དྲ་རྒྱའི་ཐད་གཏོང་གི་སྣང་ཚུལ་འདི་དག་ལ་དག་ཐེར་བྱ་རྒྱུ་རེད།
གསར་འགོད་པས་ཀྲུང་དབྱང་དྲ་རྒྱ་འཕྲིན་གཏོང་གཞུང་དོན་ཁང་ནས་ཤེས་རྟོགས་བྱུང་བར་གཞིགས་ན། དྲ་རྒྱའི་ཐད་གཏོང་ལས་སྟེགས་ཀྱིས་བྱེད་པོའི་འགན་འཁྲི་དོན་འཁྱོལ་བྱ་རྒྱུར་སྐུལ་འདེད་གཏོང་བ་དང་། དྲ་རྒྱའི་སྙན་སྒྲོན་པའི་བྱ་སྤྱོད་ལ་དོ་དམ་བྱེད་ཤུགས་ཆེ་རུ་གཏོང་བ། དྲ་རྒྱའི་ཐད་གཏོང་ལས་རིགས་སྐྱོན་བྲལ་དང་གོ་རིམ་ལྡན་པའི་ངང་འཕེལ་རྒྱས་འགྲོ་རྒྱུར་སྐུལ་འདེད་གཏོང་ཆེད། ཉེ་ཆར། ཀྲུང་དབྱང་དྲ་རྒྱ་འཕྲིན་གཏོང་གཞུང་དོན་ཁང་གིས་བརྡ་ཐོ་དཔར་འགྲེམས་བྱས་ནས། རྒྱལ་ཡོངས་ཀྱི་ཁྱབ་ཁོངས་ནང་དུས་ཡུན་ཟླ་བ་གཅིག་གི“དྭངས་གཙང· དྲ་རྒྱའི་ཐད་གཏོང་ཁྱབ་ཁོངས་ཀྱི་རྫུན་མ་དང་ཐ་ཤལ་ཟང་ཟིང་བཅོས་སྒྲིག་བྱེད་པའི”ཆེད་དམིགས་བྱ་སྤྱོད་བཀོད་སྒྲིག་བྱས་པ་རེད།
ཤེས་རྟོགས་བྱུང་བར་གཞིགས་ན། ད་ཐེངས་ཀྱི་ཆེད་དམིགས་བྱ་སྤྱོད་དེས་དྲ་རྒྱའི་ཐད་གཏོང་ཁྱབ་ཁོངས་ཀྱི་རྫུན་མ་དང་ཐ་ཤལ་གྱི་ཟང་ཟིང་ལ་དམིགས་ནས། མངོན་གསལ་དོད་པོའི་གནད་དོན་རིགས་ལྔ་གཙོ་གནད་ཐོག་དག་ཐེར་བྱ་རྒྱུ་ཡིན་པ་སྟེ། གནས་ཡུལ་དང་སྣང་བརྙན་རྫུན་བཟོ་བྱེད་པ་དང་། གཞི་ཐིག་མེད་པར་ཚོང་གཉེར་དྲིལ་སྒྲོག་བྱེད་པ། “ཚན་རིག་ཁྱབ་གདལ་རྫུན་མ”དང་“ཤེས་བྱ་རྫུན་མ”ཉ་ཉོག་མཉམ་བསྲེས་བྱེད་པ། “ཆགས་སྲེད་ཀྱི”ཆ་འཕྲིན་ཁྱབ་སྤེལ་བྱེད་པ། སྤྱི་ཚོགས་ཀྱི་སྒྲིག་ལམ་དཀྲུགས་ནས་མི་གཞན་གྱི་ཁེ་དབང་ལ་གནོད་འཚེ་གཏོང་བ། འཛད་སྤྱོད་པར་མགོ་སྐོར་གཏོང་བ་དང་། ཚོང་ཟོག་རྫུན་མ་དང་སྤུས་ཞན་ཕྱིར་འཚོང་བྱེད་པ་བཅས་རེད།
དེའི་ནང་འཛད་སྤྱོད་པར་མགོ་སྐོར་གཏོང་བ་དང་ཚོང་ཟོག་རྫུན་མ་དང་སྤུས་ཞན་ཕྱིར་ཚོང་བྱེད་པའི་གནད་དོན་ལ་དམིགས་ཏེ། དགའ་མོས་བྱེད་མཁན་དང་། ལྟ་ཚད། བསྔགས་བརྗོད་བྱེད་ཚད། ཉོ་ཚོང་བྱེད་ཚད་སོགས་ཀྱི་གཞི་གྲངས་རྫུན་བཟོ་བྱེད་པ། ཚོང་ཟོག་འཕྲོག་རེས་དང་དགོས་མོས་ཆེས་ཆེར་བྱེད་པའི་འཕྲུལ་སྣང་བཟོ་བ་དང་། ཚོང་ཟོག་གི“ཕན་ནུས”འུད་སྒྲོག་བྱེད་པ། བཟའ་བཅའ་དང་ལུས་ཁམས་བདེ་སྲུང་མཁོ་ཆས་ཀྱི་ནུས་པ་འུད་སྒྲོག་བྱས་ནས་འཛད་སྤྱོད་པར་གོ་ནོར་ཐེབས་སུ་འཇུག་པ། “དམིགས་བསལ་མཁོ་སྤྲོད”སོགས་ལ་ཁ་གཡར་ནས་ཚོང་ཟོག་འདྲ་བཟོ་དང་རྫུན་མ་འཚོང་བ་སོགས་ཀྱི་གནད་དོན་གཙོ་གནད་ཐོག་དག་ཐེར་བྱ་རྒྱུ་རེད།
ཀྲུང་དབྱང་དྲ་རྒྱའི་ཆ་འཕྲིན་གཞུང་དོན་ཁང་གི་འབྲེལ་ཡོད་འགན་འཁུར་བློ་མཐུན་གྱིས་བཤད་དོན། ས་གནས་ཁག་གི་དྲ་རྒྱའི་ཆ་འཕྲིན་སྡེ་ཁག་གིས་སྒྲིག་འཛུགས་དང་བཀོད་སྒྲིག་ཞིབ་ཚགས་བྱས་ནས། ཕྱོགས་ཡོངས་ནས་གྲལ་བཤེར་བཅོས་སྒྲིག་བྱས་ཏེ་དོན་འཁྱོལ་ལ་སྐུལ་འདེད་ཏན་ཏིག་གཏོང་དགོས། ཆེད་དམིགས་བྱ་སྤྱོད་སྤེལ་བ་བརྒྱུད། ཁོངས་གཏོགས་དྲ་ཚིགས་ལས་སྟེགས་ཀྱིས་དྲ་རྒྱའི་སྙན་སྒྲོན་ཚད་ལྡན་དོ་དམ་ཡོང་བར་ཤུགས་སྣོན་རྒྱག་པ་དང་། སྤྱོད་མཁན་གྱི་བྱ་སྤྱོད་ཚད་ལྡན་དུ་གཏོང་བ། འོས་སྦྱོར་ལམ་སྲོལ་ལེགས་སུ་གཏོང་བ་བཅས་བྱས་ཏེ། དྲ་རྒྱའི་ཐད་གཏོང་ལས་རིགས་སྐྱོན་བྲལ་དང་གོ་རིམ་ལྡན་པའི་ངང་འཕེལ་རྒྱས་འགྲོ་རྒྱུར་སྐུལ་འདེད་གཏོང་རྒྱུ།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注