ཀན་སུའུ་ཡིས“དམར་ཐིག”བཟོས་ནས་རྨ་ཆུ་རྒྱུག་ཁུལ་གྱི་སྐྱེ་ཁམས་བདེ་འཇགས་སྲུང་ཡོལ་བརྟན་པོར་སྲུང་བ།

ཀན་སུའུ་ཡིས“དམར་ཐིག”བཟོས་ནས་རྨ་ཆུ་རྒྱུག་ཁུལ་གྱི་སྐྱེ་ཁམས་བདེ་འཇགས་སྲུང་ཡོལ་བརྟན་པོར་སྲུང་བ།

ཀན་སུའུ་ཞིང་ཆེན་སྲིད་གཞུང་གསར་འགྱུར་གཞུང་དོན་ཁང་གིས་ཚེས4ཉིན་གསར་འགྱུར་ཡོངས་བསྒྲགས་ཚོགས་འདུ་འཚོགས་ནས་ངོ་སྤྲོད་བྱས་པར་གཞིགས་ན།　རྨ་ཆུ་རྒྱུག་ཁུལ་གྱི་སྐྱེ་ཁམས་སྲུང་སྐྱོང་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བར་བར་མཐོངས་ཀྱི་འགན་ལེན་བྱ་ཆེད།　ཀན་སུའུ་ཞིང་ཆེན་རང་བྱུང་ཐོན་ཁུངས་ཐིང་གིས་རྨ་ཆུ་རྒྱུག་ཁུལ་དང་འབྲེལ་བ་ཡོད་པའི་གྲོང་ཁྱེར（ཁུལ）9ལ་སྐྱེ་ཁམས་སྲུང་སྐྱོང་གི་དམར་ཐིག་རྒྱ་ཁྱོན་མུའུ་ཁྲི4281དབྱེ་ནས་ཞིང་ལས་དང་།　སྐྱེ་ཁམས།　གྲོང་ཁྱེར་དང་གྲོང་རྡལ་བཅས་ཀྱི་བར་མཐོངས་ཚན་རིག་དང་མཐུན་པའི་ངང་སྤྱི་འདོམས་བྱས་ནས།　རྨ་ཆུ་རྒྱུག་ཁུལ་གྱི་རང་བྱུང་སྐྱེ་ཁམས་བདེ་འཇགས་ཀྱི་མཐའ་མཚམས་ཡག་པོར་སྲུང་བ་རེད།༨

ཀན་སུའུ་ནི་རྨ་ཆུ་རྒྱུག་ཁུལ་གྱི་ཆུ་ཁུངས་གསོ་འཁྱོངས་ཁུལ་དང་མཁོ་སྤྲོད་ཁུལ་གལ་ཆེན་ཞིག་ཡིན་པས།　རྨ་ཆུའི་སྟོད་རྒྱུད་ཀྱི་སྐྱེ་ཁམས་སླར་གསོ་དང་།　ས་ཆུ་སྲུང་འཛིན།　སྦགས་བཙོག་འགོག་བཅོས་བཅས་ལ་སྐུལ་འདེད་གཏོང་བའི་ཁྲོད་ལས་འགན་ལྕི་མོ་ཁུར་ཡོད་པ་རེད།　ངོ་སྤྲོད་བྱས་པར་གཞིགས་ན།　ཞིང་ཆེན་དེའི་རྨ་ཆུ་རྒྱུག་ཁུལ་གྱི་རྫོང（ཆུས）53ནི“བྱང་གསུམ”ལས་གྲྭ་འཛུགས་སྐྲུན་ཁྱབ་ཁོངས་སུ་ཡོད་པ་དང་།　དྭངས་གཙང་གི་རྨ་ཆུ་ནི་ཀན་སུའུ་རུ“ནང་རྒྱུག་གཉིས་དང་ཕྱིར་རྒྱུག་གཉིས”ཀྱི་གནས་བབ་ཆགས་ཡོད་པས།　རྨ་ཆུའི་སྐྱེ་ཁམས་གོ་གནས་དམིགས་བསལ་དང་སྐྱེ་ཁམས་ཀྱི་འགན་འཁྲི་ལྕི་མོ་ཡོད།

2023ལོའི་ཟླ10པའི་ཚེས31ཉིན“བྱང་གསུམ”ལས་གྲྭ་སྤེལ་བའི་ཡུལ་དངོས།

རི་ཆུ་ནགས་ཞིང་མཚེའུ་རྩྭ་བཅས་ཕྱོགས་བསྡུས་བཅོས་སྐྱོང་དང་།　མ་ལག་བཅོས་སྐྱོང་།　འབྱུང་རྩ་བཅོས་སྐྱོང་བཅས་ལ་སྤྱི་འདོམས་སྐུལ་འདེད་བཏང་ནས།　ནུས་ཤུགས་ཡོད་རྒུས“བྱང་གསུམ”བཟོ་འགོད་ཀྱི་འགག་སྒྲོལ་དམག་འཐབ་ཡག་པོར་བརྒྱབ།　ཀན་སུའུ་ཞིང་ཆེན་ནགས་ལས་དང་རྩྭ་ཐང་ཅུའུ་ཡི་ཅུའུ་ཀྲང་གཞོན་པ་ཀུང་ཝུན་ཕུང་གིས་བཤད་རྒྱུར།　ཞིང་ཆེན་འདིས“ཕྱོགས་གཉིས་དམ་འཛིན”གྱི་འཛུགས་སྐྲུན་གོ་སྐབས་དམ་འཛིན་བྱས་ནས།　རྨ་ཆུའི“ཁུགས་སོ་གཉིས”ཀྱི་འགག་སྒྲོལ་དམག་འཐབ་དང་རྨ་ནུབ་དོག་ལམ་སྟེ་ཐ་ཀན་ལ་མ་ཀན་བྱེ་ཐང་མུ་འགྲམ་འགོག་རྒོལ་དམག་འཐབ་ལ་མགྱོགས་མྱུར་ངང་སྐུལ་འདེད་བཏང་ཞིང་།　2024ལོའི“བྱང་གསུམ”ལས་གྲྭའི་གཙོ་གནད་རྣམ་གྲངས53བརྩོན་ལེན་ཧུར་ཐག་བྱས་པར་མ་དངུལ་སྒོར་དུང་ཕྱུར47.46གཤམ་སྤྲོད་བྱས་པ་དེ་དག་བྱེ་བཅོས་ནགས་བཟོ་དང་ཐང་རྒོད་ཅན་བཅོས་སྒྲིག་ཐད་སྤྱད་ཡོད།

