ཀྲུང་གོ་གུང་ཁྲན་ཏང་གི་སྒྲིག་ཁྲིམས་ཆད་གཅོད་སྲོལ་ཡིག
ལེ་ཚན་དང་པོ། སྤྱིའི་དོན་ཚན།
ལེའུ་གཉིས་པ། སྒྲིག་འགལ་དང་སྒྲིག་ཁྲིམས་ཀྱི་ཆད་པ་གཅོད་ཕྱོགས་སྐོར།
དོན་ཚན་བདུན་པ། ཏང་རྩ་འཛུགས་དང་ཏང་ཡོན་གྱིས་ཏང་གི་སྒྲིག་ཡིག་དང་ཏང་ནང་གི་ཁྲིམས་སྲོལ་གཞན་དག །རྒྱལ་ཁབ་ཀྱི་བཅའ་ཁྲིམས་དང་ཁྲིམས་སྲོལ། ཏང་དང་རྒྱལ་ཁབ་ཀྱི་སྲིད་ཇུས། སྤྱི་ཚོགས་རིང་ལུགས་ཀྱི་ཀུན་སྤྱོད་བཅས་དང་འགལ་ནས་ཏང་དང་། རྒྱལ་ཁབ། མི་དམངས་བཅས་ཀྱི་ཁེ་ཕན་ལ་གནོད་འཚེ་གཏོང་བའི་བྱ་སྤྱོད་ལ་གཏན་འབེབས་ལྟར་སྒྲིག་ཁྲིམས་ཐོག་ནས་ཐག་གཅོད་དམ་ཆད་པ་གཅོད་དགོས་རིགས་ཚང་མར་ངེས་པར་དུ་བདའ་འདེད་གཏོང་དགོས།
དོན་ཚན་བརྒྱད་པ། ཏང་ཡོན་ལ་སྒྲིག་ཁྲིམས་ཀྱི་ཆད་པ་གཅོད་རྒྱུའི་རིགས་གཤམ་གསལ།
(གཅིག) ཐ་ཚིག་སྒྲོག་པ།
(གཉིས) ཐ་ཚིག་ནན་པོ་སྒྲོག་པ།
(གསུམ) ཏང་ནང་གི་གོ་གནས་མེད་པར་བཟོ་བ།
(བཞི) ཏང་ནང་བཞག་ནས་ལྟ་ཞིབ་བྱེད་པ།
(ལྔ) ཏང་གི་སྐྱིད་སྡུག་ནས་འབུད་པ།
དོན་ཚན་དགུ་པ། ཏང་གི་སྒྲིག་ཁྲིམས་ལས་འགལ་བའི་ཏང་རྩ་འཛུགས་ལ་གོང་རིམ་ཏང་རྩ་འཛུགས་ཀྱིས་དེར་ཡིག་ཐོག་ནས་ཞིབ་བཤེར་བྱེད་འགན་དཀྲི་བའམ་ཡང་ན་བརྡ་ཁྱབ་བཏང་ནས་སྐྱོན་བརྗོད་བྱེད་དགོས། ཏང་གི་སྒྲིག་ཁྲིམས་ལས་ཚབས་ཆེན་འགལ་བ་དང་རང་ངོས་ནས་ཡོ་བསྲང་ཡང་བྱེད་མི་ཐུབ་པའི་ཏང་རྩ་འཛུགས་ལ་རིམ་པ་གཅིག་གིས་མཐོ་བའི་ཏང་གི་ཨུ་ཡོན་ལྷན་ཁང་གིས་རྩད་གཅོད་ཁུངས་འཚོལ་བྱས་རྗེས། གནས་ཚུལ་ཚབས་ཆེ་ཆུང་ལ་གཞིགས་ནས། གཤམ་གསལ་ལྟར་ཐག་གཅོད་བྱེད་ཆོག་པ་སྟེ།
(གཅིག) བསྐྱར་སྒྲིག་བྱེད་པ།
(གཉིས) ཁ་གཏོར་བ།
དོན་ཚན་བཅུ་པ། ཏང་ཡོན་ལ་ཐ་ཚིག་སྒྲོག་པའི་ཆད་པ་ཕོག་ནས་ལོ་གཅིག་ནང་ཚུན་དང་ཐ་ཚིག་ནན་པོ་སྒྲོག་པའི་ཆད་པ་ཕོག་ནས་ལོ་གཅིག་དང་ཕྱེད་ཀའི་ནང་ཚུན་དུ། དེ་ཉིད་ཏང་ནང་དུ་གོ་གནས་སྤོར་བའམ་སྔར་བས་བཀོལ་སྤྱོད་བྱེད་མི་ཆོག་ལ། ཏང་ཕྱིའི་རྩ་འཛུགས་ལ་དེ་སྔའི་གོ་གནས་ལས་མཐོ་བའི་ཏང་ཕྱིའི་གོ་གནས་འཁུར་རྒྱུའམ་སྔར་བས་བཀོལ་སྤྱོད་བྱེད་པར་འོས་སྦྱོར་བྱེད་མི་ཆོག
