ཁཱ་ནཱ་ཏཱ་དང་ཨ་མེ་རི་ཁའི་མགོ་ཁྲིད་པས་རྒྱལ་ཁབ་གཉིས་ཀྱི་འབྲེལ་བ་དང་སྒོ་ཁྲལ་གནད་དོན་ཐད་ནས་ཁ་པར་གྲོས་མོལ་བྱས།
ཁཱ་ནཱ་ཏཱའི་ཙུང་ལི་ཁཱ་ནེ་ཡིས་ཚེས་ཉེར་བརྒྱད་ཉིན་ཨ་མེ་རི་ཁའི་ཙུང་ཐུང་ཐི་ལིང་ཕུའུ་ལ་ཁ་པར་བཏང་སྟེ། རྒྱལ་ཁབ་གཉིས་ཀྱི་འབྲེལ་བ་དང་སྒོ་ཁྲལ་སོགས་གནད་དོན་ལ་གྲོས་བསྡུར་བྱས།
ཁཱ་ནཱ་ཏཱའི་ཙུང་ལིའི་གཞུང་སྒྲུབ་ཁང་གིས་སྤེལ་བའི་གནས་ཚུལ་ལྟར་ན། རྒྱལ་ཁབ་གཉིས་ཀྱི་མགོ་ཁྲིད་པས་རྒྱལ་ཁབ་གཉིས་ཀྱི་འབྲེལ་བའི་ཐད་ནས་འཛུགས་སྐྲུན་རང་བཞིན་ལྡན་པའི་གྲོས་མོལ་བྱས་པ་དང་། ཕྱོགས་གཉིས་ཀྱིས་ཁཱ་ནཱ་ཏཱ་རྒྱལ་ཕྲན་མཉམ་འབྲེལ་དམངས་གྲོས་ཁང་གི་འདེམ་བསྐོའི་རྗེས་སུ་མྱུར་མོར་དཔལ་འབྱོར་དང་བདེ་འཇགས་འབྲེལ་བའི་སྐོར་གྱི་གྲོས་མལ་མགོ་རྩོམ་པར་འཐད་པ་བྱུང་།
བསྒྲགས་པ་ལྟར་ན། ཁཱ་ནེ་ཡིས་ཐི་ལིང་ཕུའུ་ལ་བཤད་རྒྱུར། གལ་ཏེ་ཨ་མེ་རི་ཁས་ཟླ་བཞི་བའི་ཚེས་གཉིས་ཉིན་ཁཱ་ནཱ་ཏཱ་ལ་སྒོ་ཁྲལ་ཁ་སྣོན་བྱེད་པའི་འགུལ་སྐྱོད་སྤེལ་ན། ཁཱ་ནཱ་ཏཱ་ཡིས་ཨ་མེ་རི་ཁར་འཁོན་ལན་སློག་པའི་སྒོ་ཁྲལ་བྱེད་ཐབས་ལག་བསྟར་བྱས་ནས་ཁཱ་ནཱ་ཏཱའི་བཟོ་བ་དང་དཔལ་འབྱོར་ལ་སྲུང་སྐྱོབ་བྱེད་རྒྱུ་ཡིན་ཟེར།
ཐི་ལིང་ཕུའུ་ཡིས་ཉིན་དེར་དྲ་ཚིགས་བརྒྱུད་དེ་བསྟན་དོན། ཁོ་དང་ཁཱ་ནེ་གཉིས་ཀྱིས་ཁ་པར་གྲོས་མོལ་བྱས་པར་ཕན་འབྲས་ཆེན་པོ་བྱུང་ཡོད། ཕྱོགས་གཉིས་ཀྱིས་གནད་དོན་མང་བོའི་ཐད་ནས་ཐུན་མོང་ལྟ་ཚུལ་བྱུང་ཡོད་པར་མ་ཟད། ཁཱ་ནཱ་ཏཱ་ཡིས་རྒྱལ་ཕྲན་མཉམ་འབྲེལ་དམངས་གྲོས་ཁང་གི་འདེམ་བསྐོའི་བྱ་འགུལ་སྤེལ་རྗེས་མྱུར་མོར་ཆབ་སྲིད་དང་ཚོང་ལས། དེ་མིན་ཕྱོགས་གཞན་པར་གྲོས་མོལ་བྱེད་རྒྱུ་ཡིན་ཟེར།
ཁཱ་ནེ་ཡིས་ཚེས་ཉེར་གསུམ་ཉིན་ཁྱབ་བསྒྲགས་བྱས་དོན། གྲོས་ཁང་གཏོར་ནས་ཟླ་བཞི་བའི་ཚེས་ཉེར་བརྒྱད་ཉིན་སྔ་སྣུར་གྱིས་སྐབས་ཞེ་ལྔ་བའི་རྒྱལ་ཕྲན་མཉམ་འབྲེལ་དམངས་གྲོས་ཁང་གི་འདེམ་བསྐོའི་བྱ་འགུལ་སྤེལ་རྒྱུ་ཡིན་ཟེར།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注