ཡུས་ཧྲུའུ་གྲོང་ཁྱེར་གྱིས་ད་ལོའི་དགུན་ཁ་དང་སང་ལོའི་དཔྱིད་ཀའི་གནོད་འགོག་གནོད་སེལ་དང་ཕྱུགས་སྲུང་བྱ་བ་ནུས་ཤུགས་ཡོད་རྒུས་ལེགས་པོར་བསྒྲུབས།

2024ལོའི་དགུན་ཁ་སླེབས་པའི་ཚུན་ལ། ཡུས་ཧྲུའུ་བོད་རིགས་རང་སྐྱོང་ཁུལ་ཡུས་ཧྲུའུ་གྲོང་ཁྱེར་གྱིས་སྐྱེ་ཁམས་ཕྱུགས་ལས་ལེགས་པོར་སྒྲུབ་པའི་འཕེལ་རྒྱས་ཀྱི་བསམ་བློར་གཞིགས་ནས། ན་ནིང་ཁངས་ཆག་ཐེབས་པའི་བསླབ་བྱ་བསྡུ་ལེན་བྱས་པར་མ་ཟད་ཉམས་མྱོང་ཕྱོགས་སྡོམ་བྱས་ཏེ། ད་ལོའི་དགུན་ཁ་དང་སང་ལོའི་དཔྱིད་ཀའི་གནོད་འགོག་གནོད་སེལ་དང་ཕྱུགས་སྲུང་བྱ་བ་ནུས་ཤུགས་ཡོད་རྒུས་ལེགས་པོར་བསྒྲུབས།

ཡུས་ཧྲུའུ་གྲོང་ཁྱེར་གྱིས་མ་འོངས་སྔོན་འགོག་བྱས་ནས། གཅིག་སྡུད་གསོག་ཉར་དང་འབྲོག་ཁྱིམ་སོ་སོས་གསོག་ཉར་བྱེད་ཐབས་སྤྱད་དེ། གསོ་ཆས་དང་འབྲུ་རིགས། འབུད་རྫས་དང་གནོད་འགོག་རྒུད་སྐྱོབ་དངོས་རྒྱུ་གཞན་པ་བཅས་ཀྱི་གསོག་ཉར་བྱ་བ་ལེགས་པོར་བསྒྲུབས་པ་དང་། གྲོང་ཁྱེར་རིམ་པའི་ཁ་གསབ་སྤྲོད་ཚད་ཇེ་ཆེར་བཏང་ཞིང་། ཡུལ་ཚོ་དང་གྲོང་རྡལ། སྲང་ལམ་བཅས་ཀྱི་འབྲོག་ཁྱིམ་རྩ་འཛུགས་དང་སྐུལ་སློང་བྱས་ནས་གཟན་རྩྭ་གསོག་ཉར་བྱ་བ་སྤེལ། མིག་སྔར། ཡུལ་ཚོ་དང་གྲོང་རྡལ། སྲང་ལམ་བཅས་ཀྱི་འབྲོག་ཁྱིམ་གྱིས་གཟན་ཆས་ཏུན་སྟོང་གསུམ་ལྷག་གཏོང་འདྲེན་བྱས་པ་དང་། གཟན་རྩྭའི་རྟེན་གཞིར་གཟན་རྩྭ་ཁྲེས་པོ་ཁྲི་གཉིས་གསོག་ཉར་བྱས་ཤིང་། གྲོང་ཁྱེར་ཡོངས་ཀྱིས་གསོག་ཉར་བྱས་པའི་གཟན་རྩྭ་ཏུན་ཁྲི་བཞི་དང་སྟོང་དགུ་ཡོད། གཙོ་ཁྲིད་ཁེ་ལས་ཀྱི་སྐྱེ་ཁམས་ཞིང་ཕྱུགས་ལས་མཉམ་ལས་ཁང་གི་ལས་གཞི་དང་སྔ་འཛུགས་ཕྱི་གསབ་ཀྱི་ལས་གཞི་ལག་བསྟར་བྱས་པར་བརྟེན་ནས་མཉམ་ལས་ཁང་གི་ཕྱུགས་ཟོག་གསོ་སྤེལ་ཁེ་ཕན་མཐོར་འདེགས་བཏང་བར་མ་ཟད།  རྒྱུན་མཐུད་ཐུབ་པའི་འཕེལ་རྒྱས་དང་སྡེབ་སྒྲིག་རྣམ་པའི་གསོ་ར་འཛུགས་སྐྲུན་མངོན་འགྱུར་བྱུང་བ་དང་། གནམ་གཤིས་མི་ལེགས་པའི་དུས་ཀྱི་ཕྱུགས་ཟོག་གི་གསོན་ཚད་མཐོར་འདེགས་བཏང་སྟེ། གནོད་འཚེའི་དབང་གིས་གྱོང་གུད་ཐེབས་པའི་ཉེན་ཁ་ཇེ་ཆུང་དུ་བཏང་། 

དེ་ལས་གཞན། ཕྱུགས་རིགས་ཐོན་རྫས་ཕྱིར་འཚོང་གི་དུས་ཚིགས་ལེགས་ཤོས་བེད་སྤྱད་དེ། གནོད་འགོག་གནོད་སེལ་དང་ཕྱུགས་སྲུང་བྱ་བ་དྲིལ་སྒྲོག་བྱས་པ་དང་། རོང་འབྲོག་མང་ཚོགས་ཀྱིས་ཕྱུགས་འཚོ་བ་དང་དོ་དམ་བྱེད་པར་སློབ་གསོ་དང་ཁྲིད་སྟོན་བྱས་ཤིང་། བེད་སྤྱོད་རྩྭ་ར་ལུགས་མཐུན་སྒོས་འཆར་འགོད་བྱས་པ་དང་། ཚན་རིག་དང་མཐུན་པའི་སྒོ་ནས་གཟན་ཆས་ཁ་གསབ་བྱས་ཏེ། དགུན་དུས་ཀྱི་ཕྱུགས་ཟོག་གསོན་ཚད་མཐོར་འདེགས་བཏང་། རྒྱ་ཆེའི་རོང་འབྲོག་མང་ཚོགས་ལ་སྐུལ་སློང་བྱས་ནས་ཕྱུགས་ཟོག་གསོ་ཁ་ནས་འབུད་ཚད་མཐོར་འདེགས་བཏང་བ་དང་། མགྱོགས་མྱུར་སྒོས་ཕྱུགས་ཁྱུ་བརྗེ་སྤོར་བྱས་ཤིང་། ཟླ་རེའི་གསོ་ཁ་ནས་འབུད་ཚད་ཀྱི་ཁ་གསབ་ཆ་འཕྲིན་སྡུར་བཤེར་བྱས་ནས་སྙན་ཞུ་ཕུལ་ཏེ། ཚད་ཆེས་ཆེ་བའི་སྒོ་ནས་ཕྱུགས་ལས་ཐོན་སྐྱེད་ལ་ཤུགས་རྐྱེན་མི་ཐེབས་པར་ཁག་ཐེག་བྱས།