​སྟོན་གྱི་དྲི་མ། བསོད་ནམས་སྒྲོལ་མ། ཟི་ལིང་།

ཉིན་འདི་དག་ལ། ང་ཧ་ཅང་བླུན་པོ་ཡིན།

ཕ་མ་ཡོད་དེ།

ཁ་ཏ་ཞིག་གནང་བར་རེ་བཞིན་མེད།

དགེ་རྒན་ཡོད་དེ།

ཆེད་དུ་རང་གི་གཏམ་རྒྱུད་བཤད་ཀྱིན་མེད།

གྲོགས་པོ་ཡོད་དེ།

སྡུག་གཏམ་མོལ་གྱིན་མེད།

ཆར་བ་དང་བསིལ་རླུང་།

མེ་ཏོག་ཀྱང་ཡོད་དེ།

སེམས་ཁམས་མཚོན་བྱེད་ཀྱི་སྐོམ་སོད་དུ་ཁྱེར་གྱིན་མེད།

ད་ཆ་གནའ་མཁར་ཞིག་ཏུ་གནས་སྤོས་ཡོད།

ལན་རེར་རི་ཀླུང་དང་ནགས་ཚལ།

ཆུ་འགྲམ་བཅས་ལ།

འཆམ་འཆམ་དུ་འགྲོ་བཞིན་ཡོད།

འགྲོ་ཐེངས་རེ་དང་།

ཡང་ན་གྱེས་ཐེངས་རེ་རེར།

ཅི་ཞིག་བརྗེད་སོང་བ་དང་།

ཅི་ཞིག་བོར་སོང་བ་ལྟ་བུའི་ཚོར་བ་ཞིག་གིས་གཙེས་འགྲོ

ཉིན་འདི་དག་ལ། ང་ཧ་ཅང་ཕྱུག་པོ་ཡིན།

སྔོན་ཆད་རོལ་མྱོང་མེད་པའི་འཚོ་བ་ཞིག་རོལ་ཞིང་།

སྔོན་ཆད་གོན་མྱོང་མེད་པའི་ཞྭ་ཞིག་གོན་ནའང་།

ཆེད་དུ་གཏམ་རྒྱུད་ཀྱི་གོ་རིམ་དག

ཡི་གེར་ཕབ་པར་སྐྲག་ཡོད།

གཞན་ལ་བཤད་རྒྱུ་དེ་ཡང་སེམས་ཁྲལ་ཞིག

ཉིན་འདི་དག་ལ།

ང་ལ་གཉིད་ཞིམ་པོ་ཞིག་དཀོན་ནའང་།

ཆེད་དུ་སྨན་ལ་བསྟེན་གྱིན་མེད།

ལུས་ཕུང་ཇེ་ཞན་དུ་སོང་ནའང་།

ཆེད་དུ་མངར་ཟས་རོལ་གྱིན་མེད།

ཉིན་འདི་དག་ལ།

ཟས་ཀྱི་ཡི་ག་དང་སྐད་ཆ།

སེམས་ཁམས་ནི་རང་གི་མིན་པ་འདྲ།

དེ་དག་ཅི་ཡིན་ནམ་སྙམ་བཞིན་ཡོད།

ཉིན་འདི་དག་ལ།

གནས་འགངས་ཆེན་ཁག་ཅིག་ལ་སོང་མྱོང་།

ཡིན་ནའང་།

འགྱུར་ལྡོག་ཅི་ཞིག་ཡོད་པ་ཤེས་མ་སོང་།

ནགས་ཚལ་དང་རྩྭ་ཐང་མཐོང་ཐེངས་རེར།

གཏིང་ཟབ་པ་དང་ཡིད་འཕྲོག་པ་ཞིག་ཡིན་པའང་ཤེས་མ་སོང་།

འགྲོ་ཞོར་འདུག་ཞོར་དུ།

སེམས་ཁམས་རིག་པའི་དཔེ་ཆ་ཐེངས་གཅིག་བཀླགས་མྱོང་།

གནས་ལུགས་དང་བསླབ་བྱ་མང་བས་མགོ་ཉོག་པར་བྱས།

ཉིན་འདི་དག་ལ་སྟོན་ཁ་ཚེས་བྱུང་།

སྟོན་གྱི་དྲི་མ་དེས······