༄༅། །དབྱངས་ཅན་མ། འཇུ་སྐལ་བཟང་།

ཡོང་ཁུངས། མཚོ་སྔོན་པོ་དྲ་བ། རྩོམ་སྒྲིག་པ། གུ་རུ་སྐྱབས། 2025-03-18 16:11:34 ཀློག་གྲངས།1888

རྩོམ་པ་པོ།：འཇུ་སྐལ་བཟང་།

སྲིད་ན་སྙན་རྒུའི་སྒྲ་དབྱངས་རླབས་ཀྱིས་རང་ཚུགས་འདར་བ་ཆུ་ཡི་ལྟོར། །
ཚངས་ཆེན་ཆགས་པའི་འཛུམ་གྱིས་ཉེར་བསྲུབས་མཚར་སྡུག་གཟུགས་སུ་བསླངས་པ་མོའི། །
དཀའ་ཐུབ་བརྟན་པོ་རྨང་ནས་གཞིག་བྱེད་ལྟ་སྟངས་ཡོན་པོའི་ཀྱོ་བ་དེས། །
སྔ་ན་མ་བཏང་དེང་ཡང་མི་གཏོང་སྐལ་ལྡན་སྙིང་གི་འདབ་མར་ཟུངས། །

བདག་པོས་བསྐྱེད་ཀྱང་བདག་ཏུ་མ་དབང་ངག་རིག་རི་བོའི་སུལ་ལ་ཤོར། །
དྲི་ཟའི་ཆུང་མས་དྲི་ཟའི་ཁྱད་ནོར་རིན་ཆེན་རྒྱུད་མང་བརྐུས་ཏེ་བྲོས། །
ལྷ་ཡི་ན་ཆུང་ལྷ་ཡི་ལོངས་ལས་ཆགས་བྲལ་བླངས་པའི་མིག་ཡངས་མ། །
ངག་དབང་དགའ་མའི་ངག་གི་ཟུར་མིག་མི་ཡི་ཞིང་ལ་ཕྱོགས་སུ་ལྷུང་། །

རྣ་བའི་གདུབ་གོར་འཛུམ་པའི་རྩེ་དགས་སྣང་བའི་རྦ་རླབས་འཐུང་མིན་ན། །
རོ་ལྡན་དགོད་པའི་ལྕེ་ཞགས་རིང་བོར་སྲིད་པའི་ཤེ་མུན་ཀྱ་ཀྱུར་འཕྱང་། །
མགྲིན་པའི་མཛའ་བོ་མྱོས་པའི་གླུ་ཡིས་བརྟན་གཡོའི་ལུས་སྐྱེས་མི་སློང་ན། །
ཤེལ་གྱི་བྲག་ལ་མེ་ཏོག་བཞད་པས་བུང་བའི་མཚོན་དག་དུམ་བུར་འཕེན། །

དམར་བའི་སོར་ཕྲེང་འདར་ལྡན་གཡོ་བ་མཆུ་ཡི་འདབ་མ་སྐྱོད་པ་ཡིས། །
རྒྱུད་མངས་ལྟོ་བ་ཉུག་པའི་རྩེད་འཇོས་ག་ག་ཚིལ་གྱི་གཡའ་བསླངས་པས། །
སྣ་ཚོགས་ངག་ཏུ་འཁྲོལ་བའི་རོལ་མོས་ཁོར་ཡུག་སྲིད་པའི་མྱ་ངན་ལྕིད། །
གནག་པའི་ར་རི་རྐང་བ་མ་ཚུགས་ཟླ་བཞིན་དག་པའི་མཐའ་ལ་དེད། །

རིག་བྱེད་དཀྱིལ་འཁོར་བཟླུམས་པའི་ཞལ་ལས་ཅུང་ཟད་འཛུམ་པའི་ཟུར་མིག་མདའ། །
འཁྱུག་པའི་གར་གྱིས་སྙིང་ལ་ཟིན་གྱུར་པཎ་གྲུབ་བྱེ་བ་མྱོས་པའི་གླུས། །
ས་རྡོའི་ཞིང་ལ་དྲི་ཟའི་འཇིག་རྟེན་བརྩེགས་མར་བཀོད་པའི་ངོ་མཚར་དབྱངས། །
ཡོངས་སུ་ཉན་འདོད་མཁར་ཉལ་དབྱིངས་སུ་གསེར་མངལ་རྣ་བ་ཆ་བཞིར་སྤེལ། །

བ་སྤུའི་ཚལ་ལ་བསིལ་བའི་རླུང་གིས་གཡེར་བག་བྱིན་པའི་གྲང་ཤུམ་གྱིས། །
རང་བྱུང་དབྱངས་ཀྱི་མགྲིན་པ་དག་ཏུ་འཕྲེད་ལ་ཉལ་བའི་མུ་ཅོར་དེས། །
ཟླ་ཤེལ་བྱེ་མ་སྤུངས་པའི་ལྗོངས་སུ་དབྱངས་ལྡན་ཁ་ཡི་བསུང་ལྡན་པ། །
ཕུག་ཏུ་འཁྱིལ་ཞིང་གཤོང་དུ་འབབ་པའི་རིན་ཆེན་གསུམ་པའི་ཀླུང་ཆེན་ལུད། །

ད་དུང་འཁྲིལ་བག་ཆགས་པའི་ཕྱག་གིས་བོད་ཕྲུག་མགྲིན་པའི་རྒྱུད་མངས་ལུས། །
ཡང་དག་འཁྱུད་བཞིན་དམར་བའི་མཆུ་སྒྲོས་བྱུ་རུའི་བུམ་བཟང་འཛུམ་པ་ལས། །
སྨིན་བྱེད་རོ་བརྒྱ་རྫོགས་པའི་རྒྱུན་གྱིས་བདེ་ཆེན་ང་རོའི་གདངས་སྙན་པོས། །
གངས་ལྡན་ནགས་མའི་ཁོར་ཡུག་ཡངས་པོར་རིག་བྱེད་གླུ་ཡི་རླབས་ཕྲེང་སྒྱུར། །

རྩོམ་གོང་མ། > ལྡོང་ཆུ་ཤེལ་གྱི་སྙན་ངག