ལྕོག་རའི་གླུ་དབྱངས། འཇུ་སྐལ་བཟང་།

ལྕོག་རའི་གླུ་དབྱངས།

འཇུ་སྐལ་བཟང་།

ང་ཡང་ཨ་མར་སྐྱེས། ཡིན་ཏེ་སྤྱི་ལོ༡༩༦༠ལོར་བོད་བྱང་འབྲོག་ས་ཆའི་ཨ་མ་བྱམས་ལྡན་ཞིག་ལ་སྐྱེས། ངའི་ཨ་མ་ལོ་ན་གཞོན་དུས་འབྱོར་བ་ཞན་ལ། སྐྱེ་འབྲས་ཀྱང་ཤིན་ཏུ་མཚར་བོ་ཞིག་མིན། ཁྱད་ཆོས་སུ་སྨྲ་འོས་པ་ནི་སེམས་རྒྱུད་བཟང་ཞིང་། བྱམས་སེམས་ཆེ་ལ། ཨ་མའི་འགན་འཁྲིའི་འདུ་ཤེས་ཤིན་ཏུ་དམ། ཁོ་མོའི་ཕ་རུས་ཁམས་གཙང་དང་། མ་རུས་སང་སིང་ཡིན། དེ་བཞིན་ཕྲན་གྱི་ཡང་སེམས་ཁམས་བདེ་ཐང་ཡིན་ཅིང་། བློ་ཕུགས་ཀློང་ཡངས་བའི་འབྲོག་ཁུལ་སྐྱེས་པ་ཞིག་ཡིན་པ་ལ། བློ་རྩེ་ཅུང་རྒོད་ཅིང་སྤྱང་གྲུང་འཛོམས། དཔེ་འདྲེན་གོ་སྐོན་གྱི་སྐད་ཆའི་སྒྱུ་རྩལ་ལ་མཁས་ཤིང་། ཡིད་འགུགས་འགོ་བསྡུ་ཡི་རྩ་འཛུགས་ནུས་པ་ལྡན། མི་ཆོས་ཀྱི་བློ་རྩེ་གྲུང་ངེར་ཡོད་པ་ང་ལས་ལྡབ་འགྱུར་གྱིས་ལྷག་པས། ཨ་ཕ་ནི་ད་ལྟ་བའི་བར་ངའི་སེམས་ལྗོངས་ཀྱི་སྐྱེས་པ་ཕོ་ཡི་མཚོན་དཔེ་ཡིན། ཁོང་གི་ཕ་རུས་འཇུ(ངའི་རུས་ཀྱང་དེ་ཡིན་པ་བཤད་མ་དགོས)དང་། མ་རུས་ཝ་ཤུལ་བཀྲ་ཟ་ཡིན། ངེད་ཅག་གི་ཁྱིམ་རྒྱུད་ཀྱི་རུས་ནི་སྒོ་སྤའམ་སྒོ་པ་ཞེས་པ་ཡིན་ཏེ། རུས་སྒོ་རང་གི་ཆེ་བསྟོད་སྐབས་བོད་གནའ་བོའི་རུས་ལ། “བསེ་རྨུ་སྟོང་ལྡོང་རུས་ཆེན་བཞི། །ཞང་པོ་སྒོ་དང་ལྔ་རུ་གྱེས། །”ཞེས་པའི་སྒོ་ཡི་རུས་རྒྱུད་ཡིན་པས་སྒོ་པ་ཡིན་ཞེས་ཀྱང་སྨྲ།
       གོང་སྨྲས་བཞིན་ཨ་ཕ་ནི་ངའི་མིག་དཔེ་ཡིན་ཏེ། ངས་བྱིས་སྒྲུང་མང་བོ་ཞིག་ཨ་ཕ་ལས་ཐོས་ཤིང་། ཀློག་སློབ་བའི་དགེ་རྒན་དདང་པོའང་ཨ་ཕ་ཡིན། ངའི་བྱད་བཞིན་དང་སྐྱེ་གཟུགས་ཨ་ཕ་དང་ཤིན་ཏུ་འདྲ་བར་མ་ཟད། ཨ་ཕའི་གཤིས་ཁམས་དང་སྤྱོད་ལམ་གྱིས་ང་ལ་བག་ཆགས་དང་ཤུགས་རྐྱེན་གཏིང་ཟབ་མོ་ཞིག་ཐེབས་ཡོད་པས། ངའི་གཏམ་སྤྱོད་དང་རྣམ་འགྱུར་ཀུན་གྱི་ཁྲོད་ཨ་ཕ་ལས་བརྒྱུད་བའི་གྲུབ་ཆ་ཉིན་བཞིན་ཇེ་མང་དང་ཇེ་གསལ་དུ་འགྲོ་བཞིན་ཡོད།
       གལ་ཏེ། ཨ་ཕས་སྐབས་དེའི་འབྲོག་མི་དཀྱུས་མ་ཞིག་གི་མིག་རྒྱང་ལས་བརྒལ་བའི་བློ་རྒྱ་ལ་བརྟེན་ནས་ང་རང་སློབ་གྲྭར་བསྐྱལ་བ་མིན་ན། ཇི་ལྟར་བྱས་ཀྱང་དེ་རིང་གི་རྩོམ་ཡིག་འདི་འདྲ་གཏན་ནས་འབྲི་མི་སྲིད།
