ཁྱེད་གཉིས་མེད་པའི་འཇིག་རྟེན་ན། ང་ནམ་ཡང་ཁེར་རྐྱང་ཡིན། ཉང་བརྩོན་འགྲུས།

ཡོང་ཁུངས། བོད་ཀྱི་གྱེར་འདོན་སྤྱི་སྟེགས་ཆེན་མོ། རྩོམ་སྒྲིག་པ། ཀླུ་མགོན་རྒྱལ། 2024-08-12 15:15:50 ཀློག་གྲངས།2731

ཁྱེད་གཉིས་མེད་པའི་འཇིག་རྟེན་ན། ང་ནམ་ཡང་ཁེར་རྐྱང་ཡིན།

ཉང་བརྩོན་འགྲུས།

ང་ཡོད་སའི་གནས་རི་འདི་ནི།

ངའི་སྐྱེས་ལྷའི་གནས་རི་བྱིན་ཅན་ཡིན།

ངའི་ཐོག་མའི་ལྟེ་ཁྲག་ས་ལ་གཏོར་དུས།

ངའི་ཨ་ཕས་ལྷ་བསང་གཏོང་སའི་གནས་རི་ཡང་འདི་ཉིད་ཡིན།

ཕར་ཁའི་སྤང་ཁུགས་འདི་ནི།

ངའི་ཨ་མས་འབྲི་མོ་བཞོ་སའི་མཚེར་ཤུལ་ཡིན།

ངས་སྐྱེ་བའི་ངུ་སྐད་ཐོག་མ་སྒྲོག་དུས།

ངའི་ཨ་མས་ང་ལ་ནུ་ཞོ་བསྣུན་སའི་གནས་གཞི་ཡང་འདི་ཉིད་ཡིན།

ཕྱེ་རྩམ་ཟ་རྒྱུ་མེད་པའི་ཁོར་ཡུག་ནས།

ངའི་ཨ་མས་སློག་ཧྲུལ་གྱོན་ནས།

ང་རང་གཅེས་པར་བསྐྱངས།

ཁ་ཆར་བུ་ཡུག་འཚུབ་པའི་དུས་བབས་ཁྲོད།

ངའི་ཨ་ཕས་སྡོད་སའི་གནས་གཞི་མེད་པར།

ང་རང་གཅེས་པར་བསྐྱངས།

མནར་སོན་པའི་ལོ་ཟླའི་གོ་རིམ་ནང་།

ངའི་ཨ་ཕས་ང་རང་བླ་མའི་གམ་དུ་ཁྲིད་དེ།

ཐོས་བསམ་བྱེད་པར་རྟིང་སྐུལ་མཛད།

ངའི་ཨ་མས་ཉིན་མཚན་དུས་དྲུག་མེད་པར།

ང་ལ་བསྐོར་བ་བརྒྱབ་ཏེ་བདག་སྐྱོང་གནང་།

ཨ་ཕས་ང་ཡུལ་ལ་ལོག་ཐེངས་རེ་རེར།

ངོ་གདོང་འཛུམ་གྱིས་ཁེངས་ཏེ་བསུ་མ་མཛད།

ཨ་མས་ང་གཞན་ཡུལ་འགྲིམ་ཐེངས་རེ་རེར།

སེམས་པ་སྡུག་གིས་མནར་བཞིན་མིག་ཆུས་སྐྱེལ་མ་བྱས།

ང་ཨ་ཕའི་ཡ་སྟོད་ཀྱི་མིག་དང་།

ང་ཨ་མའི་ཡ་ཁོག་གི་སྙིང་ཡིན།

སྙིང་གསོན་པོ་དེ་ཡིན།

ཁྱེད་གཉིས་གཤེགས་ཤུལ་ན།

ང་ལ་དགའ་བའི་བསུ་མ་མཛད་མཁན་དང་།

མིག་ཆུས་སྐྱེལ་མ་གནང་མཁན་ཞིག་གང་ན་ཡོད།

ཁྱེད་གཉིས་གཤེགས་ཤུལ་ཏུ།

དཀོན་མཆོག་གིས་ང་ལ།

བཟའ་ཟླ་དང་བུ་ཕྲུག་སོགས་ཅི་ཡང་གནང་བྱུང་མོད།

ཁྱེད་གཉིས་མེད་པའི་འཇིག་རྟེན་ན།

ང་ནམ་ཡང་ཁེར་རྐྱང་ཡིན།

རིག་གཞུང་གང་ཞིག་ལ་སྦྱང་བ་བྱས་ཏེ།

ཤེས་རབ་ཀྱི་སྣང་བ་ཅུང་ཟད་ཐོབ་པའི་ཚེ་ནོམ་འདི་ཡང་།

ཞིབ་ཏུ་བསམ་ཚེ།

ཁྱེད་གཉིས་ཀྱིས་ང་ལ་གནང་བའི་མི་ཚེའི་ནོར་བུ་ཡིན།

ཨ་ཕ། ཨ་མ། ངའི་ངོ་གདོང་གཉེར་མས་གཡོགས།

སྐྲ་འདབ་དཀར་པོ་གྱུར་ཚེ།

