདོད་ཡོད། །