ཁྲེལ་གཞུང་མེད་པའི་ཨ་རག
ཞི་བདེ་ཉི་མ།
ཨ་རག་ཟེར་བ་དེ།
ཕྱི་གསལ་ནང་གསལ་གྱི་ཆུ་ཞིག་དང་།
ཁྲེལ་གཞུང་མེད་པའི་ཆུ་ཞིག་རེད།
དེ་དང་ལྷན་དུ་ཁྲེལ་གཞུང་མེད་པ་དེ།
རྫུན་གཏམ་བག་མེད་དུ་སྐྱུག་ནས།
མི་ཡི་ཡིད་རྟོན་རྫབ་དོང་ལ་བཟོ་བའི།
ཁྲེལ་གཞུང་མེད་པའི་ཆང་ཚོང་མ་དེ་རེད།
བསམ་གྱིན་བསམ་གྱིན།
ཁྲེལ་གཞུང་མེད་པ་དེ་ཆང་ཚོང་མ་ཁོ་ན་ག་ལ་ཡིན།
ཁྲེལ་གཞུང་མེད་པ་དེ་ཆུ་ཁོ་ན་ག་ལ་ཡིན།
ཆུ་དེ་རྫས་འགྱུར་ལ་བཟོ་མཁན་གྱི།
ཁྲེལ་གཞུང་མེད་པའི་ཚན་རིག་པ་དེ་རེད།
ཁྲེལ་གཞུང་མེད་པའི་བཟོ་པ་དེ་རེད།
ཁྲེལ་གཞུང་མེད་པའི་སྒོར་མོ་བརྩེགས་རིམ་གྱི་རྒྱབ་དུ།
རྐང་བྲོ་ལག་བྲོ་འཁྲབ་བཞིན་པའི།
ཁྲེལ་གཞུང་མེད་པའི་ཚོང་པ་དེ་རེད།
ཁྲེལ་གཞུང་མེད་པ་དེ།
དེ་དག་ཁོ་ནའང་ག་ལ་ཡིན།
ཁྲེལ་གཞུང་མེད་པའི་ཆུ་དེར།
ཁྲེལ་གཞུང་མེད་པར་རིན་གོང་མཐོན་པོ་སྤྲད་དེ།
ཁྲེལ་གཞུང་མེད་པར་རང་ཉིད་བག་མེད་ལ་གཏོང་མཁན་གྱི།
ཁྲེལ་གཞུང་མེད་པའི་ཆང་རྐྱལ་ཀླད་སྟོང་ང་རེད།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注