ལེའུ་གསུམ་པ། སྒྲིག་ཁྲིམས་ཀྱི་ཆད་གཅོད་བེད་སྤྱོད་བྱེད་སྟངས་་ཀྱི་སྒྲིག་སྲོལ་སྐོར།
ལེ་ཚན་དང་པོ། སྤྱིའི་དོན་ཚན།
དོན་ཚན་བཅུ་བདུན་པ། གཤམ་གསལ་གནས་ཚུལ་ལས་རིགས་གཅིག་ཡོད་ན། ཆད་པ་ཡང་མོ་གཅོད་པའམ་ཆད་པ་ཇེ་ཡང་དུ་བཏང་ཆོག་པ་སྟེ།
(གཅིག)རང་ཉིད་ལ་ཏང་གི་སྒྲིག་ཁྲིམས་ཀྱི་ཆད་པ་གཅོད་དགོས་ངེས་ཀྱི་གནད་དོན་རང་འགུལ་གྱིས་ངོས་ལེན་ཞུ་བ།
(གཉིས）རྩ་འཛུགས་ཀྱིས་ཁ་བརྡ་དང་ཡིག་སྐུར་འདྲི་རྩད། ཐོག་མའི་ཞིབ་བསྡུར་བྱེད་པ། གྱོད་ཐོ་བཀོད་དེ་ཞིབ་བཤེར་བཅས་བྱེད་རིམ་ཁྲོད་དུ་ཞིབ་བསྡུར་ཞིབ་བཤེར་གྱི་ལས་ཀར་རམ་འདེགས་བྱས་ནས་རང་ཉིད་ཀྱི་སྒྲིག་འགལ་ཁྲིམས་འགལ་དོན་དངོས་ཇི་མ་ཇི་བཞིན་ཞུ་བ།
(གསུམ)གྱོད་འབྲེལ་ངན་རོགས་སམ་ཡང་ན་མི་གཞན་དག་ལ་ཏང་གི་སྒྲིག་ཁྲིམས་ཀྱི་ཆད་པ་གཅོད་པའམ་བཅའ་ཁྲིམས་ཀྱི་ཐོག་ནས་བདའ་འདེད་གཏོང་དགོས་པའི་གནད་དོན་ཐེར་འདོན་བྱས་པ་དེ་རྩད་ཞིབ་ཀྱིས་དོན་དངོས་ཡིན་པ་ར་འཕྲོད་བྱུང་བའམ་བྱས་རྗེས་བཞག་པའི་རྣམ་འགྱུར་གཞན་དག་ཡོད་པ།
(བཞི)རང་འགུལ་གྱིས་གྱོང་གུན་སེལ་བ་དང་ཤུགས་རྐྱེན་ངན་པ་མེད་པ་བཟོ་བའམ་གནོད་འཚེའི་མཇུག་འབྲས་ཐོན་རྒྱུ་བཀག་འགོག་ནུས་ལྡན་བྱས་པ།
(ལྔ)སྒྲིག་འགལ་གྱི་ཐོབ་ཆ་རང་འགུལ་གྱིས་གོང་འབུལ་བྱེད་པའམ་སྐྱིན་ཚབ་འཇལ་སྤྲོད་བྱས་པ།
(དྲུག)ཏང་ནང་གི་ཁྲིམས་སྲོལ་ནང་གཏན་ལ་ཕབ་པའི་ཆད་པ་ཡང་མོ་གཅོད་པའམ་ཆད་པ་ཇེ་ཡང་དུ་གཏོང་བའི་གནས་ཚུལ་གཞན་དག་ཡོད་པ།
