ལིས་ཆང་གིས་འབར་མའི་འགོ་ཁྲིད་པར་མཇལ་འཕྲད་གནང་།

རྒྱལ་སྲིད་སྤྱི་ཁྱབ་ཁང་གི་ཙུང་ལི་ལིས་ཆང་གིས་ཟླ11པའི་ཚེས6ཉིན་གྱི་ཕྱི་དྲོར་ཁུན་མེན་དུ། ཀྲུང་གོ་རུ་མེ་ཀུང་གཙང་པོ་ཆེན་པོའི་ས་ཁོངས་དཔལ་འབྱོར་མཉམ་ལས་ཀྱི་འགོ་ཁྲིད་པའི་གྲོས་ཚོགས་ཐེངས་བརྒྱད་པར་ཞུགས་པའི་འབར་མའི་འགོ་ཁྲིད་པ་མིན་ཨང་ལའེ་ལ་མཇལ་འཕྲད་གནང་།

ལིས་ཆང་གིས2020ལོར་ཀྲུའུ་ཞི་ཞི་ཅིན་ཕིང་གིས་ལོ་རྒྱུས་རང་བཞིན་ལྡན་པའི་སྒོ་ནས་འབར་མར་འཚམས་འདྲི་གནང་བ་དང་། ཀྲུང་གོ་དང་འབར་མའི་འབྲེལ་བ་ལས་སྐལ་གཅིག་མཐུན་ཚོགས་པ་བསྐྲུན་པའི་དུས་རབས་གསར་པར་སླེབས་ཡོད། ཀྲུང་གོ་ཕྱོགས་ཀྱིས་འབར་མའི་བར་གྱི་འབྲེལ་བ་འཕེལ་རྒྱས་སུ་གཏོང་རྒྱུ་དེ་ཀྲུང་གོའི་མཐའ་འཁོར་ཕྱི་འབྲེལ་གྱི་གནས་བབ་གལ་ཆེན་སྟེང་བཞག་ནས། འབར་མ་ཕྱོགས་ཀྱིས་རང་རྒྱལ་ཁབ་ཀྱི་གནས་ཚུལ་དང་འཚམ་པའི་འཕེལ་རྒྱས་ཀྱི་བགྲོད་ལམ་གདམ་ག་བྱ་རྒྱུར་སྔར་སྲོལ་བཞིན་རྒྱབ་སྐྱོར་བྱེད་ཀྱིན་ཡོད་ལ། འབར་མ་ཕྱོགས་དང་མཉམ་དུ་ཆབ་སྲིད་ཐད་ཕན་ཚུན་ཡིད་ཆེས་བྱེད་ཤུགས་ཆེ་རུ་གཏོང་བ་དང་། ཕྱོགས་ཡོངས་འཐབ་ཇུས་མཉམ་ལས་ཟབ་སྤེལ་གཏོང་བ། མཉམ་དུ་ལག་གདང་སྦྲེལ་ནས་འགྲན་སློང་ལ་ཁ་གཏད་འཇལ་བ་བཅས་བྱས་ཏེ། རྒྱལ་ཁབ་གཉིས་ཀྱི་ལས་སྐལ་གཅིག་མཐུན་ཚོགས་པ་འཛུགས་པར་སྐུལ་འདེད་ཏན་ཏིག་གཏོང་འདོད་ཡོད། འབར་མ་ཕྱོགས་ཀྱིས་ཀྲུང་གོའི་ཕྱོགས་ཀྱི་འབར་མའི་ལས་ཁུངས་དང་ལས་གཞི། མི་སྣ་བཅས་ཀྱི་བདེ་འཇགས་ལ་འགན་སྲུང་བྱ་རྒྱུའི་རེ་ལྟོས་ཆེ་ཞེས་གསུངས།

མིན་ཨང་ལའེ་ཡིས་འབར་མ་ཕྱོགས་ཀྱིས་ཀྲུང་གོ་གཅིག་གི་རྩ་དོན་བརྩི་སྲུང་བྱེད་ཀྱིན་ཡོད། སང་ལོ་རྒྱལ་ཁབ་གཉིས་བར་འབྲེལ་བ་བཙུགས་ནས་ལོ75འཁོར་བ་དེ་གོ་སྐབས་སུ་བརྩིས་ནས། ཁྱབ་ཁོངས་སོ་སོའི་མཉམ་ལས་ཟབ་སྤེལ་བཏང་སྟེ། འབར་མ་དང་ཀྲུང་གོའི་ལས་སྐལ་གཅིག་མཐུན་ཚོགས་པ་སྐྲུན་རྒྱུར་འཕེལ་རྒྱས་སྔར་ལས་ཆེན་པོ་ཡོང་བར་སྐུལ་འདེད་གཏོང་འདོད་ཡོད། འབར་མ་ཕྱོགས་ཀྱིས་འབར་མར་ཡོད་པའི་ཀྲུང་གོ་ཕྱོགས་ཀྱི་ལས་ཁུངས་དང་ལས་གཞི། མི་སྣ་བཅས་ཀྱི་བདེ་འཇགས་ནུས་ཤུགས་ཡོད་རྒུས་འགན་སྲུང་བྱ་རྒྱུ་ཡིན་ཞེས་བསྟན།