བཏུང་བྱ་མངར་མོ་ནི་གཅིན་སྙི་ཟ་ཁུའི་ནད་ཀྱི་འབྱུང་རྐྱེན་རེད།

བཏུང་བྱ་མངར་མོ་ནི་གཅིན་སྙི་ཟ་ཁུའི་ནད་ཀྱི་འབྱུང་རྐྱེན་རེད།

མི་མང་པོ་ཞིག་གིས་གཅིན་སྙི་ཟ་ཁུའི་ནད་ནི་གཙོ་བོ་ཟ་མ་ཟ་བ་དང་། ཤ་རྒྱགས་པ། ལུས་པོ་སྦྱོང་བརྡར་མི་འདང་བ་བཅས་དང་འབྲེལ་བ་ཡོད་པར་འདོད་ཀྱིན་ཡོད་མོད། འོན་ཀྱང་རྒྱུན་དུ་རྒྱུ་རྐྱེན་གལ་ཆེན་ཞིག་སྣང་མེད་དུ་གཏོང་གིན་ཡོད་པ་དེ་ནི་མངར་ཆ་འདུས་པའི་བཏུང་བྱ་རེད། ཞིབ་འཇུག་ལས་ཤེས་རྟོགས་བྱུང་བ་ལྟར་ན། ང་ཚོས་བཏུང་བྱ་མངར་མོ་ཁམ་གང་འཐུང་ན་གཅིན་སྙི་ཟ་ཁུའི་ནད་འབྱུང་བའི་ཉེན་ཁ་ཆེ་རུ་འགྲོ་བཞིན་ཡོད་པས། ལུས་པོ་སྦྱོང་བརྡར་བྱས་ནའང་དེའི་གནོད་འཚེ་སེལ་ཐུབ་ཀྱིན་མེད།

བཏུང་བྱ་མངར་མོ་ཧ་ལམ་མི་འཐུང་མཁན་དང་བསྡུར་ན། ཉིན་རེར་མངར་ཆ་འདུས་པའི་བཏུང་བྱ་འཐུང་ན་གཅིན་སྙི་ཟ་ཁུའི་ནད་འབྱུང་བའི་ཉེན་ཁ41%མཐོ་རུ་འགྲོ་བ་དང་། ཉིན་རེར་མིས་བཟོས་མངར་རྫས་འདུས་པའི་བཏུང་བྱ་ཕོར་བ་གཉིས་སམ་དེའི་ཡན་འཐུང་ཚེ། གཅིན་སྙི་ཟ་ཁུའི་ནད་ཕོག་པའི་ཉེན་ཁ11%འཕར་སྲིད།

དེ་བས་གལ་ཆེ་བ་ཞིག་ནི། གཟའ་འཁོར་རེར་ཉུང་མཐའ་ཡང་སྐར་མ150ཡི་ཤུགས་ཚད་འབྲིང་མའི་ལུས་སྦྱོང་གི་ཚད་ལ་སླེབས་ཀྱང་། བཏུང་བྱ་མངར་མོའི་རིགས་ཀྱིས་ད་དུང་གཅིན་སྙི་ཟ་ཁུའི་ནད་ཕོག་པའི་ཉེན་ཁ་ཆེ་རུ་གཏོང་སྲིད། དེ་བས་ལུས་པོ་སྦྱོང་བརྡར་གྱིས་ཀྱང་བཏུང་བྱ་མངར་མོས་བཟོས་པའི་གནོད་འཚེ་ཡོངས་སུ་སེལ་མི་ཐུབ།

མིའི་ལུས་ཀྱི་བདེ་ཐང་དང་ཆེས་འཚམ་པའི་བཏུང་བྱ་ནི་ཚ་གྲང་རན་པའི་ཆུ་ཁོལ་ཡིན་པ་དང་། ཆུ་ཁོལ་ལ་མིའི་ལུས་ཁམས་ཀྱི་བྱེད་ནུས་སྙོམས་སྒྲིག་བྱེད་པའི་ནུས་པ་གལ་ཆེན་ལྡན་ཞིང་། ལུས་ཁམས་དོ་མཉམ་རྒྱུན་འཁྱོངས་དང་། རྙིང་ཚབ་གསར་བརྗེ་ལ་སྐུལ་འདེད། འཇུ་བྱེད་མ་ལག་གསོ་ཞིང་གཞང་འགག་སེལ་བ་སོགས་ཀྱི་ནུས་པ་ལྡན་པའི་ཁར། ཆུ་ཁོལ་ནང་དུ་བསྲེས་སྦྱོར་གྱི་རྫས་གང་ཡང་འདུས་མེད་ན། དེ་ནི་ཆེས་བདེ་འཇགས་ཀྱི་བཏུང་བྱ་ཡིན།

གཞན་ཡང་། རྒྱུན་དུ་ཇ་འཐུང་ནའང་ལུས་ཕུང་ལ་ཕན་པ་མང་པོ་ཡོད་དེ། ཞིབ་འཇུག་མང་པོ་ཞིག་ལས་མངོན་པར། རྒྱུན་དུ་ཇ་འཐུང་ན་འབྲས་སྐྲན་དང་། གཟའ་གྲིབ་ནད། ཁྲག་ཤེད་མཐོ་བའི་ནད། སྙིང་ཁམས་ཁྲག་རྩའི་ནད། གླེན་ནད། འཆི་བ་སོགས་ཀྱི་ཉེན་ཁ་ཇེ་ཆུང་དུ་གཏོང་ཐུབ་པས། ཉིན་རྒྱུན་ཇ་འོས་འཚམ་ཞིག་འཐུང་ན་བདེ་ཐང་ལ་ཕན་པ་ཆེའོ།