པང་གདན་གྱི་སྤྱོད་གོ་ཁྱེད་ཀྱིས་ཤེས་སམ།
བོད་རིགས་ཀྱི་བུད་མེད་ཚོས་འཇའ་ལྟར་བཀྲ་བའི་པང་གདན་རྒྱག་སྲོལ་ཇི་ལྟར་དར་བ་དང་། དེ་ལ་འགྱུར་བ་གང་ཞིག་བྱུང་ཡོད་ཟེར་ན། དེང་སྐབས་ང་ཚོས་མཐོང་བའི་བུད་མེད་ཚོས་རྒྱག་པའི་པང་གདན་ནི་ཡུན་རིང་རྒྱུན་ཆད་མེད་པར་ལེགས་བཅོས་བྱས་ནས་བྱུང་བ་ཞིག་ཡིན་ལ། པང་གདན་རྒྱག་སྲོལ་ནི་གནམ་གཤིས་དང་འཚོ་བའི་དགོས་མཁོར་གཞིགས་ཏེ་ཆགས་པའི་གོམས་སྲོལ་ཞིག་མིན་ནམ་སྙམ། གང་ལགས་ཤེ་ན། ཐོག་མར་པང་གདན་རྒྱག་དོན་ནི་གཅིག་ནས་བུད་མེད་ཚོས་ཕྲུ་གུ་པང་དུ་ཉར་བ་དང་མེ་ཤིང་སྒྲུག་པ་སོགས་ཀྱི་ཟད་རྟེན་ཡིན་ཞིང་། གཉིས་ནས་བོད་རིགས་བུད་མེད་རྣམས་ལས་ལ་བརྩོན་ཞིང་ཁྱིམ་སྐྱོང་མཁས་པ་དང་སྤྱོད་ཚུལ་བཟང་བས། ཕྱིར་འགྲོ་སྐབས་མེ་ཤིང་དང་། གཟན་རྩྭ་སོགས་མཐོང་ཚེ་སྒྲུག་པའི་གོམས་གཤིས་ཡོད་སྟབས། པང་གདན་ནི་བླུག་སྣོད་སྟབས་བདེ་ཞིག་རེད། གསུམ་ནས་པང་གདན་བརྒྱབ་པས་མདུན་ཕྱོགས་ཀྱི་རླུང་བཀག་ནས་དྲོད་ལ་ཕན་པ་བཅས་ཀྱི་ནུས་པ་ལྡན་ཡོད། སྤྱི་ཚོགས་འཕེལ་རྒྱས་ཕྱིན་པ་དང་དུས་མཚུངས། མིའི་འཚོ་བ་ཡང་རིམ་བཞིན་ཇེ་ལེགས་སུ་འགྲོ་བ་དང་བསྟུན་ནས། པང་གདན་ལའང་རྒྱུན་ཆད་མེད་པར་ལེགས་བཅོས་བྱུང་སྟེ། ཚོན་ཁྲ་འཇའ་ལྟར་བཀྲ་བ་དང་། སྤུས་ཚད་ཇེ་ལེགས་སུ་ཕྱིན་ནས་ཐོག་མར་བེད་སྤྱོད་ཁོ་ནར་དམིགས་པ་ནས་རྗེས་སུ་རྒྱན་ཆར་གྱུར་བ་རེད།
«བོད་ཀྱི་ལོ་རྒྱུས་དང་རིག་གནས་སྐོར་གྱི་དྲི་བ་དྲིས་ལན་བརྒྱ»ལས་བཏུས།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注