པདྨ་རྫོང་གིས་བཅོས་སྐྱོང་ལ་བརྟེན་ནས་ཁོར་ཡུག་ཇེ་ཡག་ཏུ་བཏང་།

མཁའ་དབུགས་སྤུས་ཚད་ལེགས་བཅོས་བྱེད་པ་སྲོག་ཤིང་དང་། རིལ་རྡོག་ཕྲ་མོའི(PM2.5)གར་ཚད་ཇེ་དམར་གཏོང་བ་གཙོ་ཐིག་བྱེད་པ། མཁའ་དབུགས་སྦགས་བཙོག་ཇེ་ཉུང་དང་མི་དམངས་མང་ཚོགས་ཀྱི་ཉེ་འགྲམ་གྱི་མཁའ་དབུགས་དང་ཁོར་ཡུག་གནད་དོན་མངོན་གསལ་ཅན་ཐག་གཅོད་པ་གཙོ་གནད་དུ་བཟུང་སྟེ། ཐོན་ལས་དང་ནུས་ཁུངས། འགྲིམ་འགྲུལ་ལྗང་མདོག་ཐཱན་ཉུང་རིགས་བསྒྱུར་བྱེད་པར་ཏན་ཏིག་གིས་སྐུལ་འདེད་བྱས། ཡུལ་དངོས་སྐོར་ཞིབ་བྱས་པ་བརྒྱུད། གཞུང་ལམ་གྱི་ས་རྡུལ་དང་གད་སྙིགས་མེར་སྲེག་པ། ཨར་ལས་ཡུལ་དངོས། བཟོ་སྐྲུན་གད་སྙིགས་བཅས་ཞིབ་བཤེར་ཐག་གཅོད་ཀྱི་ཤུགས་ཚད་ཇེ་ཆེར་བཏང་སྟེ། གནད་དོན་ཤེས་རྟོགས་བྱུང་བ་དུས་ཐོག་ཏུ་ཐག་གཅོད་བྱས། ད་ལོ་ནས་བཟུང་། རིགས་སོ་སོའི་སྐོར་ཞིབ20ལྷག་རྩ་འཛུགས་བྱས་ནས་མགོ་བརྩམས་པ་དང་། རིགས་སོ་སོའི་གནད་དོན6ཐག་གཅོད་བྱས་ལ། ད་ལྟ་ཁྱོན་ཡོངས་དག་ཐེར་ཡོངས་འགྲུབ་བྱས་པར་མ་ཟད། རྫོང་ཡོངས་ཀྱི་མཁའ་དབུགས་སྤུས་ཀ་ལེགས་བསྒྱུར་བྱུང་ཚད99.6%ལ་སླེབས་པ་དང་། རིལ་རྡོག་ཕྲ་མོའི(PM2.5)ཆ་སྙོམས་གར་ཚད་ཝེ་ཁི∕རྒྱ་དཔངས་གྲུ་བཞི་མ15.5ལ་གྱུར་ཏེ་མཁའ་དབུགས་ཀྱི་སྤུས་ཀ་སྤྱིའི་ཆ་ནས་ཇེ་བཟང་དུ་གྱུར།

ཆུ་དྭངས་མོའི་སྲུང་སྐྱོབ་དམག་འཐབ་ལེགས་པོར་རྒྱག་པ་ནི་མི་དམངས་ལ་བདེ་སྐྱིད་བསྐྲུན་པའི་ཁ་ཚ་དགོས་གཏུགས་ཀྱི་བྱ་བ་ཞིག་ཡིན་ལ། སྐྱེ་ཁམས་དཔལ་ཡོན་འཛུགས་སྐྲུན་ལ་སྐུལ་འདེད་བྱེད་པའི་དགོས་ངེས་ཀྱི་བླང་བྱའང་ཡིན། ཆུ་བོ་དང་མཚེའུ་དཔོན་ལམ་ལུགས་བྱ་བ་སྔར་བས་མངོན་གསལ་དོད་པོའི་གོ་གནས་སུ་བཞག་སྟེ་ལེགས་འཛིན་བྱེད་པ་དང་། “བཅའ་ཁྲིམས་སྒྲིག་སྲོལ་དང་དངོས་ཐོག་བདེན་འཚོལ། ནུས་ཁུངས་རེར་སྲིད་ཇུས་རེ། ཧུར་ཐག་དང་བརྟན་བརླིང”བཅས་ཀྱི་རྩ་དོན་ལྟར། ཆུའི་ཐོན་ཁུངས་སྲུང་སྐྱོབ་དང་ཆུའི་སྦགས་བཙོག་འགོག་བཅོས། ཆུའི་ཁོར་ཡུག་ལེགས་བཅོས། ཆུའི་སྐྱེ་ཁམས་ཞིག་གསོ་སོགས་འགན་འཁྲི་གཙོ་བོ་དམ་འཛིན་བྱས། རྫོང་མཁར་གྱི་བཙོག་ཆུ་བཅོས་བསྒྱུར་བཟོ་གྲྭར་གཅིག་བསྡུས་ཁྲིམས་འཛིན་ཞིབ་བཤེར་ཐེངས10ལྷག་བྱས་པ་དང་། འབྲི་ཆུ་བཞུར་རྒྱུད་ཀྱི(སྨར་ཁོག་ཆུ་དང་རྡོ་ཁོག་ཆུ)འབུད་སྒོ33ལ་ཞིབ་བཤེར་བྱས་པར་མ་ཟད། གྲལ་བཤེར་གོ་རིམ་ཁྲོད་འབུད་སྒོ་ཁག་ཅིག་གི་མཐའ་འཁོར་དུ་འཚོ་བའི་གད་སྙིགས་ཡོད་པ་སོགས་གནད་དོན་ཤེས་རྟོགས་བྱུང་ལ། དུས་ཐོག་ཏུ་ས་གནས་ཀྱི་དོ་དམ་སྡེ་དག་ལ་མཐུན་སྦྱོར་བྱས་ཏེ་གཙང་ཕྱགས་བྱས་པས། ཆུ་བོ་དང་མཚེའུ་གཙོ་བོའི་སྐྱེ་ཁམས་བཀོལ་ཆུ་ལ་འགན་སྲུང་ནུས་ལྡན་ཐོབ་པ་དང་ཆུའི་སྐྱེ་ཁམས་སྤུས་ཀ་མངོན་གསལ་གྱིས་ཇེ་མཐོར་སོང་།