དོན་ཚན་བཅོ་བརྒྱད་པ། གྱོད་དོན་གྱི་དམིགས་བསལ་གནས་ཚུལ་ལ་གཞིགས་ནས། ཀྲུང་དབྱང་སྒྲིག་ཨུད་ཀྱིས་ཐག་བཅད་པའམ་ཞིང་ཆེན(པུའུ)རིམ་པའི་སྒྲིག་ཨུད(ཞིང་ཆེན་རིམ་པ་གཞོན་པའི་གྲོང་ཁྱེར་སྒྲིག་ཨུད་ཚུད་མེད)ཀྱིས་ཐག་བཅད་པ་མ་ཟད། ཀྲུང་དབྱང་སྒྲིག་ཨུད་ལ་ཆོག་མཆན་ཞུ་རྒྱུར་འབུལ་དགོས་པ་དང་། སྒྲིག་འགལ་ཏང་ཡོན་ལ་སྲོལ་ཡིག་འདིའི་གཏན་འབེབས་ནང་འཁོད་ཆད་པ་གཅོད་ཚད་ཕུད་པའི་ཆད་པ་ཇེ་ཡང་དུ་བཏང་ནའང་ཆོག
དོན་ཚན་བཅུ་དགུ་པ། ཏང་ཡོན་གྱིས་ཏང་གི་སྒྲིག་ཁྲིམས་ལས་འགལ་ན་ཐ་ཚིག་སྒྲོག་པའམ་ཐ་ཚིག་ནན་མོ་སྒྲོག་པའི་ཆད་པ་གཅོད་དགོས། འོན་ཀྱང་སྲོལ་ཡིག་འདིའི་དོན་ཚན་བཅུ་བདུན་པའི་གཏན་འབེབས་ནང་འཁོད་པའི་གནས་ཚུལ་ལས་རིགས་གཅིག་ཡོད་པའམ་སྲོལ་ཡིག་འདིའི་ཞིབ་གསལ་དོན་ཚན་ནང་གཏན་འབེབས་གཞན་ཡོད་རིགས། སྐྱོན་བརྗོད་སློབ་གསོ་དང་། ཞིབ་བཤེར་བྱེད་འགན་དཀྲི་བ། དྲན་སྐུལ་སློབ་གསོའམ་རྩ་འཛུགས་ཀྱི་ཐག་གཅོད་བྱེད་ཆོག་པ་ལས་ཏང་གི་སྒྲིག་ཁྲིམས་ཀྱི་ཆད་པ་མི་གཅོད་རྒྱུ། སྒྲིག་འགལ་ཏང་ཡོན་ལ་ཆད་པ་གཅོད་མི་དགོས་པ་ཡིན་ཚེ་ཡིག་ཐོག་གི་སྡོམ་ཚིག་འཇོག་དགོས།
ཏང་ཡོན་ལ་སྤྱོད་ཚུལ་དང་སྒྲིག་ཁྲིམས་ཐད་ཀྱི་མགོ་འབུས་རང་བཞིན་དང་ཕྱོགས་ལྷུང་རང་བཞིན་གྱི་གནད་དོན་ཡོད་པའམ་ཡང་ན་ཏང་གི་སྒྲིག་ཁྲིམས་ལས་འགལ་བའི་གནས་ཚུལ་ཚབས་ཆུང་ཡིན་ན། དེར་ཁ་བརྡ་དྲན་སྐུལ་དང་། སྐྱོན་བརྗོད་སློབ་གསོ། ཞིབ་བཤེར་བྱེད་འགན་དཀྲི་བ་སོགས་བྱེད་ཆོག ཡང་ན་དྲན་སྐུལ་སློབ་གསོ་བཏང་ནས་ཏང་གི་སྒྲིག་ཁྲིམས་ཀྱི་ཆད་པ་མི་གཅོད་རྒྱུ།
ཏང་ཡོན་གྱི་བྱ་སྤྱོད་ཀྱིས་གྱོང་གུན་ནམ་མཇུག་འབྲས་བཟོས་མོད། འོན་ཀྱང་དེ་ནི་ཤེས་བཞིན་དུ་བྱས་པའམ་ལས་འཛོལ་ཤོར་བ་མིན་པར། འགོག་ཐབས་མེད་པ་སོགས་ཀྱི་རྐྱེན་ལས་བྱུང་བ་ཞིག་ཡིན་ན། ཏང་གི་སྒྲིག་ཁྲིམས་ཀྱི་འགན་འཁྲི་བདའ་འདེད་མི་བྱེད།