དོན་ཚན་བཅུ་གཅིག་པ། ཏང་ནང་གི་གོ་གནས་མེད་པ་བཟོ་བའི་ཆད་གཅོད་ཅེས་པ་ནི་ཆད་པ་ཕོག་པའི་ཏང་ཡོན་ལ་ཏང་ནང་གི་འདེམས་བསྐོའམ་ཡང་ན་རྩ་འཛུགས་ཀྱིས་བསྐོ་གཞག་བྱས་པའི་ཏང་ནང་གི་གོ་གནས་མེད་པ་བཟོ་བར་ཟེར། ཏང་ནང་དུ་གོ་གནས་གཉིས་ཡན་འཁུར་མཁན་ལ་ཏང་རྩ་འཛུགས་ཀྱིས་ཆད་པ་གཅོད་རྒྱུའི་ཐག་གཅོད་སྐབས། དེའི་གོ་གནས་ཚང་མ་མེད་པ་བཟོ་བའམ་ཡང་ན་གོ་གནས་གཅིག་གམ་ཁ་ཤས་མེད་པ་བཟོ་རྒྱུ་ཡིན་པ་ཁ་གསལ་བཟོ་དགོས། གལ་ཏེ་དེའི་གོ་གནས་གཅིག་མེད་པ་བཟོ་རྒྱུའི་ཐག་བཅད་ན་ངེས་པར་དུ་དེས་འཁུར་བའི་གོ་གནས་མཐོ་ཤོས་དེ་མེད་པ་བཟོ་རྒྱུ། གལ་ཏེ་དེའི་གོ་གནས་གཉིས་ཡན་མེད་པ་བཟོ་རྒྱུའི་ཐག་བཅད་ན་ངེས་པར་དུ་དེས་འཁུར་བའི་གོ་གནས་མཐོ་ཤོས་ནས་རིམ་པ་ལྟར་མེད་པ་བཟོ་རྒྱུ། ཏང་ཕྱིའི་རྩ་འཛུགས་ནང་གོ་གནས་འཁུར་མཁན་ལ་ཏང་ཕྱིའི་རྩ་འཛུགས་ལ་དེའི་ཏང་ཕྱིའི་གོ་གནས་མེད་པ་བཟོ་རྒྱུའི་གྲོས་འགོ་འདོན་དགོས།
ཏང་ཡོན་ལ་ཏང་ནང་གི་གོ་གནས་མེད་པ་བཟོ་བའི་ཆད་པ་ཕོག་པའམ་གོང་གསལ་ནང་གསེས་དོན་ཚན་གྱི་གཏན་འབེབས་ལྟར་ཐ་ཚིག་ནན་པོ་སྒྲོག་པའི་ཆད་པ་ཕོག་རིགས། ལོ་གཉིས་ནང་ཚུན་དུ་ཏང་ནང་དུ་དེ་སྔའི་གོ་གནས་དང་མཚུངས་པའམ་དེ་སྔའི་གོ་གནས་ལས་མཐོ་བའི་གོ་གནས་འཁུར་མི་ཆོག་པ་དང་ཏང་ཕྱིའི་རྩ་འཛུགས་ལ་དེ་སྔའི་གོ་གནས་དང་མཚུངས་པའམ་དེ་སྔའི་གོ་གནས་ལས་མཐོ་བའི་གོ་གནས་འཁུར་རྒྱུར་འོས་སྦྱོར་བྱེད་མི་ཆོག
དོན་ཚན་བཅུ་གཉིས་པ། ཏང་ནང་བཞག་ནས་ལྟ་ཞིབ་བྱེད་པའི་ཆད་པ་གཅོད་རྒྱུ་དེ་ཏང་ནང་བཞག་ནས་ལྟ་ཞིབ་ལོ་གཅིག་བྱེད་པ་དང་ཏང་ནང་བཞག་ནས་ལྟ་ཞིབ་ལོ་གཉིས་བྱེད་པ་གཉིས་སུ་ཕྱེ་ཡོད། ཏང་ནང་བཞག་ནས་ལྟ་ཞིབ་བྱེད་པའི་ཆད་པ་ལོ་གཅིག་ཕོག་པའི་ཏང་ཡོན་དེའི་ཆད་གཅོད་དུས་བཀག་ཐིམ་ཡང་སྔར་བཞིན་ཏང་ཡོན་གྱི་ཁེ་དབང་སླར་གསོའི་ཆ་རྐྱེན་དང་མ་མཐུན་ན། ཏང་ནང་བཞག་ནས་ལྟ་ཞིབ་བྱེད་ཡུན་ལོ་གཅིག་ནར་འགྱངས་བྱ་རྒྱུ། ཏང་ནང་བཞག་ནས་ལྟ་ཞིབ་བྱེད་པའི་དུས་བཀག་རིང་ཤོས་ལོ་གཉིས་ལས་བརྒལ་མི་ཆོག
