​དབྱངས་ཅན་གྱི་མགྲིན་པ། རང་མདངས།

དབྱངས་ཅན་གྱི་མགྲིན་པ།

རང་མདངས།

འགྱུར་ཁུག་ངག་གི་སྒོ་ཁ་ན། །

དྲན་པའི་མེ་ལོང་གསལ་བ་ལ། ། 

ལྷུན་གྲུབ་དབྱངས་ཀྱི་བརྡ་ཐབས་དེ། །

སྨྱུག་རྩེའི་ཕྱག་ལ་སྩོལ་རོགས་ཀྱེ། །

སྲིད་ཞིའི་གླུ་ཆུང་འགུག་པ་མོ། །

ཚོར་བའི་ཟིན་ཐོ་འགོད་པ་མོ། །

སྙན་ངག་སྒྱུ་རྩལ་འཁྱུག་པ་མོ། །

ཐམས་ཅད་བདག་མོ་ཁྱོད་ལ་བསྟོད། །

ཁྱོད་གདོང་སྤྲིན་དཀར་དབྱིངས་ན་མཛེས། །

ཁྱོད་གསུང་ཁུ་ལོ་ནགས་ན་སྙན། །

ཁྱོད་མཛེས་སྲིད་ཞི་གཉིས་ན་འགྲན། །

ཁྱོད་ནི་ལྷ་མོ་དབྱངས་ཅན་ཡིན། །

ཁྱོད་སྐུ་རི་བོ་བཞིན་དུ་བརྗིད། །

ཁྱོད་གསུང་རྒྱུད་མངས་བཞིན་དུ་སྙན། །

ཁྱོད་ཐུགས་ལྷ་ལམ་བཞིན་དུ་མཐོ། །

ཁྱོད་ནི་དུས་གསུམ་སངས་རྒྱས་ཡིན། །

རབ་དཀར་གདོང་གི་ཟླ་བ་ལ། །

རབ་མཛེས་ལང་ཚོའི་འོད་སྟོང་འཕྲོས། །

རབ་དགའ་དཔྱིད་ཀྱི་དོ་ར་ན། །

རབ་མཉེན་ལུས་ཀྱི་སྒེག་པ་ཡག །

དབྱངས་ཅན་ཟླ་གཞོན་བསིལ་བ་ཡིས། །

མོས་ལྡན་མེ་ཏོག་ཅིས་ཀྱང་མཛེས། །

ཚིག་མགུར་མགྲིན་པའི་གོ་ར་ན། །

ངག་དབང་ལྷ་མོས་གཟིགས་སྐྱོངས་མཛོད། །

དྲན་པ་འདི་ཡི་ཕར་ངོགས་ན། །     

དུང་སེམས་གཅིག་གི་ཚུར་ངོགས་ན། །     

ཚོར་བའི་གར་སྟེགས་ཆུང་ཆུང་ལ། །    

བདུན་འགྱུར་རིག་པའི་གཤོག་ཟུང་རྐྱོངས། །          

ཡར་ཀི་སྲིད་པའི་རྩེ་མོ་ན། །   

མར་ཀི་ན་རཀ་དམྱལ་བ་ན། །    

དགའ་སྐྱོ་སྣང་བའི་གཟུགས་རིས་ལ། །    

གྲོགས་དང་རམ་འདེགས་ཁྱོད་ཉིད་གཅེས། །          

རི་ལུང་སྟོང་གི་ཕར་ཕྱོགས་ན། །    

ཆུ་མོ་འདི་ཡི་ཚུར་ཕྱོགས་ན། །    

ལས་དང་འཕྲིན་པ་དབྱངས་མགུར་འདི། །   

བརྩེ་ལྡན་ལྷ་མོས་སྐུད་པ་སྦྲེལ། །

ཀ་ཁ་ཚིག་མགུར་གཞས་ཐུང་གི ། 

དབྱངས་ཀྱི་ང་རོ་སྒྲོག་པ་ཡིས། ། 

རྗེས་འཇུག་སྐལ་ལྡན་བུ་སློབ་འདིར། །

གདངས་ཀྱི་སྲིད་མཐར་བགྲོད་པར་ཤོག །   

སྣང་བ་བློ་ཡི་ཆོ་འཕྲུལ་གྱི། །      

རིག་པའི་རང་སར་ཟིན་པ་ནས། །    

བདེ་གཤེགས་བཀའ་ལུང་ཇི་བཞིན་དུ། །     

བདེན་པའི་ལམ་སྣ་ཕྱིན་པར་ཤོག །