དོན་ཚན་ཉི་ཤུ་པ། གཤམ་གསལ་གྱི་གནས་ཚུལ་ལས་རིགས་གཅིག་ཡོད་ན། ཆད་པ་ལྕི་མོ་གཅོད་པའམ་ཆད་པ་ཇེ་ལྕི་རུ་གཏོང་དགོས་པ་སྟེ།
(གཅིག) མི་གཞན་ལ་སྒྲིག་འགལ་བྱ་རྒྱུའི་བཙན་ཤེད་དང་ངན་སྐུལ་བྱེད་པ།
(གཉིས) སྒྲིག་འགལ་གྱི་ཐོབ་ཆ་གོང་འབུལ་མི་བྱེད་པའམ་ཡང་ན་སྐྱིན་ཚབ་འཇལ་སྤྲོད་མི་བྱེད་པ།
(གསུམ) སྒྲིག་འགལ་བྱས་ནས་ཆད་པ་ཕོག་རྗེས། ཡང་བསྐྱར་བསམ་བཞིན་དུ་སྒྲིག་འགལ་བྱས་པའི་དབང་གིས་ཏང་གི་སྒྲིག་ཁྲིམས་ཀྱི་ཆད་པ་གཅོད་དགོས་པ།
(བཞི) སྒྲིག་འགལ་བྱས་ནས་ཆད་པ་ཕོག་རྗེས། ཆད་པ་མ་ཕོག་གོང་རྩིས་སྤྲོད་བྱས་མེད་པའི་ཏང་གི་སྒྲིག་ཁྲིམས་ཀྱི་ཆད་པ་གཅོད་དགོས་པའི་གནད་དོན་གཞན་དག་བསྐྱར་དུ་ཤེས་པ།
(ལྔ) ཏང་ནང་གི་ཁྲིམས་སྲོལ་ནང་གཏན་ལ་ཕབ་པའི་ཆད་པ་ལྕི་མོ་གཅོད་པའམ་ཇེ་ལྕི་རུ་གཏོང་བའི་གནས་ཚུལ་གཞན་དག་ཡོད་པ།
དོན་ཚན་ཉེར་གཅིག་པ། ཏང་ཡོན་ལ་ཏང་གི་སྒྲིག་ཁྲིམས་ཀྱི་ཆད་པ་གཅོད་པའི་ཤུགས་རྐྱེན་ཐེབས་ཡུན་ནང་བསྐྱར་དུ་ཏང་གི་སྒྲིག་ཁྲིམས་ཀྱི་ཆད་པ་ཕོག་ན། དེའི་ཤུགས་རྐྱེན་ཐེབས་ཡུན་ནི་ཐོག་མའི་ཆད་པ་ལག་བསྟར་བྱས་མེད་པའི་ཤུགས་རྐྱེན་ཐེབས་ཡུན་དང་ཆད་གཅོད་གསར་པའི་ཤུགས་རྐྱེན་ཐེབས་ཡུན་གྱི་བསྡོམས་གྲངས་ཡིན།
དོན་ཚན་ཉེར་གཉིས་པ། ཆད་པ་ཡང་མོ་གཅོད་པ་ཞེས་པ་ནི་སྲོལ་ཡིག་འདིའི་ནང་གཏན་འབེབས་བྱས་པའི་སྒྲིག་འགལ་བྱ་སྤྱོད་ལ་ཆད་པ་གཅོད་ཚད་ནང་ཚུན་དུ་ཅུང་ཡང་བའི་ཆད་པ་གཅོད་རྒྱུར་ཟེར།
ཆད་པ་ལྕི་མོ་གཅོད་པ་ཞེས་པ་ནི་སྲོལ་ཡིག་འདིའི་ནང་གཏན་འབེབས་བྱས་པའི་སྒྲིག་འགལ་བྱ་སྤྱོད་ལ་ཆད་པ་གཅོད་ཚད་ནང་ཚུན་དུ་ཅུང་ལྕི་བའི་ཆད་པ་གཅོད་རྒྱུར་ཟེར།
