མཚོ་བྱུང་ངག་གི་ལྷ་མོ། སྨྱུག་ཞེན།

ཡོང་ཁུངས། མཚོ་སྔོན་པོ་དྲ་བ། རྩོམ་སྒྲིག་པ། ཀླུ་མགོན་རྒྱལ། 2024-05-22 11:14:05 ཀློག་གྲངས།3346

མཚོ་བྱུང་ངག་གི་ལྷ་མོ།

སྨྱུག་ཞེན།

ཡེ་ཤེས་འོད་ཀྱིས་རབ་ཏུ་མཛེས་པའི་བརྩེ་ཆེན་ཟླ་བའི་དཀྱིལ་འཁོར་ལ། །
ཏིང་འཛིན་པིར་གྱིས་བྲིས་པ་ཇི་བཞིན་ཡིད་འོང་རྒྱན་ཕྲེང་ཤིན་ཏུ་མཛེས། །
འགྲོ་ཀུན་རྨོངས་མུན་ཚ་བས་གདུང་བ་བདེ་ཆེན་བསིལ་བས་གནོན་བྱེད་པའི། །
དབྱངས་ཅན་ཡིད་ཀྱི་ལྷ་མཆོག་དེ་ཡི་དངོས་གྲུབ་འོད་ཀྱིས་སྲུང་གྱུར་ཅིག །

མཛེས་སྡུག་འདབ་སྟོང་ཡོངས་སུ་གྲོལ་པའི་པདྨ་དཀར་པོའི་གདན་སྟེང་ན། །
ལེགས་གསུང་དབྱངས་ཀྱི་སྙན་འཛིན་རྒྱུད་མངས་སོར་རྩེར་དལ་གྱིས་རྒྱུ་བ་ན། །
བདེ་དགའི་ལོངས་སྤྱོད་དཔྱིད་དུ་འཇོ་ཞིང་སེམས་ཅན་ཀུན་གྱི་གསོས་སུ་སྨིན། །
ཡིད་འོང་ཞལ་དཀར་ཟེར་བརྒྱ་སྤྲོས་པས་འགྲོ་བའི་རྨོངས་མུན་ཀུན་ནས་བསལ། །

མཚན་བཟང་གསེར་གྱི་ཡལ་འདབ་གྲོལ་ཞིང་དཔེ་བྱད་བཟང་པོའི་མཛེས་སྡུག་ངོམ། །
དབྱངས་སྙན་དྲུག་ཅུའི་བསིལ་ཟེར་འཕྲོ་བས་འགྲོ་བའི་ཉོན་མོངས་ཚ་གདུང་འཇོམས། །
མཁྱེན་བརྩེ་ཐུགས་རྗེའི་འདབ་སྟོང་རྩེ་བརྒྱ་མཁའ་རུ་འཕགས་པའི་ཉི་ཟླ་བཞིན། །
འགྲོ་བའི་རེ་སྐོང་དབྱངས་ཅན་ལྷ་མཆོག་དཔག་བསམ་ལྗོན་པར་ནམ་ཡང་འདུད། །

ཉིད་ཀྱི་གསུང་འཛིན་འོ་མའི་སྤྲིན་ལས་ལེགས་བཤད་བདུད་རྩི་ཆར་ལྟར་འཇོ། །
དུག་གསུམ་མེ་དཔུང་རབ་ཏུ་འབར་བ་ཡང་དག་ཆབ་ཀྱིས་བསལ་བར་བྱས། །
སྐྱེ་དགུའི་འདོན་དོན་མེ་ཏོག་བཞད་པས་དགའ་བའི་འདབ་མ་ཕྱོགས་སུ་གྲོལ། །
རྒྱལ་ཀུན་ཡུམ་གཅིག་དབྱངས་ཀྱི་ལྷ་མོ་མི་འབྲལ་དད་པས་སྤྱི་བོར་བཏུད། །

རྩོམ་གོང་མ། > ངག་གི་ལྷ་མོ། རང་མདངས།
རྩོམ་གཞུག་མ། > ནམ་གུང་གི་སྙན་ངག རྩོམ་པ་པོ། གཅན་མེ་སྟག

ཀྲུང་གོ་དང་ཧི་ལན་གྱི་དཔལ་འབྱོར་ཉོ་ཚོང་མི་སྣས་མཉམ་ལས་འཕེལ་རྒྱས་ཀྱི་གོ་སྐབས་གསར་བར་གྲོས་བསྡུར་བྱས།

པཱ་ཞིའི་ལྷོ་ཕྱོགས་ས་ཁུལ་དུ་གནམ་གྲུ་ཆུང་བ་ཞིག་སར་ལྷུང་ནས་མི10རྐྱེན་ལམ་དུ་ཤོར།

སི་ལོ་ཝ་ཁིའི་ཙུང་ལི་ཡིས་ཕུའུ་ཅིན་གྱིས་མུ་མཐུད་དུ་ནུབ་ཕྱོགས་རྒྱལ་ཁབ་ལ་ཨུ་རུ་སིའི་རང་བྱུང་སོལ་རླངས་མཁོ་འདོན་བྱེད་འདོད་ཡོད་པའི་ཚུལ་བསྟན་ཡོད་ཟེར།

ཕུའུ་ཅིན་གྱིས་ཨུ་རུ་སིར་གནོད་སྐྱེལ་མཁན་ལ་རྒོལ་ལན་དྲག་པོ་སྤྲོད་རྒྱུའི་ཚུལ་བསྟན།

མཚོ་བྱུང་ངག་གི་ལྷ་མོ། ​སྨྱུག་ཞེན།

མཚོ་བྱུང་ངག་གི་ལྷ་མོ། སྨྱུག་ཞེན།