ཧི་མ་ལ་ཡའི་མཐོ་ཚད། འཇུ་སྐལ་བཟང།

ཡོང་ཁུངས། བོད་ཀྱི་གྱེར་འདོན་སྤྱི་སྟེགས་ཆེན་མོ། རྩོམ་སྒྲིག་པ། ཀླུ་མགོན་རྒྱལ། 2024-08-08 15:03:52 ཀློག་གྲངས།2901

ཧི་མ་ལ་ཡའི་མཐོ་ཚད།

འཇུ་སྐལ་བཟང།

སྔ་ས་ཞིག་ནས་ཁྱོད་རང་།

ཨ་ཕའི་འུར་ཆ་ཡིས་མི་སླེབས་ས།

ཨ་མའི་བཞོ་དབྱངས་མི་ཐོས་ས།

ནུ་མོའི་རྟོག་འཆར་གྱིས་མི་འདང་ཞིག་ཏུ་ཕྱིན།

རྔུལ་ནག་གཏོར་བའི་ལམ་བུ་ཕྲ་མོ་དེ།

ཁུགས་པ་བརྒྱ་ཕྲག་ཏུ་འཁྱུག་པའི་ཡས་སྣེ་ན།

དེ་རིང་ཁྱོད་ཉིད་མེ་ཏོག་དམར་པོ་ཞིག་ཏུ་བཞད།

མཐོ་ཚད་ཧི་མ་ལ་ཡ་དང་གཅིག་པ་རེད།

དེ་ཉིན་གསེར་གྱི་གཟེངས་རྟགས་ལེན་གནས་ཀྱི།

སྐས་རིམ་མཐོ་ཤོས་དེར་ཕབ་པའི་རྐང་རྗེས་དེ།

མཚོ་སྔོན་པོའི་གཡོན་འགྲམ་གྱི་བྱེ་འདམ་ལ་དོད་པའི།

རྐང་རྗེས་ཆུང་ངུ་དེ་ནར་སོན་པ་རེད་ཟེར།

ངོ་མ་ཡིན་འདུག རྐང་རྗེས་དེ།

འཛམ་གླིང་འདི་གའི་ཆེས་མཐོ་བའི་རྐང་རྗེས་དེ་རེད།

མཐོ་ཚད་ཧི་མ་ལ་ཡ་དང་གཅིག་པ་རེད།

ཁྱོད་གཅིག་པུ་ལ་ཐོབ་པ་མ་ཡིན་པའི་ཁེངས་པ་དང་ངོ་སོ་དེ།

ཡང་རྩེ་དེ་ནས་ཁྱོད་གཅིག་པུས་བཏོགས་འོང་ཉིན།

མཁུར་ཚོས་དམར་པོ་ཅན་དག་གི་སོ་འཛུམ་གྱི་འོ་མ་དེ།

སེམས་ཁ་འཕར་བའི་ཚ་དྲོད་ཀྱིས་མཆུ་ཁུད་ན་ལྷོག་ལྷོག་ཁོལ་མོད།

སྒལ་གཞུང་ན་བརླན་ནས་བསྐམ་བསྐམས་ནས་བརླན་པའི་རྔུལ་ནག

ལྷུ་ཚིགས་ན་ཁོལ་ནས་ཡལ་ཡལ་ནས་ཁོལ་བའི་རུས་ཟུག

རྐང་མཐིལ་ན་བརྡོལ་ནས་རལ་རལ་ནས་བརྡོལ་བའི་ཆུ་ཐུམ།

ཁ་སྐྱུར་དུ་མ་ཁྱོད་གཅིག་པུས་བཏུང་ཉིན་དེ་ཚོའམ་ང་ཚོ་གང་དུ་ཡོད།

ད་དུང་གོམས་གཤིས་དང་གོམས་གཤིས་ཐོང་ཁ་ཕྲད་པ་ལས།

ཚིགས་འཆུས་བྱུང་ཉིན།

མིག་ཟུར་གྱི་རྣོ་སོར་བྱོལ་བ་ལས་སྐྱི་པགས་བཤུད་ཉིན།

