ནེ་པ་ལའི་གྱེན་འཕུར་གནམ་གྲུ་ཞིག་སར་ལྷུང་སྟེ་ཀྲུང་གོ་བ4རྐྱེན་ལམ་དུ་ཤོར་བ།

ཡོང་ཁུངས། ཀྲུང་གོ་བོད་ཀྱི་དྲ་བ། རྩོམ་སྒྲིག་པ། ཀླུ་མགོན་རྒྱལ། 2024-08-12 08:46:02 ཀློག་གྲངས།2573

པར་འདི་ནི་ཟླ8པའི་ཚེས7ཉིན་འཚོལ་སྐྱོབ་མི་སྣས་ནེ་པ་ལའི་རྒྱལ་ས་ཀ་ཏ་མན་རྡུ་ཉེ་འགྲམ་གྱི་གྱེན་འཕུར་གནམ་གྲུ་སར་ལྷུང་ས་རུ་ལས་དོན་སྒྲུབ་བཞིན་པའི་རྣམ་པ་རེད།

ཟླ8པའི་ཚེས7ཉིན། ནེ་པ་ལའི་རྒྱལ་རབས་མཁའ་སྤྱོད་ཀུང་ཟིའི་གྱེན་འཕུར་གནམ་གྲུ་ཞིག་རྒྱལ་ཁབ་དེའི་རྒྱལ་ས་ཀ་ཏ་མན་རྡུའི་བྱང་ཕྱོགས་ཀྱི་ནུའུ་ཝ་གའོ་ཏི་རྫོང་དུ་སར་ལྷུང་བ་རེད། ནེ་པ་ལར་སྡོད་པའི་ཀྲུང་གོའི་གཞུང་ཚབ་ཁང་གིས་ར་སྤྲོད་པ་ལྟར་ན། གྱེན་འཕུར་གནམ་གྲུ་ནང་ཡོད་པའི་ཀྲུང་གོ་བ4རྐྱེན་ལམ་དུ་ཤོར་ཡོད་པ་རེད།

པར་འདི་ནི་ཟླ8པའི་ཚེས7ཉིན་པར་བླངས་པའི་ནེ་པ་ལའི་རྒྱལ་ས་ཀ་ཏ་མན་རྡུ་ཉེ་འགྲམ་དུ་གྱེན་འཕུར་གནམ་གྲུ་སར་ལྷུང་བའི་ཆག་རོ་རེད།

ནུའུ་ཝ་གའོ་ཏི་རྫོང་གི་མགྲིན་ཚབ་པ་ཏི་ལ་ཁེ·པ་ལ་ཏི་ཡིས་ཞིན་ཧྭ་གསར་འགྱུར་ཁང་གི་གསར་འགོད་པར། གྱེན་འཕུར་གནམ་གྲུ་འདི་ཀ་ཏ་མན་རྡུ་ནས་ལ་སུའུ་ཝ་རྫོང་དུ་འཕུར་བའི་ལམ་བར་གྱི་ནུའུ་ཝ་གའོ་ཏི་རྫོང་གི་ཞི་ཨའོ་པུའུ་ལི་ས་ཁུལ་དུ་སར་ལྷུང་བར་བཤད།

ནེ་པ་ལའི་དམངས་སྤྱོད་ཅུའུ་ཡིས་གསལ་བསྒྲགས་སྤེལ་དོན། གྱེན་འཕུར་གནམ་གྲུ་འདི་ཡར་འཕུར་ནས་ཆུ་ཚོད་སྐར་མ3གྱི་རྗེས་སུ་ཀ་ཏ་མན་རྡུའི་བཀོད་འདོམས་པུའུ་དང་འབྲེལ་ཐག་ཆད་པ་དང་། ནེ་པ་ལའི་ཉེན་རྟོག་ཕྱོགས་ཀྱི་མགྲིན་ཚབ་པ་ཁ་ཨར་ཅི་ཡིས་གསར་འགོད་པར། གྱེན་འཕུར་གནམ་གྲུའི་ཁ་ལོ་བ་ཡང་རྐྱེན་ལམ་དུ་ཤོར་ཡོད་པ་དང་། འཚོལ་སྐྱོབ་མི་སྣས་བེམ་པོ5རྙེད་ཡོད་པར་བཤད།

ནེ་པ་ལའི་ཙུང་ལི་ཨའོ་ལི་ཡིས་ཉིན་དེར། གྱེན་འཕུར་གནམ་གྲུ་སར་ལྷུང་བའི་དོན་རྐྱེན་དེས་ཁོའི་སེམས་པ་སྐྱོ་བོ་གྱུར་པ་དང་། ནེ་པ་ལའི་ནང་སྲིད་ཀྱིས་གྲོས་ཚོགས་བསྡུས་ཏེ། ཆེད་དམིགས་ཨུ་ཡོན་ལྷན་ཁང་བཙུགས་ནས་དོན་རྐྱེན་གྱི་གནས་ཚུལ་ལ་བརྟག་དཔྱད་བྱ་རྒྱུའི་ཐག་བཅད་ཡོད་ཚུལ་བསྟན། །

དོན་རྐྱེན་བྱུང་རྗེས། ནེ་པ་ལར་སྡོད་པའི་ཀྲུང་གོའི་གཞུང་ཚབ་ཁང་གིས་འཕྲལ་དུ་གཞུང་ཚབ་སྲུང་སྐྱོང་གི་འཕྲལ་སྡོམ་ལམ་སྲོལ་ལག་བསྟར་བྱེད་མགོ་ཚུགས་པ་མ་ཟད་ཆེད་དོན་མགོ་ཁྲིད་ཚན་ཆུང་བཙུགས་ཏེ། ནེ་པ་ལ་ཕྱོགས་ཀྱི་འབྲེལ་ཡོད་སྡེ་ཁག་གིས་ཐེངས་འདིའི་དོན་རྐྱེན་ཁྲོད་རྐྱེན་ལམ་དུ་ཤོར་བའི་ཁྱིམ་མི་ལ་འབྲེལ་བ་བྱས་ནས་གཤིན་ལས་བཟང་བོ་བསྒྲུབ་རྒྱུའི་མཐུན་སྦྱོར་གནང་བ་རེད། དེ་དང་དུས་མཚུངས་སུ་ནེ་པ་ལ་རུ་ཡོད་པའི་ཀྲུང་གོའི་མ་གཏོང་ཁེ་ལས་དང་ཀྲུང་གོའི་སྤྱི་དམངས་ཀྱིས་ཆར་དུས་སྐབས་འགྲོ་འོང་དང་ཡུལ་སྐོར་ལ་འགྲོ་དུས་བདེ་འཇགས་ལ་དོ་སྣང་བྱ་དགོས་ཞེས་གསལ་འདེབས་གནང་བ་རེད།