དོན་ཚན་ཉེར་གསུམ་པ། ཆད་པ་ཇེ་ཡང་དུ་གཏོང་བ་ཞེས་པ་ནི་སྲོལ་ཡིག་འདིའི་ནང་གཏན་འབེབས་བྱས་པའི་སྒྲིག་འགལ་བྱ་སྤྱོད་ལ་ཆད་པ་གཅོད་ཚད་ལས་རིམ་པ་གཅིག་ཡང་དུ་བཏང་ནས་ཆད་པ་གཅོད་རྒྱུར་ཟེར།
ཆད་པ་ཇེ་ལྕི་རུ་གཏོང་བ་ཞེས་པ་ནི་སྲོལ་ཡིག་འདིའི་ནང་གཏན་འབེབས་བྱས་པའི་སྒྲིག་འགལ་བྱ་སྤྱོད་ལ་ཆད་པ་གཅོད་ཚད་ལས་རིམ་པ་གཅིག་གིས་ཇེ་ལྕི་རུ་བཏང་ནས་ཆད་པ་གཅོད་རྒྱུར་ཟེར།
སྲོལ་ཡིག་འདིའི་གཏན་འབེབས་ནང་ཏང་གི་སྐྱིད་སྡུག་ནས་འབུད་པའི་ཆད་གཅོད་རིམ་པ་གཅིག་ཁོ་ན་ལས་མེད་པའི་སྒྲིག་འགལ་བྱ་སྤྱོད་ལ། ནང་གསེས་དོན་ཚན་དང་པོའི་ཆད་པ་ཇེ་ཡང་དུ་གཏོང་བའི་གཏན་འབེབས་སྤྱད་ན་མི་འཐུས།
དོན་ཚན་ཉེར་བཞི་པ། མི་གཅིག་ལ་སྲོལ་ཡིག་འདིའི་ནང་འཁོད་གཏན་འབེབས་ཀྱི་ཏང་གི་སྒྲིག་ཁྲིམས་ཀྱི་ཆད་པ་ཕོག་ངེས་ཀྱི་སྒྲིག་འགལ་བྱ་སྤྱོད་གཉིས་ཡན་ཡོད་ན། ཟླ་སྒྲིལ་བཏང་ནས་ཐག་གཅོད་བྱེད་དགོས་པ་མ་ཟད། དེའི་སྒྲིག་འགལ་བྱ་སྤྱོད་རིགས་དུ་མའི་ཁྲོད་ནས་ཕོག་དགོས་པའི་ཆད་པ་མཐོ་ཤོས་ལས་ཀྱང་རིམ་པ་གཅིག་གིས་ཇེ་ལྕི་རུ་བཏང་ནས་ཆད་པ་གཅོད་རྒྱུ། དེའི་ནང་གི་སྒྲིག་འགལ་བྱ་སྤྱོད་རིགས་གཅིག་ལ་ཏང་གི་སྐྱིད་སྡུག་ནས་འབུད་པའི་ཆད་པ་གཅོད་དགོས་ན། ཏང་གི་སྐྱིད་སྡུག་ནས་འབུད་པའི་ཆད་པ་གཅོད་རྒྱུ།
དོན་ཚན་ཉེར་ལྔ་པ། སྒྲིག་འགལ་བྱ་སྤྱོད་གཅིག་གིས་དུས་མཚུངས་སུ་སྲོལ་ཡིག་འདིའི་དོན་ཚན་གཉིས་ཡན་ལས་འགལ་ན། ཆད་པ་ཅུང་ལྕི་མོ་གཅོད་པའི་དོན་ཚན་ལྟར་ངོ་བོ་གཏན་ཁེལ་གྱིས་ཐག་གཅོད་བྱ་རྒྱུ།
དོན་ཚན་ཞིག་གི་ནང་གཏན་འབེབས་བྱས་པའི་སྒྲིག་འགལ་གྱི་གྲུབ་ཆའི་ཆ་རྐྱེན་གལ་ཆེན་ཡོངས་རྫོགས་དོན་ཚན་གཞན་ཞིག་གི་ནང་གཏན་འབེབས་བྱས་པའི་སྒྲིག་འགལ་གྱི་གྲུབ་ཆའི་ཆ་རྐྱེན་གལ་ཆེན་ནང་ཚུད་ཡོད་པ་མ་ཟད། དམིགས་བསལ་གྱི་གཏན་འབེབས་དང་སྤྱིར་བཏང་གི་གཏན་འབེབས་དབར་གཅིག་མཐུན་མ་བྱུང་ན། དམིགས་བསལ་གྱི་གཏན་འབེབས་སྤྱད་ན་འཐུས།
