མགོ་ལོག་བོད་རིགས་རང་སྐྱོང་ཁུལ་པདྨ་རྫོང་གི་འབྲེལ་ཡོད་མགོ་ཁྲིད་གཙོ་བོས་སེ་ལེ་ཐང་ཐང་གྲོང་རྡལ་པད་ཡག་སྡེ་བའི་མོག་རོ་འདེབས་འཛུགས་རྟེན་གཞི་དང་པདྨ་རྫོང་ཞིང་ཕྱུགས་ཐོན་རྫས་ཐོན་ལས་གླིང་དུ་རྟོག་ཞིབ་བྱས།

སེ་ལེ་ཐང་གྲོང་རྡལ་པད་ཡག་སྡེ་བའི་མོག་རོ་འདེབས་འཛུགས་རྟེན་གཞི་རུ་རྟོག་ཞིབ་ཚན་ཆུང་གིས་ཡུལ་དངོས་སུ་ལས་གཞི་འཛུགས་སྐྲུན་གྱི་འཕེལ་རིམ་ལ་ལྟ་ཞིབ་བྱས་པ་མ་ཟད་འབྲེལ་ཡོད་འགན་འཁུར་བ་དང་བརྗེ་རེས་གཏིང་ཟབ་བྱས། ལས་གཞི་འཛུགས་སྐྲུན་ལ་དམིགས་ནས་རྫོང་གི་མགོ་ཁྲིད་ཀྱིས་ཚད་མང་པོའི་ཐོག་ནས་བླང་བྱ་བཏོན། གཅིག་ནས་རྣམ་གྲངས་འཛུགས་སྐྲུན་གྱི་ཚད་གཞིའི་ཐད་ངེས་པར་དུ་འགག་སྒོ་ནན་སྲུང་བྱས་ནས་ལས་གཞི་འཛུགས་སྐྲུན་དེ་ཚད་གཞི་མཐོན་པོའི་ངང་བླང་བྱ་ནན་མོ་དང་མཐུན་པར་འགན་ལེན་བྱེད་དགོས། གཉིས་ནས་འདེབས་འཛུགས་ལག་རྩལ་ཐད་ཧུར་བརྩོན་གྱིས་སྔོན་ཐོན་ལག་རྩལ་ནང་འདྲེན་དང་བེད་སྤྱོད་བྱ་དགོས་ཤིང་། མོག་རོ་འདེབས་འཛུགས་ཀྱི་ཚན་རྩལ་འདུས་ཚད་མཐོ་རུ་གཏོང་དགོས། གསུམ་ནས་ཐོན་ལས་རྣམ་གྲངས་ཀྱི་དོ་དམ་ལྷུ་ཚིགས་སུ་ཚན་རིག་དང་མཐུན་ཞིང་ལས་ཕྱོད་ཆེ་བའི་དོ་དམ་ལམ་སྲོལ་འཛུགས་དགོས་པ་དང་། ལས་གཞི་གོ་རིམ་ལྡན་པའི་ངང་སྐུལ་འདེད་གཏོང་དགོས། བཞི་ནས་ཁོར་ཡུག་སྲུང་སྐྱོང་བྱ་བར་ཚད་མཐོའི་མཐོང་ཆེན་དང་། ཐོན་ལས་འཕེལ་རྒྱས་དང་སྐྱེ་ཁམས་སྲུང་སྐྱོང་གཉིས་ཕན་ཡོང་བར་བྱ་དགོས།

པདྨ་རྫོང་ཞིང་ཕྱུགས་ཐོན་རྫས་ཐོན་ལས་གླིང་དུ་རྟོག་ཞིབ་ཚན་ཆུང་གིས་ཐོན་ལས་གླིང་ཁུལ་གྱི་ལས་གཉེར་དང་མི་སྣ་བཀོད་སྒྲིག་བྱས་པ་མ་ཟད། ཐོན་རྫས་ཞིབ་འཇུག་གསར་སྤེལ་ལས་རིམ་སོགས་ཀྱི་གནས་ཚུལ་རྒྱུས་ལོན་གསལ་བོར་བྱས་པ་དང་ཐོན་ལས་གླིང་ཁུལ་གྱི་མ་འོངས་པའི་འཕེལ་རྒྱས་ལ་བླང་བྱ་ཞིབ་མོ་བཏོན། གཅིག་ནས་ཕྱུགས་ཟོག་རིགས་དབྱེ་གནད་འཁེལ་དང་ཕྱུགས་ལས་ཐོན་རྫས་ལས་སྣོན་ཞིབ་ཚགས་བྱེད་པར་སྐུལ་འདེད་བཏང་ནས་ཐོན་རྫས་ཀྱི་ཟུར་སྣོན་རིན་ཐང་མཐོ་རུ་གཏོང་དགོས། གཉིས་ནས་དཔལ་འབྱོར་གྱི་རྩིས་ཡག་པོ་བརྒྱབ་ནས་ཐོན་ལས་ཀྱི་དཔལ་འབྱོར་ཕན་འབྲས་ཆེ་རུ་གཏོང་དགོས། གསུམ་ནས་ཚོང་རའི་དགོས་མཁོར་དམ་པོར་དམིགས་ཏེ་ཐོན་སྐྱེད་དང་ཞིབ་འཇུག་གསར་སྤེལ་གྱི་ཁ་ཕྱོགས་ལེགས་སྒྲིག་བྱས་ནས་ཐོན་རྫས་ཚོང་རའི་འགྲན་རྩོད་ནུས་པ་ཆེ་རུ་གཏོང་དགོས། བཞི་ནས་ཐོན་རྫས་ཞིབ་འཇུག་གསར་སྤེལ་བྱེད་ཤུགས་རྒྱུན་མཐུད་ངང་ཆེ་རུ་བཏང་ནས་ཚོང་རའི་དགོས་མཁོ་དང་མཐུན་པའི་སྤུས་ལེགས་ཞིང་ཕྱུགས་ཐོན་རྫས་སྔར་ལས་མང་བོ་འདོན་དགོས།

ཐེངས་འདིའི་རྟོག་ཞིབ་བྱས་པ་དེས་པདྨ་རྫོང་གིས་ཁྱད་ལྡན་ཐོན་ལས་འཕེལ་རྒྱས་ལ་ཚད་མཐོའི་མཐོང་ཆེན་བྱས་པ་མཚོན་ལ། ཡུལ་དངོས་སུ་རྟོག་ཞིབ་དང་གནད་འཁེལ་མཛུབ་སྟོན་བྱས་པ་བརྒྱུད། སེ་ལེ་ཐང་གྲོང་རྡལ་པད་ཡག་སྡེ་བའི་མོག་རོ་འདེབས་འཛུགས་རྟེན་གཞི་དང་པདྨ་རྫོང་ཞིང་ཕྱུགས་ཐོན་རྫས་ཐོན་ལས་གླིང་གི་རྒྱུན་མཐུད་འཕེལ་རྒྱས་ལ་ཁ་ཕྱོགས་གསལ་སྟོན་བྱས་པ་དང་། པདྨ་རྫོང་གིས་ཐོན་ལས་བཀོད་སྒྲིག་སྔར་བས་ལེགས་སུ་གཏོང་རྒྱུ་དང་ཁྱད་ལྡན་ཐོན་ལས་ཀྱི་སྤུས་མཐོའི་འཕེལ་རྒྱས་ལ་སྐུལ་འདེད་གཏོང་བར་རྨང་གཞི་བརྟན་པོ་བཏིང་།