བརྡ་སྤྲོད་ཀྱི་བར་ཁྱད་ལ་མཆོང་འགོམ་གྱིས་བཟོས་པའི་འདྲེད་ཤུལ།

ཁ་ཆར་འཁྱག་པོས་ཡུན་གྱིས་གསུབ་ཉིན།

རྨ་ཁ་དང་སྐྱི་ཤུ་ཡོད་ཚད་ལ།

གཟབ་ཆུང་ངང་ཁ་དབུགས་འཇམ་པོས་ཕུ་འདེབས་ཉིན།

ཁྱོད་ཀྱི་ནམ་ཟླ་སྐྱ་མོ་རྟོགས་མཁན་ག་ཙམ་ཡོད།

སེམས་ཁོང་གི་དངངས་འཚབ་མར་གནོན་ཉིན།

སྐྱོ་ཤས་ཀྱིས་ཡིད་ཁོང་ལ་མཆི་མ་འཁྲུགས་ཉིན།

ལན་མེད་པའི་འདྲི་ཚིག་དུ་མ་མགྲིན་ཁོག་ཏུ་བཙན་གྱིས་མིད་ཉིན།

རྨི་ལམ་དྲོད་མོའི་ཡུལ་ལ་གློ་བུར་དུ་འཇག་སྐྱ་འཚུབ་ཉིན།

སེམས་མཐིལ་ལ་བུ་ག་ཡེ་མི་བརྡོལ་བ།

མཐོ་ཚད་དེ་ཉིད་རྒྱང་རིང་ནས་མཐོང་བ་ཨེ་ཡིན།

གང་ལྟར་ད་ལྟ།

མཐོ་ཚད་ཧི་མ་ལ་ཡ་དང་གཅིག་པ་རེད།

སླད་མའི་ཆར་ཡང་།

སད་མ་ཀར་དང་ཁྲི་མ་ལོད་ཀྱི་སྤོབས་པ་དྲོན་མོའམ།

མྱང་ཚ་དཀར་རྒྱན་གྱི་འཆི་བ་མེད་པའི་ཞེ་རུས་སོགས།

ཁྱོད་ལ་ཇི་ལྟར་འབོགས་པ་དེ་ལྟར་དུ།

སྙིང་རྩ་འཕར་སྟངས་རིགས་མཚུངས་སུ་ཡོད་པ་དག་ལ།

ཚ་དྲོད་མ་ཡལ་བའི་ལག་བརྒྱུད་ཅིག་ཅིས་ཀྱང་དགོས་ཨང་།

རྩོམ་གོང་མ། > བདག་གི་རྩྭ་ཐང་། དཔལ་མོ།
རྩོམ་གཞུག་མ། > ཕ་ཡུལ་དུ་བྱོན་དུས། ཆོས་འབྱོར་རྒྱ་མཚོ།

དུ་བ་གནམ་ཐོན་ཡོད་ས་ཚང་མར་འཕྲིན་གཏོང་ལྕགས་སྒྲོམ་ཡོད།

《ཀྲུང་གོའི་ས་རྒྱུའི་བཅད་ཁའི་གྲངས་གཞི་ཕྱོགས་བསྒྲིགས》ཡོངས་བསྒྲགས་བྱས་པ།

སྐྱེ་ཁམས་ཤེས་དཔལ་སྒྲིག་གཞི་སྒྱུར་བཅོས་ཐད“མཚོ་སྔོན་གྱི་མ་དཔེ”བཏོན་པ།

བོད་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཏང་ཙུའི་དེ་སྔའི་ཁོངས་མི་དང་ཀྲུའུ་རེན་གཞོན་པ་ཅི་གོ་ཀང་གིས་ལྐོག་རྔན་བླངས་པ་དང་གཞུང་ཁོངས་ཀུང་སིའི་མི་སྣས་འགན་དབང་གང་བྱུང་དུ་སྤྱད་པའི་གྱོད་གཞིའི་འདྲི་གཅོད་དང་པོའི་བཅད་ཁྲ་ཁྱབ་བསྒྲགས་བྱས་པ།