ངས་ལྷག་ཏུ་ཁྱེད་གཉིས་དྲན་གྱིན་འདུག

བཀའ་དྲིན་འཁོར་མཐའ་མེད་པའི་ངའི་འདས་སོང་གི་ཕ་ལོ།

སྐུ་དྲིན་གཞལ་མཐའ་བྲལ་བའི་ངའི་འདས་སོང་གི་མ་ལོ།

ཁྱེད་གཉིས་ད་ལྟ་གང་དུ་བཞུགས།

ཁྱེད་གཉིས་ཀྱིས་སྐུ་རུས་ས་ལ་མ་འཐོར་བར་དུ།

བུ་ངའི་ཆེད་དུ་འཇིག་རྟེན་འདིར་བརྗོད་ཀྱིས་མི་ལངས་པའི།

དཀའ་སྡུག་ཅི་འདྲའི་མང་བོ་ཅིག་སྤྱད་ཡོད་ཨང་།

ལུགས་གཉིས་གང་གི་ལམ་དུའང་མ་ཚུད་པའི་བུ་རུལ་ངས།

ཁྱེད་གཉིས་གསོན་པའི་གནས་སྐབས་སུ།

ཞབས་ཏོག་ཅི་ཡང་མ་ནུས་ཤིང་།

ཁྱེད་གཉིས་གཤེགས་པའི་ཚེ་ནའང་།

དགེ་སྒྲུབ་ཅི་ཡང་མ་འབྱོན་མོད།

ཡ་ང་སྙིང་རྗེ་མེད་པའི་འཆི་བདག་གི་རླུང་ཁ་ནས།

བསླུ་མེད་ལས་འབྲས་ཟབ་མོའི་བདེན་ལུགས་ཀྱི་སོ་ཁ་ནས།

ངས་ནམ་ཡང་ཁྱེད་གཉིས་བརྗེད་པ་མེད།

ཨ་ཕ། ཨ་མ། སྐྱ་ཐང་ཐང་གི་འཇིག་རྟེན་ནས།

ངས་ངོ་གདོང་མཆི་མས་བརླན་ཏེ།

ཁྱེད་གཉིས་རྗེས་དྲན་བྱེད་ན་འདོད།

གྲང་ཤུར་ཤུར་གྱི་འཇིག་རྟེན་ནས།

ངས་སྐྱོ་བའི་སྨྲེ་ངག་འདོན་བཞིན།

ཁྱེད་གཉིས་རྗེས་དྲན་བྱེད་ན་འདོད།

རི་གསུམ་གྱི་རྩེ་ནས་དྲན་གདུང་རླུང་གིས་བསྐྱོད་དུས།

ཁྱེད་གཉིས་རྗེས་དྲན་བྱེད།

ལུང་གསུམ་གྱི་མདོ་ནས་ལུས་སེམས་བཙག་གིས་བསྡམས་དུས།

ཁྱེད་གཉིས་རྗེས་དྲན་བྱེད།

ཨ་ཕ་་་་་་་་་་་་

ཨ་མ་་་་་་་་་་་་

ཁྱེད་གཉིས་མེད་པའི་འཇིག་རྟེན་ན།

ང་ནམ་ཡང་ཁེར་རྐྱང་ཡིན།

རྩོམ་གོང་མ། > ཕ་ཡུལ་དུ་བྱོན་དུས། ཆོས་འབྱོར་རྒྱ་མཚོ།
རྩོམ་གཞུག་མ། > རྣང་ཞིང་གྲུ་བཞི། གླིང་ཚ་སྙིང་རྒྱལ་འབུམ།

དུ་བ་གནམ་ཐོན་ཡོད་ས་ཚང་མར་འཕྲིན་གཏོང་ལྕགས་སྒྲོམ་ཡོད།

《ཀྲུང་གོའི་ས་རྒྱུའི་བཅད་ཁའི་གྲངས་གཞི་ཕྱོགས་བསྒྲིགས》ཡོངས་བསྒྲགས་བྱས་པ།

སྐྱེ་ཁམས་ཤེས་དཔལ་སྒྲིག་གཞི་སྒྱུར་བཅོས་ཐད“མཚོ་སྔོན་གྱི་མ་དཔེ”བཏོན་པ།

བོད་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཏང་ཙུའི་དེ་སྔའི་ཁོངས་མི་དང་ཀྲུའུ་རེན་གཞོན་པ་ཅི་གོ་ཀང་གིས་ལྐོག་རྔན་བླངས་པ་དང་གཞུང་ཁོངས་ཀུང་སིའི་མི་སྣས་འགན་དབང་གང་བྱུང་དུ་སྤྱད་པའི་གྱོད་གཞིའི་འདྲི་གཅོད་དང་པོའི་བཅད་ཁྲ་ཁྱབ་བསྒྲགས་བྱས་པ།