ཏང་ཡོན་ལ་ཏང་ནང་བཞག་ནས་ལྟ་ཞིབ་བྱེད་པའི་ཆད་པ་ཕོག་ཚེ། དེའི་ཏང་ནང་གི་གོ་གནས་རང་བཞིན་གྱིས་མེད་པ་བཟོ་རྒྱུ། ཏང་ཕྱིའི་གོ་གནས་འཁུར་ཡོད་ན། ཏང་ཕྱིའི་རྩ་འཛུགས་ལ་དེའི་ཏང་ཕྱིའི་གོ་གནས་མེད་པ་བཟོ་རྒྱུའི་གྲོས་འགོ་འདོན་དགོས། ཏང་ནང་བཞག་ནས་ལྟ་ཞིབ་བྱེད་པའི་ཆད་པ་ཕོག་པའི་ཏང་ཡོན་གྱིས་ཏང་ཡོན་གྱི་ཁེ་དབང་སླར་གསོ་བྱས་རྗེས་ཀྱི་ལོ་གཉིས་ནང་ཚུན་དུ་ཏང་ནང་དུ་དེ་སྔའི་གོ་གནས་དང་མཚུངས་པའམ་དེ་སྔའི་གོ་གནས་ལས་མཐོ་བའི་གོ་གནས་འཁུར་མི་ཆོག་པ་དང་ཏང་ཕྱིའི་རྩ་འཛུགས་ལ་དེ་སྔའི་གོ་གནས་དང་མཚུངས་པའམ་དེ་སྔའི་གོ་གནས་ལས་མཐོ་བའི་གོ་གནས་འཁུར་རྒྱུར་འོས་སྦྱོར་བྱེད་མི་ཆོག
དོན་ཚན་བཅུ་གསུམ་པ། ཏང་ཡོན་ལ་ཏང་གི་སྐྱིད་སྡུག་ནས་འབུད་པའི་ཆད་པ་ཕོག་ན། ལོ་ལྔའི་ནང་ཚུན་དུ་ཏང་ནང་བསྐྱར་དུ་ཞུགས་མི་ཆོག་ལ། དེ་སྔའི་གོ་གནས་དང་མཚུངས་པའམ་དེ་སྔའི་གོ་གནས་ལས་མཐོ་བའི་ཏང་ཕྱིའི་གོ་གནས་འཁུར་རྒྱུར་འོས་སྦྱོར་ཡང་བྱེད་མི་ཆོག །ཏང་ནང་བསྐྱར་དུ་ཞུགས་མི་ཆོག་པའི་གཏན་འབེབས་གཞན་ཡོད་ན་གཏན་འབེབས་ལྟར་བྱ་རྒྱུ།
དོན་ཚན་བཅུ་བཞི་པ། ཏང་ཡོན་ལས་བྱེད་པར་ཏང་གི་སྒྲིག་ཁྲིམས་ཀྱི་ཆད་པ་ཕོག་པ་དང་། དུས་མཚུངས་སུ་རྩ་འཛུགས་ཀྱི་ཐག་གཅོད་བྱེད་དགོས་རིགས་ལ་ཏང་རྩ་འཛུགས་ཀྱིས་གཏན་འབེབས་ལྟར་རྩ་འཛུགས་ཀྱི་ཐག་གཅོད་བྱེད་དགོས།
ཏང་གི་འཐུས་མིའི་ཚོགས་ཆེན་རིམ་པ་ཁག་གི་འཐུས་མིར་ཏང་ནང་བཞག་ནས་ལྟ་ཞིབ་བྱེད་པ་ཡན་གྱི་ཆད་པ་ཕོག་ན། ཏང་རྩ་འཛུགས་ཀྱིས་དེའི་འཐུས་མིའི་ཐོབ་ཐང་མཚམས་འཇོག་དགོས།
དོན་ཚན་བཅོ་ལྔ་པ། བསྐྱར་སྒྲིག་ཐག་གཅོད་ཀྱི་ཆད་པ་ཕོག་པའི་ཏང་རྩ་འཛུགས་ཀྱི་འགོ་ཁྲིད་སྒྲིག་གཞིའི་ཁོངས་མི་ཡིན་ན། ཏང་ནང་གི་གོ་གནས་མེད་པ་བཟོ་བ་ཡན་གྱི་ཆད་པ་གཅོད་དགོས་པ་ཕུད་དེ་དག་གི་གོ་གནས་ཚང་མ་རང་བཞིན་གྱིས་མེད་པར་གྱུར་པ་ཡིན།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注