མཚན་ངོགས་སུ།
ཁྱུང་གཤོག
ཟླ་ཟེར་ཀྱི་ཟེགས་མ་བགོས་པའི་ཞི་འཇམ་གྱི་རྨི་ལམ།
གོས་ཆེན་འབྲུག་མའི་རུམ་ཁར་ཡང་ཡང་འཛུལ།
ཁེར་རྐྱང་གི་གླུ་སྐད།
བདུད་རྩི་བསིལ་བསིལ་ལྟར་བབས་ཏེ།
ཞེན་ཆགས་ཀྱི་ནགས་ཚུལ་མེ་རུ་བགོས།
མིག་ཆུས་མུན་པ་བཤགས།
དུས་ཚོད་དང་དྲན་པ་ནང་དུ་བསྡུས།
བར་ཐག་དང་ཁེར་རྐྱང་མཐའ་རུ་དེད།
རི་ར་བ་ཁང་ཁྱིམ་ལ་ཁྱེད་ཀྱི་འཛུམ་མདངས་ཕབ།
བདག་སེམས་ཀྱི་དཀར་ཁུང་ལས།
དྲན་གདུང་གི་འོ་མཚོ་བྲུག་སྟེ།
རྣམ་ཤེས་ཀྱི་རྒྱུན་ཐག་ལས་བརྡོལ་ནས།
དགུ་ཚིགས་སྐྱ་མོའི་གཞུང་ལ་འདྲེས།
ཁེར་རྐྱང་ནི་མཁའ་མཐའི་ཟླ་བ་སྒོར་སྒོར་དེ་ཡིན་པར་འདོད།
དྲན་གདུང་ནི་རྩིས་ན་རྫོགས་རྒྱུ་མེད་པའི་སྐར་ཚོགས་དེ་ཡིན་པར་འདོད།
དབེན་འཇགས་ཁོ་ནས་མཚན་མོའི་རྩྭ་ཐང་སྲུང་།
ཁ་དོག་མེད་པའི་དུས་ཚིགས་ཀྱི་ངོ་གདོང་།
ཁོ་མོའི་མིག་ཟུང་སྒོར་སྒོར་གྱི་རློན་ཤ་དང་འགྲོགས་ནས།
ཕྱེད་ཀ་གཉིས་སུ་གས་པའི་བདག་སེམས་ཀྱི་བུ་གར་བརྒྱུས།
རི་རབ་དང་སྐར་ཚོགས།
གཙང་ཆེན་དང་ལུག་ཁྱུ་གཉིད་ཟིན་ནའང་།
ངའི་ཟུངས་ཁྲག་ལྷོག་ལྷོག་གདུ་བར་བྱེད།
ངའི་རྨི་ལམ་ལྷབ་ལྷུབ་འཕུར་བར་རྩོམ།
ངའི་དྲན་གདུང་ཡོམ་ཡོམ་འཕྱོ་བར་བྲེལ།
ཡལ་ནས་འགྲོ་བཞིན་པ་ཟླ་འོད་དང་སྐར་ཚོགས་ཁོ་ན་ཙམ་མ་ཡིན་པར།
རྨི་ལམ་གྱི་སྣེ་གཅིག་ཏུ་ཁེར་རྐྱང་གིས་བཞད་པའི།
བརྩེ་དུང་གི་ཟིལ་བ་ཁུར་བའི་ཁྱོད་ཀྱི།
འདི་ཕྱི་སྒུལ་བའི་སྙིང་གཏམ་གྱི་མངར་ཁ་རེ་རེ།
བདག་གི་རྨི་ལམ་གྱི་མཁའ་དབྱིངས་ནས།
སྐལ་བའི་གཙང་ཆེན་བརྒལ་ཏེ་ཕྱིར་ཡོང་མེད་པ་དེའོ། །
རི་རབ་བཞིན་བརྟན་པོར་འགྲེང་རུང་།
ཁྱོད་ཀྱི་མིག་ཆུ་རྡོག་མ་གཅིག་གིས་སྒུལ་ཐུབ་པ་དེ།
ཏག་ཏག བདག་གི་རྣམ་ཤེས་རེད།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注