སྔོན་འགོག་གཙོ་བོ་དང་ཉེན་ཁ་ཚོད་འཛིན་དང་ས་ཆུ་མཉམ་བཅོས་བྱེད་པ་རྒྱུན་འཁྱོངས་དང་། ས་རྒྱུ་སྦགས་བཙོག་གི་འབྱུང་ཁུངས་འགོག་སྲུང་བྱས་ཏེ་འབྱུང་ཁུངས་ལ་ཚོད་འཛིན་བྱེད་པར་མགྱོགས་མྱུར་སྒོས་སྐུལ་འདེད་བྱས། འབྱུང་ཁུངས་མི་འདྲ་བར་དམིགས་ནས་རིགས་དབྱེ་ཇུས་བསྟར་བྱས། འཕར་ཚད་བཀག་འགོག་བྱས་ལ་གསོག་ཚད་ཇེ་ཉུང་དུ་བཏང་། འཕྲུལ་ཆས་ཆེན་མོ་ཞིག་གསོ་ས་ཚིགས་ཀྱི་ཉེན་ཁའི་སྙིགས་རོ་འཇོག་སའི་གནས་སྐབས་ཁང་པ་ཚད་ལྡན་དུ་འཛུགས་སྐྲུན་བྱེད་པའི་བྱ་བ་ཡོངས་འགྲུབ་བྱེད་པར་སྐུལ་འདེད་བྱེད་པ་དང་། འཕྲུལ་ཆས་འབྲིང་ཆུང་ཞིག་གསོ་ས་ཚིགས་ཀྱི་ཉེན་ཁའི་སྙིགས་རོ་གནས་སྐབས་སུ་འཕྲུལ་ཆས་ཆེན་མོ་ཞིག་གསོ་ས་ཚིགས་ཀྱི་ཉེན་ཁའི་སྙིགས་རོ་འཇོག་སའི་གནས་སྐབས་ཁང་པར་བཞག་པར་མ་ཟད། རྩིས་ཐོ་ཐོ་འགོད་དང་དོ་དམ་བྱ་བ་ལེགས་པོར་བསྒྲུབས། དུས་བཅད་ལྟར་སྣུམ་སྣོན་ས་ཚིགས་དང་གད་སྙིགས་སྦས་ར། བཤས་ར། བེད་མེད་དངོས་ཟོག་སྡུད་ཉོ་ས་ཚིགས་སོགས་སུ་ཞིབ་བཤེར་བྱས་པ་དང་། ཁེ་ལས་ཀྱིས་རང་བཤེར་སྙན་ཞུ་དངོས་འབེབས་བྱེད་པ། ཤེས་རྟོགས་བྱུང་བའི་གནད་དོན་དུས་ཐོག་དག་ཐེར་བྱེད་པར་སྐུལ་མ་གཏོང་བ་བཅས་ཀྱིས། ས་རྒྱུ་སྦགས་བཙོག་སོགས་ཁོར་ཡུག་གི་ཁྲིམས་འགལ་བྱ་སྤྱོད་མི་འབྱུང་བར་འགན་སྲུང་བྱས་ཏེ། ས་རྒྱུ་ཁོར་ཡུག་སྤུས་ཀ་ཏན་ཏིག་གིས་ལེགས་བསྒྱུར་དང་ས་རྒྱུ་ཁོར་ཡུག་ཉེན་ཁ་ནུས་ལྡན་སྒོས་འགོག་སྲུང་བྱས།།