དོན་ཚན་ཉེར་དྲུག་པ། མི་གཉིས་ཡན་གྱིས་མཉམ་དུ་བསམ་བཞིན་དུ་སྒྲིག་འགལ་བྱས་ན། གཏེ་བོ་དེར་ཆད་པ་ལྕི་མོ་གཅོད་དགོས་པ་དང་། སྲོལ་ཡིག་འདིའི་ནང་གཏན་འབེབས་ལོགས་སུ་བྱས་ཡོད་པ་ཕུད། ཁོངས་མི་གཞན་པར་མཉམ་དུ་སྒྲིག་འགལ་བྱས་པའི་ཁྲོད་ཐོན་པའི་ནུས་པ་དང་འཁུར་དགོས་པའི་འགན་འཁྲི་ལྟར་སོ་སོར་ཆད་པ་གཅོད་རྒྱུ།
དཔལ་འབྱོར་ཐད་མཉམ་དུ་སྒྲིག་འགལ་བྱས་ན། མི་སྒེར་ཞུགས་པའི་གྲངས་འབོར་དང་དེས་ཐོན་པའི་ནུས་པ་ལྟར་སོ་སོར་ཆད་པ་གཅོད་རྒྱུ། མཉམ་དུ་སྒྲིག་འགལ་བྱས་པའི་ཉེས་ཅན་གཏེ་བོའི་གནས་ཚུལ་ཚབས་ཆེན་ཡིན་ན། མཉམ་དུ་སྒྲིག་འགལ་བྱས་པའི་སྤྱིའི་གྲངས་འབོར་ལྟར་ཆད་པ་གཅོད་རྒྱུ།
སྐྱེ་བོ་གཞན་ལ་ངན་སྐུལ་གྱིས་སྒྲིག་འགལ་བྱེད་དུ་བཅུག་ན། དེས་མཉམ་དུ་སྒྲིག་འགལ་བྱས་པའི་ཁྲོད་ཐོན་པའི་ནུས་པར་གཞིགས་ནས་ཏང་གི་སྒྲིག་ཁྲིམས་ཀྱི་འགན་འཁྲི་བདའ་འདེད་གཏོང་རྒྱུ།
དོན་ཚན་ཉེར་བདུན་པ། ཏང་རྩ་འཛུགས་ཀྱི་འགོ་ཁྲིད་སྒྲིག་གཞིས་མཉམ་དུ་ཏང་གི་སྒྲིག་ཁྲིམས་དང་འགལ་བའི་ཆོད་དོན་བཞག་པའམ་ཏང་གི་སྒྲིག་ཁྲིམས་དང་འགལ་བའི་བྱ་སྤྱོད་གཞན་དག་སྤེལ་ན། མཉམ་དུ་བསམ་བཞིན་དུ་བྱས་པའི་ཁོངས་མིར་མཉམ་དུ་སྒྲིག་འགལ་ལྟར་ཐག་གཅོད་བྱ་རྒྱུ། ལས་འཛོལ་ཤོར་བའི་རྐྱེན་གྱིས་སྒྲིག་ཁྲིམས་དང་འགལ་བའི་ཁོངས་མིར་རང་སོ་སོས་མཉམ་དུ་སྒྲིག་འགལ་བྱས་པའི་ཁྲོད་ཐོན་པའི་ནུས་པ་དང་འཁུར་དགོས་ངེས་ཀྱི་འགན་འཁྲི་ལྟར་སོ་སོར་ཆད་པ་གཅོད་རྒྱུ།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注