       ང་རང་འཇིག་རྟེན་འདིར་འོང་ནས་ཐེངས་དང་བོར་མཐོང་བ་ནི་ཨ་མའི་ཞལ་རས་ལགས་ཤིང་། ཐེངས་དང་པོར་བཏུང་བ་ཨ་མའི་ནུ་ཞོ་ལགས། ངས་ཀྱང་འཛུམ་དཀར་དང་པོ་ཨ་མར་བསྟན་ལ། འཁང་ར་དང་པོའང་ཨ་མར་བྱས། འཇིགས་ཉེན་བྱུང་ཚེ་དང་པོ་འབོད་ས་ཨ་མ་ཡིན་ལ། ལྟོ་བ་ལྟོགས་ཚེ་དང་པོ་འཚོལ་བྱ་ཨ་མ་ཡིན། ཨ་མ་ལ་འཇིགས་སྣང་མེད་པས་ལེགས་ཉེས་ཅི་བྱུང་ཞུ་ཕོད་ཅིང་། ཨ་མ་ལ་ཟིལ་གནོན་མེད་པས་ཨ་མའི་བཀའ་ལས་འགོངས་བར་ཕོད། ང་ལ་མ་ཎི་ཡིག་དྲུག་གི་ལུང་ཨ་མ་ལས་ཐོབ་ཅིང་། སྐྱབས་འགྲོ་དང་སྒྲོལ་མ་ཨ་མ་ལས་བསླབས། ཨ་མས་ང་རང་ཁྲིད་ནས་སྐམ་ལ་ཉེ་བའི་ཆུ་འཁོར་ཞིག་ལས་ཉ་ལྕོང་མང་པོ་རྫིང་བུ་གཞན་དུ་གནས་སྤོ་བྱས་པས། ངས་ཚེ་སྲོག་གི་རིན་ཐང་ལ་གོ་བ་དང་པོ་དེ་ལས་ལོན་ཅིང་། མ་བཅོས་པའི་སྙིང་རྗེ་དང་བྱམས་སེམས་དང་པོར་དེ་ལས་རྟོགས་ལ། བོད་མི་རྣལ་མ་ཞིག་བྱེད་པའི་གཤིས་རྒྱུད་ཀྱི་རྟོགས་པ་པ་དང་པོ་དེ་ལས་བརྙེས། ཨ་མས་དབུལ་པོ་ཉམ་ཐག་དང་རྒན་རྒོན་བདག་མེད་ལ་ཟས་གོས་ཚུན་ཆད་ཕངས་མེད་དུ་བྱིན་ཅིང་། དེ་དག་ལ་དམན་སྣང་དང་གཙང་དམེ་མེད་པར་གཅེས་སྐྱོང་དང་རོགས་རམ་བྱེད་པ་ལས། ང་ལ་མི་ལུས་ཀྱི་ཐོབ་ཐང་འདྲ་མཉམ་ཡིན་ཅིང་། བདེ་སྡུག་གི་འགྱུར་བ་རྣམ་པ་ཙམ་དུ་ཟད་པའི་སློབ་གསོ་ཐོག་མར་ཐོབ།གཞན་ཡང་ངས་ཟོལ་མེད་དང་། དྲང་བདེན། ལྷག་བསམ་རྣམ་དག་དང་གཞན་དོན་བླ་མེད་ཅེས་པ་སོགས་ད་ལྟ་མང་པོས་རྩིས་མེད་དུ་དོར་ཡང་རང་ལ་གཅེས་ཐང་ཆེ་བའི་ཐ་སྙད་མང་པོ་ཞིག་ཨ་མ་ལས་བསླབས་པས་ཨ་མའི་བཀའ་དྲིན་གཞལ་དུ་མེད།
       ད་ལྟ་ངའི་ཨ་མ་དགུང་གྲངས་མཐོ་ཙམ་དུ་སོན་ཡོད་ཀྱང་ད་དུང་ངེད་ཅག་བུ་བུ་མོ་དག་ལ་རྟག་པར་སེམས་ཁྲལ་བྱེད་བཞིན་ཡོད་ལ། ངེད་ཅག་ཀྱང་ཨ་མ་ལ་སེམས་པ་སྔར་ལས་འཕྲེང་བཞིན་ཡོད་དེ། དེ་སྔོན་ཁོ་བོས་སྙན་རྩོམ་ཞིག་ཏུ་འདི་ལྟར་བྲིས་མྱོང་།
       འགྲོ་ཁར་ཨ་མ་ལ་ཐོད་པ་ལན་གཅིག་གཏུགས་པས།
       སྙི་དྲགས་པའི་སེམས་པ་དེ།
       དཔྲལ་གཉེར་གྱི་དྲ་རྒྱར་ཡུན་རིང་ཐོགས།
       ཉིན་བཞིན་དཀར་བའི་སྐྲ་ལོ་དེར་བལྟས་ཀྱིན།
       ངུ་སྙིང་ཞིག་གཏིང་ནས་འོང་ཡང་།
       ང་ལ་ཨ་མས་དང་པོར་བསླབས་པ་ནི།
       འཛུམ་དཀར་ལགས་པས།