ཞོགས་པའི་སྙན་ངག
ཁྱུང་གཤོག
མདང་གི་རྨིས་མ་ཚར་བའི་རྨི་ལམ་དེའི་ཁ་དོག
ཞོགས་པའི་ལྷིང་འཇགས་ལ་འཁྱིལ་བའི་གྲང་རླུང་།
མི་ལོ་ཉེར་དྲུག་གོང་གི་ཞོགས་པ་ཞིག་གི་ངོ་གདོང་རེད་དམ།
དབྱངས་མེད་པའི་དུས་ཚིགས་འདིར།
ངས་རང་ཉིད་འཇིག་རྟེན་འདིར་སླེབས་པའི་ཞོགས་པ་དེ་དྲན།
དཔྱིད་མགོ་མའི་སྟ་གོན་གྱི་གོམ་འགྲོས་ཀློང་ནས།
ངས་ཕྱིར་མིག་གིས་ཡང་ཡང་འཚོ་འདོད་པ།
ཉི་འོད་ཀྱིས་སྦྲུམ་པའི།
དུས་ཚིགས་ཤིག་གི་ན་ཚོད་མ་རེད།
འགྱུར་འགྲོ་བཞིན་པའི་རང་གི་ངོ་གདོང་རེད།
ཚིག་འགྲོ་བཞིན་པའི་རང་གི་མངའ་ཐང་རེད།
ཞོགས་པ་འདིར།
མི་ལོ་ཉེར་དྲུག་གི་ཉི་འོད།
དུས་ཚོད་ཀྱིས་ང་ལ་དྲངས་པ་ཡིན་པས།
ཆད་སྣང་དང་སྐྱོ་ཡུས་མེད་པར།
ངོམས་མེད་ངང་ལོངས་སུ་སྤྱོད་དགོས་ཨང་།
སེམས་རྩར་མ་རེག་པའི་འདོད་འདུན་དེ་དག
མིག་ཟུང་ལྡེབ་ཙམ་གྱི་བར་ནས་བོར་སོང་བ་དེ་དག
ཚིག་དང་ཐ་སྙད་ཀྱིས་མཚོན་མ་ཐུབ་པ་དེ་དག
དུས་ཚོད་ཀྱི་མེ་ལོང་ངོས་སུ་ཤར་ན་སྙམ་ཨང་།
ཡིད་སེམས་ཀྱི་སྤང་ཐང་ལ་འབུས་ན་བསམ་ཨང་།
ཞོགས་པ་འདི་ང་ཁོ་ནར་དབང་བ་ཞིག་ཡིན་ནམ།
གང་ལྟར།
དུས་ཚོད་ཀྱི་འདར་སྐྱོམ་ལས་ངའི་ལང་ཚོར་སྐྱོ་ངལ་ཡོད་མི་ཆོག
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注