གཉིད་ཡག་པོ་མ་བྱུང་ན་གཅིན་སྙི་ཟ་ཁུའི་ནད་འབྱུང་སྲིད།

ནམ་རྒྱུན་འཚོ་བའི་ཁྲོད། མི་མང་པོ་ཞིག་གིས་གཅིན་སྙི་ཟ་ཁུའི་ནད་དང་བཟའ་བཅའི་བར་འབྲེལ་བ་ཆེན་པོ་ཡོད་པར་སྙམ་གྱིན་འདུག ཁྱེད་ཀྱིས་ཤེས་སམ། ད་དུང་གཅིན་སྙི་ཟ་ཁུའི་ནད་དང་གཉིད་པའི་བར་ལའང་འབྲེལ་བ་ཆེན་པོ་ལྡན་པ་རེད།

འཕྱི་ཉལ་འཕྱི་ལངས་བྱས་ན་གཅིན་སྙི་ཟ་ཁུའི་ནད་འབྱུང་བའི་ཉེན་ཁ་ཆེ།ཞིབ་འཇུག་ལས་ཤེས་རྟོགས་བྱུང་བ་ལྟར་ན། འཕྱི་ཉལ་འཕྱི་ལངས་བྱེད་མཁན་གྱི་མིའི་ལུས་པོའི་ལྗིད་ཚད་ཇེ་མཐོར་འགྲོ་བ་དང་གྲོད་ཁོག་ཅུང་ཆེ་བར་འགྱུར་བ་སོགས་ཀྱི་ཉེན་ཁ་ཆེ་རུ་ཕྱིན་ཡོད། དགོང་མོ་སྔ་མོར་ཉལ་མཁན་དང་བསྡུར་ན། འཕྱི་ཉལ་བྱེད་མཁན་ལ་གཅིན་སྙི་ཟ་ཁུའི་ནད་འབྱུང་བའི་ཉེན་ཁ50%ཡིས་མཐོ་བ་རེད།

དུས་ཡུན་རིང་པོར་དགོང་མོ་འཕྱི་ཉལ་བྱེད་པའམ་ཡང་ན་གཉིད་ཆོས་ཉིད་དང་མཐུན་པོ་ཞིག་མ་ཁུག་ན་མིའི་ལུས་པོའི་ནང་གི་གཉིད་མཚམས་འཇོག་པའི་བྱེད་ལས་གཙོ་བོ་སྐྱེ་དངོས་དུས་ཚོད་ཅེས་པར་གཏོར་བརླག་ཐེབས་ནས་ཟགས་ཐོན་སྙོམས་སྒྲིག་མ་ཐུབ་པར་གཤེར་མའི་ཕུང་རྩིའི་རང་བཞིན་ལ་ཤུགས་རྐྱེན་ཐེབས་པ་དང་། ཁྲག་མངར་འཕར་བ་དང་ཁྲག་ཤེད་ཚོད་འཛིན་མི་ཐུབ་པའི་ཉེན་ཁ་ཇེ་ཆེར་འགྲོ་སྲིད།

མི་འགའ་ཤས་ཀྱི་བསམ་པར་གལ་ཏེ་ཉིན་རེར་དུས་ཚོད་བརྒྱད་རིང་གཉིད་པ་ཡིན་ན། འཕྱི་ཉལ་འཕྱི་ལངས་སམ་ཡང་ན་སྔ་ཉལ་སྔ་ལངས་གང་བྱས་ཀྱང་གཟུགས་པོར་གནོད་པ་དེ་ཙམ་མེད་པར་འདོད་ཀྱིན་ཡོད། དོན་དངོས་སུ་དུས་ཡུན་རིང་པོར་འཕྱི་ཉལ་འཕྱི་ལངས་ཀྱི་གོམས་གཤིས་ངན་པ་ཆགས་ན་གཟུགས་པོར་ནད་འབྱུང་བའི་ཉེན་ཁ་ཆེན་པོ་ཡོད། ཆེད་མཁས་པས་ནམ་རྒྱུན་འཚོ་བའི་ནང་འཕྱི་ཉལ་འཕྱི་ལངས་མ་བྱས་ན་བཟང་བ་དང་། དགོང་མོ་ཉལ་བའི་དུས་ཚོད་འཕྱི་དྲགས་ན་གཟུགས་པོའི་ཚོར་འགྲིམ་དབང་རྩ་འཕར་ཏེ་ལུས་ཤ་རྒྱགས་པོ་ཆགས་པ་དང་ཁྲག་ཤེད་མཐོ་བའི་ཉེན་ཁ་ཇེ་ཆེར་འགྲོ་སྲིད་པའི་དྲན་སྐུལ་གནང་འདུག