ངོ་སྤྲོད་བྱས་པར་གཞིགས་ན།　ཉེ་བའི་ལོ་གསུམ་རིང་ཀན་སུའུ་ཞིང་ཆེན་རྨ་ཆུ་རྒྱུག་ཁུལ་དུ་རིམ་རྩིས་བྱས་ན་ནགས་བཟོ་མུའུ་ཁྲི638.20བྱས་པ་དང་།　རྩྭ་ཐང་གི་རྩྭ་འདེབས་ལེགས་བཅོས་མུའུ་ཁྲི897.38བཏང་བ་དེས་ཞིང་ཆེན་ཡོངས་ཀྱི60.95％དང47.11％སོ་སོར་བཟུང་ནས།　སྐྱེ་ཁམས་ཀྱི་གནས་ཚུལ་མངོན་གསལ་དོད་པོས་ཇེ་ལེགས་སུ་ཕྱིན་ཡོད།　རྨ་ཆུ་དང་།　ཧོན་རྫོང་།　ཀུའུ་ལང་སོགས་གཙོ་གནད་ས་ཁུལ་གྱི་བྱེ་འགྱུར་ས་ཆར་བཅོས་སྐྱོང་རགས་ཙམ་ཐུབ་ཡོད།

ཉེ་བའི་ལོ་ཤས་རིང་།　ཀན་སུའུ་ཡིས་སྐྱེ་ཁམས་སྔོན་ལ་འཇོག་པ་དང་ལྗང་མདོག་འཕེལ་རྒྱས་གཏོང་རྒྱུ་མཐའ་འཁྱོངས་བྱས་ཏེ།　ས་ཆུ་བཅོས་སྒྲིག་བྱ་རྒྱུ་གཙོ་གནད་དུ་བྱས་ནས།　སྔོ་ལྗང་རྒྱ་ཆེར་གཏོང་བ་དང་།　ས་རྒྱུ་སྲུང་བ།　བྱེ་བཅོས།　སྦགས་བཙོག་ཉུང་གཏོང་སོགས་ཀྱི་གཙོ་གནད་ལས་དོན་མཐུན་སྦྱོར་ངང་སྤེལ་ཡོད།　ཀན་སུའུ་ཞིང་ཆེན་རང་བྱུང་ཐོན་ཁུངས་ཐིང་གི་ཐིང་ཀྲང་གཞོན་པ་ཧྲང་ཞའོ་ལུང་གིས་བཤད་རྒྱུར།　ཞིང་ཆེན་འདིས་ལོ་རྒྱུས་ཐོག་ལུས་པའི་བེད་མེད་གཏེར་རིའི་སྐྱེ་ཁམས་སླར་གསོ་དང་བཅོས་སྒྲིག་ལ་སྐུལ་འདེད་གཏོང་རིང་།　རིམ་རྩིས་བྱས་ན་མ་དངུལ་སྒོར་དུང་ཕྱུར3.87བཏང་ནས་རྨ་ཆུ་རྒྱུག་ཁུལ་དུ་ལོ་རྒྱུས་ཐོག་ལུས་པའི་གཏེར་རིའི་སྐྱེ་ཁམས་སླར་གསོའི་རྣམ་གྲངས41ལག་བསྟར་བྱས་པར་བཅོས་སྒྲིག་གཞི་ཁྱོན་སྤྱི་ཆིང4800ཟིན་ཡོད་ཟེར།

འདི་ནི་བྱེ་གནོན་ཤིང་འཛུགས་ཀྱི་ཡུལ་དངོས་ཡིན།

དེ་དང་ཆབས་ཅིག　ཀན་སུའུ་ཡིས་རི་ཆུ་ནགས་གསུམ་དང་།　ཞིང་ཁ།　མཚེའུ།　རྩྭ་བཅས་གཞི་གཅིག་ཅན་གྱི་སྲུང་སྐྱོང་དང་མ་ལག་བཅོས་སྐྱོང་མཐའ་འཁྱོངས་བྱས་ཏེ།　ནུས་ཤུགས་ཡོད་རྒུས་ལྗང་མདོག་རྒྱ་ཆེར་གཏོང་བ་དང་།　སྤུས་ཚད་མཐོ་རུ་གཏོང་བ།　སྤྱི་འབོར་མང་དུ་གཏོང་བ་བཅས་བྱས་པ་དང་།　ཀན་ལྷོའི་རྨ་ཆུའི་སྟོད་རྒྱུད་དང་།　མདོ་ལ་རིང་མོའི་བྱང་འདབས།　ལུང་དབུས་ལུང་ཤར་སོགས་གཙོ་གནད་ས་ཁོངས་ཀྱི་སྐྱེ་ཁམས་ཉམས་གསོའི་ལས་གཞི་མ་ལག་ལྡན་པའི་སྒོ་ནས་ཇུས་འགོད་དང་ལག་བསྟར་བྱས།