མར་གྱི་སྒྱུ་རྩལ། སེང་རྡོར།

ཡོང་ཁུངས། བོད་ཀྱི་གྱེར་འདོན་སྤྱི་སྟེགས་ཆེན་མོ། རྩོམ་སྒྲིག་པ། ཀླུ་མགོན་རྒྱལ། 2024-03-01 14:29:35 ཀློག་གྲངས།382

མར་གྱི་སྒྱུ་རྩལ།

__མེ་ཏོག་མཆོད་མཇལ།

སེང་རྡོར།

མར་གྱི་རྒྱ་མཚོར་མར་གྱི་སྤྲིན།།

འཁྲིགས་ཏེ་མར་གྱི་སྐུ་འབུམ་དོད།།

མར་གྱི་ལག་པ་སྣུམ་ཆིལ་ལེར།།

སྤྲོས་ཏེ་མར་གྱི་ཚོམ་བུར་རྫོགས།།

མར་གྱི་བླ་མ་མར་དུ་བཞད།།

ཡང་བསྐྱར་མར་ལས་མར་ལྟང་གྲུབ།།

མར་གྱི་མ་ཧེས་མར་ལ་བརྒལ།།

མར་གྱི་རྡོ་ཆའི་མར་ཟན་བརྫིས།།

མར་གྱི་རིལ་བུ་མར་གཏོར་གྱིས།།

མར་གྱི་སེ་མོ་དོ་ཡང་འཕེལ།།

མར་གྱི་ངུར་བར་མར་རིས་བཀྲ།།

མར་དང་མར་ལོས་གསེར་སྡོང་བསྐོར།།

མར་གྱི་དྲེགས་པ་མར་གྱི་ལྷས།།

མར་གྱི་ཆོ་འཕྲུལ་མར་ལྟར་བཞུས།།

མར་གྱི་ན་བཟའ་གཡོ་བའི་འོག །

མར་དང་མར་ཁུའི་སྟོན་འཁོར་ཕེབས།།

མར་གྱི་ལྟེང་ཀ་བརྡོལ་པ་ལས།།

མར་ཁུའི་ལམ་ཞིག་བཤངས་ཏེ་འཚེར།།

མར་གྱི་འཇིགས་བྱེད་མར་རྭ་གདེངས།།

མར་གྱི་དུས་དགྲ་མར་གྱིས་བཞེངས།།

མར་ཡིན་མར་མིན་འདིར་མི་མནོ།།

མར་གྱི་ཕང་ཕུང་བརྩེགས་པ་དེ།

མར་མེའི་ཀློང་དུ་འཁྱིར་སོང་ངོ་།།