པང་གདན་གྱི་སྤྱོད་གོ་ཁྱེད་ཀྱིས་ཤེས་སམ།

ཡོང་ཁུངས། བོད་ལྗོངས་ཉིན་རེའི་ཚགས་པར། རྩོམ་སྒྲིག་པ། གུ་རུ་སྐྱབས། 2023-10-25 10:13:09 ཀློག་གྲངས།993

བོད་རིགས་ཀྱི་བུད་མེད་ཚོས་འཇའ་ལྟར་བཀྲ་བའི་པང་གདན་རྒྱག་སྲོལ་ཇི་ལྟར་དར་བ་དང་། དེ་ལ་འགྱུར་བ་གང་ཞིག་བྱུང་ཡོད་ཟེར་ན། དེང་སྐབས་ང་ཚོས་མཐོང་བའི་བུད་མེད་ཚོས་རྒྱག་པའི་པང་གདན་ནི་ཡུན་རིང་རྒྱུན་ཆད་མེད་པར་ལེགས་བཅོས་བྱས་ནས་བྱུང་བ་ཞིག་ཡིན་པ་དང་། པང་གདན་རྒྱག་སྲོལ་ནི་གནམ་གཤིས་དང་། འཚོ་བའི་དགོས་མཁོར་གཞིགས་ཏེ་ཆགས་པའི་གོམས་སྲོལ་ཞིག་མིན་ནམ་སྙམ། གང་ལགས་ཤེ་ན། ཐོག་མར་པང་གདན་རྒྱག་དོན་ནི་གཅིག་ནས་བུད་མེད་ཚོས་ཕྲུ་གུ་པང་དུ་ཉར་བ་དང་མེ་ཤིང་སྒྲུག་པ་སོགས་ཀྱི་ཟད་རྟེན་ཡིན་ཞིང་། གཉིས་ནས་བོད་རིགས་བུད་མེད་རྣམས་ལས་ལ་བརྩོན་ཞིང་ཁྱིམ་སྐྱོང་མཁས་པ་དང་སྤྱོད་ཚུལ་བཟང་བས། ཕྱིར་འགྲོ་སྐབས་མེ་ཤིང་དང་། གཟན་རྩྭ་སོགས་མཐོང་ཚེ་སྒྲུག་པའི་གོམས་གཤིས་ཡོད་སྟབས། པང་གདན་ནི་བླུག་སྣོད་སྟབས་བདེ་ཞིག་རེད། གསུམ་ནས་པང་གདན་བརྒྱབ་པས་མདུན་ཕྱོགས་ཀྱི་རླུང་བཀག་ནས་དྲོད་ལ་ཕན་པ་བཅས་ཀྱི་ནུས་པ་ལྡན་ཡོད། སྤྱི་ཚོགས་འཕེལ་རྒྱས་ཕྱིན་པ་དང་དུས་མཚུངས། མིའི་འཚོ་བ་ཡང་རིམ་བཞིན་ཇེ་ལེགས་སུ་འགྲོ་བ་དང་བསྟུན་ནས། པང་གདན་ལའང་རྒྱུན་ཆད་མེད་པར་ལེགས་བཅོས་བྱུང་སྟེ། ཚོན་ཁྲ་འཇའ་ལྟར་བཀྲ་བ་དང་། སྤུས་ཚད་ཇེ་ལེགས་སུ་ཕྱིན་ནས་ཐོག་མར་བེད་སྤྱོད་ཁོ་ནར་དམིགས་པ་ནས་རྗེས་སུ་རྒྱན་ཆར་གྱུར་པ་རེད།

དེང་སྐབས་བོད་རིགས་ཀྱི་བུད་མེད་ཚོས་རྒྱག་པའི་པང་གདན་ནི་རྒྱན་ཆ་ཁོ་ན་ཡིན་པ་དང་། ཚོན་ཁྲ་ཡང་འདྲ་མིན་སྣ་ཚོགས་ཡོད་ལ་སྤུས་ཚད་ལའང་དང་དོད་ཆེན་པོ་བྱེད་ཀྱི་ཡོད་པ་སྟེ། སྣམ་བུ་བྱིང་མའི་པང་གདན་དང་། སྤུ་ཕྲུག་གི་པང་གདན། ཤད་མའི་པང་གདན། སི་ཤན་གྱི་པང་གདན་སོགས་རིགས་མང་པོ་ཡོད་པའི་ཁར། མཛེས་རྒྱན་དུ་གོས་ཆེན་དང་སྐྱིན་ཁེབས་སོགས་ལས་གྲུབ་པའི་གྲུ་གདན་དང་པང་མཐུད་བཅས་རྒྱག་པས། ཐུན་མོང་མ་ཡིན་པའི་བུད་མེད་ཀྱི་རྒྱན་གོས་ཤིག་ཏུ་གྱུར་ཡོད། དེ་བཞིན་པང་གདན་རྒྱག་སྟངས་ལའང་ཡུལ་ལུང་སོ་སོར་རང་རང་གི་ཁྱད་ཆོས་ལྡན་ཞིང་། སྟོད་ཕྱོགས་སུ་བུད་མེད་ཀྱིས་རྒྱབ་མདུན་གཉིས་ཀར་པང་གདན་དང་རྒྱབ་གདན་རྒྱག་སྲོལ་ཡོད་པའི་ཁར། རྒྱབ་གདན་དུ་དངུལ་རྒྱན་འདྲ་མིན་སྣ་ཚོགས་འདོགས་ཀྱི་ཡོད་པ་དང་། དབུས་ཕྱོགས་ལ་བུད་མེད་གཉེན་སྒྲིག་མ་བྱས་གོང་པང་གདན་རྒྱག་སྲོལ་མེད།

«བོད་ཀྱི་ལོ་རྒྱུས་དང་རིག་གནས་སྐོར་གྱི་དྲི་བ་དྲིས་ལན་བརྒྱ»ལས་བཏུས།

རྩོམ་གོང་མ། > མཚོ་སྔོན་པོའི་གསེར་ཉ་སྐྱེ་འཕེལ་སྲོག་བླུ་དང་ཉ་གཟིགས་དུས་ཆེན་སྐབས་བཅུ་དྲུག་པ་ཚོགས།
རྩོམ་གཞུག་མ། > བཟའ་བཏུང་དམངས་སྲོལ།

དུ་བ་གནམ་ཐོན་ཡོད་ས་ཚང་མར་འཕྲིན་གཏོང་ལྕགས་སྒྲོམ་ཡོད།

《ཀྲུང་གོའི་ས་རྒྱུའི་བཅད་ཁའི་གྲངས་གཞི་ཕྱོགས་བསྒྲིགས》ཡོངས་བསྒྲགས་བྱས་པ།

སྐྱེ་ཁམས་ཤེས་དཔལ་སྒྲིག་གཞི་སྒྱུར་བཅོས་ཐད“མཚོ་སྔོན་གྱི་མ་དཔེ”བཏོན་པ།

བོད་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཏང་ཙུའི་དེ་སྔའི་ཁོངས་མི་དང་ཀྲུའུ་རེན་གཞོན་པ་ཅི་གོ་ཀང་གིས་ལྐོག་རྔན་བླངས་པ་དང་གཞུང་ཁོངས་ཀུང་སིའི་མི་སྣས་འགན་དབང་གང་བྱུང་དུ་སྤྱད་པའི་གྱོད་གཞིའི་འདྲི་གཅོད་དང་པོའི་བཅད་ཁྲ་ཁྱབ་བསྒྲགས་བྱས་པ།