འབའ་ཡུལ་རྫོང་རུ་རྟགས་མའི་བོད་ཀྱི་སྒྲ་སྙན་རྡུང་ལེན་འགྲན་སྡུར་སྐབས་བརྒྱད་པ་ཡོངས་སུ་མཇུག་བསྒྲིལ།
ཟླ7པའི་ཚེས26ཉིན་གྱི་སྔ་དྲོར། འབའ་ཐང་ལུ་གུའི་རྩེད་ཐང་དུ་ཕྱོགས་བཞི་མཚམས་བརྒྱད་ཀྱི་མགྲོན་པོ་ལྷ་ལས་བབས་པ་ལྟར་འདུས་ཤིང་། སྒྲ་སྙན་རྒྱུད་སྐུད་ཀྱི་དབྱངས་རྟ་སྙན་མོས་སྤང་ཐང་སྔོན་མོའི་རྩེ་ལ་དངོས་གྲུབ་ཀྱི་མུ་ཏིག་དྲངས་ཏེ། འབའ་ཡུལ་གཡང་གི་ར་བར་དགའ་སྟོན་གྱི་མཆོད་པ་འབུལ་བཞིན་འདུག དེ་ནི། འབའ་ཡུལ་རྫོང་རུ་རྟགས་མའི་བོད་ཀྱི་སྒྲ་སྙན་རྡུང་ལེན་འགྲན་སྡུར་སྐབས་བརྒྱད་པའི་མཇུག་མཐའི་རྟིང་རྩོད་དེ་ཡིན་འདུག
མཚོ་སྔོན་རྒྱང་སྒྲོག་བརྙན་འཕྲིན་ཁང་བོད་སྐད་རླུང་འཕྲིན་དང་ཨ་མདོ་བརྙན་འཕྲིན། མཚོ་སྔོན་བོད་སྐད་དྲ་ལམ་རྒྱང་སྒྲོག་བརྙན་འཕྲིན་ཁང་། ཐུན་ཏེ་རྫོང་ཨུ་དང་རྫོང་མི་དམངས་སྲིད་གཞུང་བཅས་ཀྱིས་མཉམ་འབྲེལ་སྒོས་སྒྲུབ་པའི་འབའ་ཡུལ་རྫོང་རུ་རྟགས་མའི་བོད་ཀྱི་སྒྲ་སྙན་རྡུང་ལེན་འགྲན་སྡུར་སྐབས་བརྒྱད་པའི་མཇུག་མཐའི་རྟིང་རྩོད་ནི། འབའ་ཡུལ་མཐོང་བ་ཀུན་སྨོན་གྱི་འབའ་ཐང་ལུ་གུའི་རྩེད་ཐང་ནས་སྤེལ་བ་ཡིན་ཞིང་། མཇུག་མཐའི་རྟིང་རྩོད་དུ་ཚུད་པའི་སྒྲ་སྙན་རྡུང་ལེན་པ་དྲུག་གིས་སྟོད་མངའ་རིས་སྐོར་གསུམ་ནས་སྨད་རྒྱལ་མོ་ཚ་བ་རོང་བར་གྱི་ཁྱད་འཕགས་ཀྱི་གཞས་དབྱངས་དང་རྒྱུད་སྐུད་དཀྲོལ་རྩལ། གར་གྱི་སྟངས་སྟབས་སོགས་རང་རང་ལ་འཇོན་ཞིང་། ཕུལ་དུ་བྱུང་བའི་སྲོལ་རྒྱུན་གྱི་རོལ་མོ་མོད་པོ་ཀུན་གྱི་ཐོས་འཛིན་རྣ་དང་། འདྲེན་བྱེད་མིག་གི་དགའ་སྟོན་དུ་ཕུལ་བར། འབའ་ཐང་ལུ་གུའི་རྩེད་ཐང་གི་ལྟད་མོ་བ་དག་དང་། དྲ་ལམ་གྱི་ཕྱོགས་སོ་སོ་ན་གནས་པའི་དྲ་དམངས་ཡོངས་དགའ་བའི་སྤུ་ལོང་རྒྱས་ཤིང་། སྤྲོ་བའི་ཐལ་མོ་བར་མེད་དུ་རྡེབ་སྟེ། དུས་རབས་གསར་བའི་སྐལ་བ་བཟང་པོ་ལ་སྐྱིད་ཀྱི་དགྱེས་སྟོན་ངོམས་མེད་དུ་རོལ་སོང་།
དཔྱད་འདེམ་པ།
སྡུར་སྒོ་རྒོད་ཅིང་བག་ཚ་ཞེད་པའི་འགྲན་སྡུར་ཐམས་ཅད་ལུ་གུའི་རྒྱུན་ལྟར་སྦྲེལ་ཞིང་། བློ་ལས་འགོངས་ཤིང་ཆོད་པར་དཀའ་བའི་འགྲན་སྡུར་གྱི་གོ་རིམ་ཅི་རིགས་ཡོངས་སུ་བརྒྱུད་མཐར། འགྲན་ཞུགས་པ་སྐལ་བཟང་རྣམ་གྲོལ་ལ་འབའ་ཡུལ་རྫོང་རུ་རྟགས་མའི་བོད་ཀྱི་སྒྲ་སྙན་རྡུང་ལེན་འགྲན་སྡུར་སྐབས་བརྒྱད་པའི་ཨང་དང་པོ་ཐོབ་ཅིང་། འགྲན་ཞུགས་པ་ཕུར་བུ་སྒྲོལ་མ་དང་ནོར་བུ་དབང་རྒྱལ་གཉིས་ལ་ཨང་གཉིས་པ་དང་། ཨ་མ་ལེ་རོལ་ཚོགས་དང་བུ་ཁྲིད། ཤེར་མཚོ་བཅས་ལ་ཨང་གསུམ་པ་ཐོབ།
ཕུལ་བྱུང་གི་སྲོལ་རྒྱུན་རིག་གནས་རྒྱུན་འཛིན་དར་སྤེལ་གཏོང་བ་ནི། སྨྱན་བྱད་ལས་ཁུངས་ཀྱི་ཕྲག་ཏུ་བབས་པའི་ཟློག་མེད་ཀྱི་འོས་འགན་ཡིན་ཞིང་། ཕུལ་བྱུང་གི་སྲོལ་རྒྱུན་རིག་གནས་རྒྱུན་འཛིན་དར་སྤེལ་གཏོང་བ་ནི། ཀྲུང་ཧྭའི་མཚར་སྡུག་རིག་གནས་ཀྱི་ལྡུམ་ར་ཆེན་པོ་ནས་རྣམ་པར་བཀྲ་བའི་མེ་ཏོག་རེ་རེ་སྲུང་སྐྱོབ་བྱས་ཏེ། དུས་རབས་གསར་བའི་འཇིག་རྟེན་ནས་སྣ་བརྒྱ་མཉམ་བཞད་ཀྱི་གནས་ལ་འབད་པ་དེ་ཡིན།
ཨང་དང་པོ་ཐོབ་མཁན། སྐལ་བཟང་རྣམ་གྲོལ།ཨང་གཉིས་པ་ཐོབ་མཁན། ནོར་བུ་དབང་རྒྱལ། ཕུར་བུ་སྒྲོལ་མ།ཨང་གསུམ་པ་ཐོབ་མཁན། ཨ་མ་ལེ་རོལ་ཚོགས། བུ་ཁྲིད། ཤེར་མཚོ།
ལྟད་མོ་བའི་ཚོགས།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注