ཀློག་པ་པོ།
རླུང་བུ། མཚོ་ལྷོ།
ཁ་རོག་གེར་སྙན་ངག་འདི་འབྲི་དུས་དུས་ཚོད་ཀྱི་ནང་དུ་ཡོད།
ཁ་རོག་གེར་སྙན་ངག་འདི་ཀློག་དུས་དུས་ཚོད་ཀྱི་ཕྱི་རུ་ཡོད།
ནམ་མཁའི་ཁ་དོག་དང་དཔངས་ཡངས་པའི་ས་གཞིའི་རྒྱ་ཁྱོན་ལས།
རང་ཉིད་ཀྱིས་རང་ཉིད་བོར་ཞིང་འཇིག་རྟེན་འདི་དར་ཅིག་ལ་བརྗེད་དུ་འཇུག་ངེས་ཤིང་།
ངའི་ལག་པ་འདིས།
སྟོང་བར་གྱུར་བའི་ལག་པ་འདིས་བར་སྣང་སྟོང་བར་སྤྲིན་པ་ཞིག་ཀྱང་འབྲི་མ་ཐུབ།
ངའི་མིག་ཟུང་འདིས།
རང་ཉིད་ཀྱི་སྙན་ངག་ཀློག་པར་བསྒུགས།
ངས་སྙན་ངག་འབྲི་ཤེས་པ་ནས་ཟུངས་ཁྲག་གི་རི་སྒང་བརྟོལ་དགོས་བྱུང་།
རི་སྒང་ན་བཞད་པའི་མེ་ཏོག་དག་ངའི་སྙན་ངག་ཏུ་གྲུབ།
སྤྲིན་གསེབ་ནས་འཇོ་བའི་ཆར་ཐིགས་རེ་རེ་ངའི་སྙན་ངག་ཏུ་གྲུབ།
ཀློག་པ་པོ། ཁྱེད་ཀྱིས་ཡི་གེ་ཀློག་ཤེས་པ་ནས་ངའི་སྙན་ངག་འདི་བཀླག་མི་སྲིད་ལ།
བཀླག་དགོས་པའི་རྒྱུ་མཚན་ཡང་མེད།
ཁྱེད་ཀྱིས་ཡི་གེ་བཀླག་མི་ཤེས་དུས་སྤྲིན་པ་ལ་བལྟ་ཤེས་ཤིང་།
ཁྱེད་རང་ལང་ཚོ་རྒྱས་ཏེ་དར་ལ་བབས་དུས།
སྤྲིན་པར་བལྟས་ཏེ་སྙན་ངག་འདི་དྲན་སྲིད།
ནམ་མཁའི་ངོས་སུ་སྤྲིན་པ་ལྟར་བྲིས་པའི་སྙན་ངག་འདི་དྲན་སྲིད།
ཁྱེད་ཀྱིས་ཡི་གེ་ཀློག་ཤེས་ཤིང་ས་ཆེན་གྱི་གཞི་རུ་གོམ་པ་བོར་དུས།
ངའི་སྙན་ངག་འདི་ནག་ཐིག་གི་བསྡུས་བརྗོད་ཅིག་ཡིན་པ་ཤེས་ངེས།
ཁྱོད་ཀྱིས་རང་གི་བྱིས་དུས་དྲན་ཡང་ཆོག
ཀློག་པ་པོ། ཁྱེད་ཀྱིས་ཡི་གེ་ཀློག་ཤེས་པ་ནས།
ངའི་སྙན་ངག་འདི་བཀླག་མི་སྲིད་ལ།
ཁྱེད་ཀྱིས་ཡི་གེའི་ནང་གི་ཡུལ་ལྗོངས་རྙེད་དུས་ཀྱང་སྙན་ངག་འདི་བཀླག་མི་སྲིད།
རུས་པ་དང་རྣམ་ཤེས་ཀྱི་ཧྲག་བར་ནས་འཐོར་བའི་རོལ་དབྱངས་རྙེད་དུས་སྙན་ངག་འདི་བཀླག་མི་སྲིད།
ནམ་ཞིག་ཆར་བ་འབབ་དུས་སུ་སྙན་ངག་འདི་བཀླག་སྲིད་ན།
ཆར་བ་མ་བབས་པའི་ཡར་སྔོན་གྱི་སྤྲིན་པ་ནི་ཤོག་བུ་སྟོང་བ་ཞིག་ཏུ་ངོས་འཛིན་རོགས།
ཆར་ཐིགས་རེ་རེ་ཡི་གེ་རེ་རེ་རུ་ངོས་འཛིན་རོགས།
སྤྲིན་པ་ལས་ཆར་བ་འཇོ་ཞིང་སིམ་སིམ་དུ་བབས་པའི་ཆར་བ་ས་གཞིའི་སྟེང་འཐིམས་ངེས།
སྐྱེ་བོ་དག་གིས་ཆར་བ་ནི་ལན་རེར་སྤྲོ་སྣང་བསུབས་བྱེད་དུ་བརྩི་ལ་ལན་རེར་གདུང་བ་མཆོད་བྱེད་དུ་བརྩི།
ཆར་བ་དང་ཡི་གེ མེ་ཏོག་དང་ཡི་གེ
ས་རྡུལ་བཞིན་ཡར་བར་སྣང་དུ་འཕྱོ་ངེས།
ཆར་བས་ཁྱེད་ཀྱི་ངོ་གདོང་ལ་བྲན་ཏེ་སྙན་ངག་འདི་སྐད་ཅིག་ཉིད་ལ་བརྗེད་དུ་འཇུག་ངེས་ཀྱང་།
ཁྱེད་ཀྱི་གཡས་ཕྱོགས་ནི་ཆར་བའི་སྒྲ་དབྱངས་དང་གཡོན་ཕྱོགས་ནི་ཡི་གེའི་སྐད་སྒྲའོ། །
ཀློག་པ་པོ ཆར་བའི་ཡོངས་སུ་བརླན་པར་བཟོས་པའམ་ཤོག་བུ་བཞིན་ཐེད་པར་རྩོམ་དུས།
ཁེར་རྐྱང་གི་མིག་ཟུང་སྤྱད་དེ་མཐོང་བའི་ཡི་གེ་དེ་དག
ནག་ཐིག་ཏུ་གྱུར་ཏེ་མི་སྣང་བར་འགྱུར་ངེས།
སྐྱ་ཐག་ཆོད་པའི་ས་གཞིའི་སྟེང་སྤྲིན་པ་སྔར་བཞིན་རྒྱུ་ངེས་ཤིང་།
རྒྱུ་སྐར་དང་འཇའ་ཚོན་སྔར་བཞིན་འཆར་ངེས།
ཡིན་ནའང་།
ཡི་གེ་དག་ས་གཞིའི་སྟེང་གི་བརླན་གཤེར་ལ་འདྲེས་ཏེ་ནག་ཐིག་ཏུ་གྱུར་ནས་ཁྱེད་ཀྱི་རྗེས་སུ་ཞུགས་པར་བྱེད།
མུན་པའི་ནང་ནས་མེ་ཏོག་དཀར་པོ་དག་ཚོམ་བུ་ཚོམ་བུར་བཞད།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注