ངས་བྲིས་པ་ཡོད་ཚད།

ཤོག་དཀར་ངོས་སུ།

བྱིས་པའི་ལང་ཚོ་བྲིས།

ངུ་ངག་གི་དབྱངས་རྟ་བྲིས།

ས་རྡོ་ཡི་རྩེད་ར་བྲིས།

ཨ་ཕ་ཡི་སྙིང་གཏམ་བྲིས།

ཨ་མ་ཡི་བྱམས་བརྩེ་བྲིས།

སྐྱིད་ལ་ཉལ་བའི་དབྱར་ཁ་བྲིས།

མདོར་ན།ཆུང་དུས་ཀྱི་སྣང་བ་ཡོད་ཚད་བྲིས།

གྱང་ངོས་སུ།

སྟག་ཤར་གྱི་ཕོ་ཉམས་བྲིས།

བརྩེ་དུང་གི་མཚོ་མོ་བྲིས།

སྙིང་གྲོགས་ཀྱི་སྙན་ངག་བྲིས།

གཤོག་ཐོགས་ཀྱི་ཕུགས་འདུན་བྲིས།

མེས་པོ་ཡི་རུས་རྐང་བྲིས།

ཕ་སྐད་ཀྱི་ལས་དབང་བྲིས།

མི་ཁ་ལྷགས་རླུང་གི་དགུན་ཁ་བྲིས།

མདོར་ན།　སྟག་ཤར་སྣང་མཐོ་ཡི་ཚོར་བ་རབ་རིབ་བྲིས།

རྡོ་རིང་ངོས་སུ།

ལོ་ཟླའི་གོ་རིམ་བྲིས།

གྲིབ་གཟུགས་ཀྱི་གཟི་འོད་བྲིས།

ཐོད་པ་ཡི་རྒས་གཉེར་བྲིས།

འབྲུ་དྲུག་གི་དབྱངས་རྟ་བྲིས།

སྟོན་རླུང་གིས་ཁྱེར་བའི་ན་ཟུག་བྲིས།

མདོར་ན།　སྐྲ་དཀར་དང་འདྲེས་པའི་ལ་ཁའི་ཉི་འོད་བྲིས།

ཀྱ་ཀྱོག་གི་ལམ་ངོས་སུ།

དགའ་སྐྱོ་འདྲེས་མའི་རྨི་ལམ་བྲིས།

ཟིང་ཟིང་གི་འཇིག་རྟེན་བྲིས།

འཛུམ་དཀར་གྱི་ལྷ་མོ་བྲིས།

དཔྱིད་དཔལ་དང་མཉམ་དུ་མེ་ཏོག་བྲིས།

མདོར་ན།　ཚོར་བ་མག་མོག་གི་འགན་འཁྲི་བྲིས། །