གཉིད་ཡག་པོ་ཡོང་བར་ཐབས་ཤེས་འདི་གཉིས་ཚོད་ལྟ་བྱེད་ཆོག གཉིད་ཁུག་པར་ཤུགས་རྐྱེན་བཟོ་བའི་རྒྱུ་རྐྱེན་གཙོ་བོ་གཉིས་ནི། གཉིད་ཆོས་ཉིད་དང་མཐུན་པ་ཞིག་ཁུག་དགོས་པ་དང་། གཉིད་འདང་ངེས་ཁུག་དགོས་པ་དེ་རེད།

1.གཉིད་ཆོས་ཉིད་དང་མཐུན་པ་ཞིག་ཁུག་དགོས།

ཉིན་རེར་གཉིད་པའི་དུས་ཚོད་དང་གཉིད་ལས་སད་པའི་དུས་ཚོད་གཅིག་མཚུངས་རྒྱུན་འཁྱོངས་ཐུབ་ན་གཉིད་ཁུག་པའི་ཆོས་ཉིད་རང་བཞིན་གསོ་སྐྱོང་བྱེད་པར་ཕན་ཐོགས་ཆེ།

2.གཉིད་འདང་ངེས་ཁུག་དགོས།

མིའི་ལུས་ཕུང་གི་རང་ནུས་གསོ་བའི་ལས་ཀ་མང་ཆེ་བ་ཐོ་རེངས་དུས་ཚོད3པའི་སྔོན་ལ་བྱེད་ཀྱིན་ཡོད་པས། དུས་ཚོད23:00ནས་ཆུ་ཚོད3:00བར་གཉིད་ཁུག་པའི་སྤུས་ཚད་ནི་ཧ་ཅང་གནད་འགག་ཆེ་བ་ཞིག་རེད།

ཞིབ་འཇུག་ལས་མངོན་པ་ལྟར་ན། འཚོ་བ་རོལ་སྟངས་ལ་འགྱུར་ལྡོག་གཏོང་དགོས་པ་སྟེ། དཔེར་ན། ཟས་ཉུང་ཙམ་ཟ་བ་དང་འགུལ་སྐྱོད་མང་ཙམ་བྱེད་དགོས་པ། མ་ཉལ་སྔོན་ལ་མཚན་ཟས་མ་ཟོས་ན་གཅིན་སྙི་ཟ་ཁུའི་ནད་འབྱུང་བའི་ཉེན་ཁ་ཇེ་ཆུང་དུ་གཏོང་ཐུབ།

1.ཟས་སྤྱོད་ཆོས་ཉིད་དང་མཐུན་དགོས།

གལ་ཏེ་ལས་ཀའི་དབང་གིས་འཕྱི་ཉལ་མི་བྱེད་ཀ་མེད་བྱུང་ན། ཆོས་ཉིད་དང་མཐུན་པའི་གཉིད་དང་ཟས་སྤྱོད་དུས་ཚོད་རྒྱུན་འཁྱོངས་བྱེད་དགོས།

2.འཚོ་བའི་གོམས་གཤིས་ངན་པ་སྤོང་དགོས།

འཚོ་བའི་གོམས་གཤིས་ངན་པ་གཞན་དག་ཡོ་བསྲང་གང་ཐུབ་བྱས་ཏེ། བཟའ་བཏུང་ཚད་མེད་མི་བསྟེན་པ་དང་། ཉལ་ཁར་ཟས་མི་བཟའ་བར་དུས་བཅད་ལྟར་འགུལ་སྐྱོད་བྱེད་པའི་གོམས་གཤིས་ཆགས་དགོས།

3.ལུས་པོའི་ལྗིད་ཚད་ལ་དོ་དམ་ཡག་པོ་བྱེད་དགོས།

དུས་རྟག་ཏུ་ལུས་པོའི་ལྗིད་ཚད་ལ་དོ་དམ་ཡག་པོ་བྱས་ན། གཅིན་སྙི་ཟ་ཁུའི་ནད་དང་ཁྲག་ཤེད་མཐོ་བའི་ནད་ཕོག་པའི་ཉེན་ཁ་ཇེ་ཆུང་དུ་འགྲོ་ཐུབ།