ལུས་པོར་ཁྲག་མ་འདང་ཚེ་མངོན་རྟགས་ཅི་འདྲ་ཡོད་དམ།

ཁྲག་ནི་མི་ལུས་ཀྱི་གྲུབ་ཆ་གལ་ཆེན་ཞིག་ཡིན་ཞིང་། དེས་ལུས་པོའི་འཚོ་བཅུད་དབོར་འདྲེན་གྱི་འགན་འཁུར་བཞིན་ཡོད། གལ་ཏེ་ལུས་པོར་ཁྲག་མ་འདང་ཚེ། མངོན་རྟགས་ཅི་འདྲ་ཡོད་དམ་ཞེ་ན།

གཅིག ཀླད་པར་ཁྲག་མ་འདང་བ།

འདི་ནི་ལོ་ལོན་དང་ལྷག་པར་དུ་དལ་གཤིས་ནད་རིགས་ཡོད་པའི་ནད་པ་ལ་འབྱུང་རྒྱུ་མང་བར་མ་ཟད། ཤ་རྒྱགས་པ་དང་ཐ་མག་འཐེན་པ་ལས་འཕར་རྩའི་ཁྲག་འབག་སྲ་འགྱུར་བྱེད་པའམ་ཚབས་ཆེར་འགྱུར་བ་དང་། སྐེ་ཚིགས་ནད་དང་སྐེ་ཚིགས་འཕར་རྩའམ་ཀླད་པའི་འཕར་རྩའི་ཁྲག་འབག་སྲ་འགྱུར་སོགས་ཀྱིས་ཀྱང་ཀླད་པར་ཁྲག་མི་འདང་བའི་གནས་ཚུལ་བསྐྱེད་པ་ཡིན། གལ་ཏེ། ལུས་པོའི་གཞོགས་གང་ཞིག་ལ་ཚོད་འཛིན་དཀའ་བ་དང་རྐང་ལག་ལ་ཤུགས་མེད་པ། སྐད་ཆ་བཤད་དཀའ་བ། མགོ་ཡུ་འཁོར་བ། མཐོང་ནུས་ཇེ་ཞན་དུ་འགྲོ་བ། རྣམ་རིག་མི་གསལ་བ། ཐ་ན་བརྒྱལ་བ་སོགས་བྱུང་ན། འཕྲལ་མར་སྨན་པ་ལ་སྟོན་དགོས།

གཉིས། སྙིང་ཤར་ཁྲག་མ་འདང་བ།

བདེ་ལྷོད་ངང་ཡོད་སྐབས། སྙིང་ཤའི་ཁྲག་དབྱང་བསྡུ་ལེན་ཚད70%ཡིན། གལ་ཏེ། སྙིང་ཤར་མཁོ་བའི་ཁྲག་དང་དབྱང་རླུང་། ནུས་ཚད་བཅས་ཀྱི་དོ་མཉམ་ཤོར་བ་ཡིན་ན། དེ་མ་ཉིད་དུ་སྙིང་ཤར་ཁྲག་མི་འདང་བའི་གནས་ཚུལ་འབྱུང་། འདི་ནི་རྟག་པར་རྒྱུ་རྐྱེན་སྣ་ཚོགས་ཀྱིས་བསྐྱེད་པ་སྟེ། དཔེར་ན། ཁྲག་ཤེད་དམའ་བ་དང་སྙིང་གི་འདབ་སྐྱི་ནད། སྙིང་ཤའི་ནད་སོགས་ལྟ་བུའོ། མངོན་རྟགས་ལ་རྒྱུན་དུ་དབུགས་ཧལ་བ་དང་སེམས་འཚབ་པ། བྲང་ཁ་ན་བ་སོགས་ཡོད།

གསུམ། སྙིང་ལ་ཁྲག་མ་འདང་བ།

འདི་ནི་མང་ཆེ་བ་སྙིང་གི་མདུན་ཁུལ་དང་བྲང་རྒྱབ་རུས་པའི་གནས་སོགས་སུ་འབྱུང་ཞིང་། དེའི་རྒྱུ་རྐྱེན་ཅུང་རྙོག་འཛིང་ཆེ་བ་སྟེ། དཔེར་ན། བྲང་ཁ་ན་བ་གཙོས་པའི་སྙིང་གི་ལྡིང་ཚད་རྒྱུན་ལྡན་མིན་པ་དང་། ཚབས་ཆེ་དུས་སྙིང་ལ་ཁྲག་མཁོ་འདོན་མི་འདང་བའི་གནས་ཚུལ་འབྱུང་། གཞན་ད་དུང་ཁོག་སྟོད་ན་བ་དང་སྐྱུག་པ། ཞེ་མེར་བ་སོགས་ཕོ་རྒྱུ་ནད་རིགས་ཀྱི་ནད་རྟགས་བྱུང་ནའང་ནད་འདི་དང་འབྲེལ་བ་ཡོད། མཉམ་འཇོག་བྱ་དགོས་པ་ཞིག་ལ། འདི་ཉིད་དོས་དྲག་ཕོ་རྒྱུའི་གཉན་ཚད་དང་མཁྲིས་པའི་གཉན་ཚད་སོགས་ཀྱི་ནད་རྟགས་དང་ནོར་ཉེན་ཆེ་བས། དགོས་ངེས་ཡོད་དུས་སྨན་ཁང་དུ་ཕྱིན་ནས་བརྟག་དཔྱད་བྱ་དགོས།

བཞི། ཟུངས་ཁྲག་ཉམས་པ།

འདི་ནི་ཕྱི་འཁོར་ཁྲག་དམར་ཕྲ་ཕུང་གི་ཤོང་ཚད་རྒྱུན་ལྡན་གྲངས་ཐང་ལས་དམའ་བའི་ནད་ཐོག་ཕྱོགས་བསྡུས་ནད་རྟགས་ཤིག་ཡིན་ལ། ནད་པར་རྒྱུན་དུ་ཤུགས་མེད་པ་དང་ཡི་མུག་པ། ཁྲོ་སླ་བ། གྲང་ངར་མི་ཐེག་པ། མགོ་ཡུ་འཁོར་བ། ཐ་ན་བརྒྱལ་བ་སོགས་འབྱུང་། སྤྱིར་བཏང་དུ། ཁྲག་གི་རྒྱུན་སྲོལ་བརྟག་དཔྱད་བྱས་ན་ནད་རྟགས་ངོས་འཛིན་བྱེད་ཐུབ།