ཧན་ཀང་གི་སྙན་ངག་བོད་འགྱུར་མ།

རྡོ་སྔོན།

ཧན་ཀང་གིས་བརྩམས།
འབྲོང་གིས་བསྒྱུར།‍
 

ལོ་ངོ་བཅུའི་སྔོན་ལ་རྨི་ལམ་དུ་རྨིས་པའི།
རྡོ་སྔོན།
ད་དུང་ཆུ་ཕྲན་དེའི་གཏིང་དུ་ཡོད་དམ།

ང་རང་ཤི་འདས་བྱུང་ཚར
ཤི་རྗེས་དཔྱིད་ཉིའི་ཁྲོད་ཀྱི་ཆུ་འགྲམ་དུ་ཆས།
ཨ། ཤི་བ་དངོས་གནས་བཟང།
གསལ་ལྷང་ངེར། སྲིང་བལ་ཇི་བཞིན།
ཡང་ཞིང་འཕྱོ།

ཕྱི་གསལ་ནང་གསལ་གྱི་ཆུ་རིས་འོག་ཏུ།
དཀར་ཞིང་རྒྱགས་པའི།
གྲམ་རྡོ་མཐོང་བྱུང།
ཇི་འདྲའི་གསལ་སྣང་ཆེ་བ་ལ
གཅིག གཉིས། གསུམ།

མ་གཞིར་སྔར་བཞིན་དེ་ག་ན་འདུག
སྔོ་དྲག་པས་ལྷག་ཏུ་ཁ་ཁུ་སིམ་པོར་གྱུར་པའི།
རྡོ་སྔོན་དེ།

དབང་མེད་དུ་ལག་པ་བསྲིང་ནས་འཐུ་འདོད་སྐྱེས།
དེ་མ་ཉིད་རྟོགས་སད་ཅིག་སྐྱེས་བྱུང།
དེ་ནི་ཡང་བསྐྱར་ཤི་སོས་འབྱུང་དགོས།
དེ་མ་ཉིད་སྙིང་གཟེར་ཅིག་ལངས་བྱུང།
དེ་ནི་ཡང་བསྐྱར་ཤི་སོས་འབྱུང་དགོས།

ངས་མིག་ཟུང་ཕྱེས་དུས།
སྨག་རུབ་འདུག
རྨི་ལམ་ཁྲོད་ཀྱི་མིག་ཆུ་སྔར་བཞིན་དྲོད་ཁོལ་ལྡན་པ་ལ།

ལོ་ངོ་བཅུའི་སྔོན་ལ་རྨི་ལམ་དུ་རྨིས་པའི་རྡོ་སྔོན།

ལག་ཏུ་འཐུ་ཉར་བྱས་ཤིང།
ཡང་བསྐྱར་དོར་ཨེ་ཡོད་དམ།
སུ་ཞིག་གིས་གཏིང་བརྗེད་དུ་སོང་ཨེ་ཡོད་དམ།
ཐོ་རེངས་དུས་ཀྱི་གཉིད་ཐུན་ཡང་མོའི་ཁྲོད།
འཛུལ་བའི་མཐིང་མདོག་གི་གྲིབ་གཟུགས་དེ་ཨེ་ཡིན་ནམ།

ལོ་ངོ་བཅུའི་སྔོན་ལ་རྨི་ལམ་དུ་རྨིས་པའི།
རྡོ་བ་སྔོན་པོ་དེ།

འོད་ལམ་ལམ་དུ་འཚེར་བའི་ཆུ་ཕྲན་དེར་ལོག་ཅིང།
ཆུ་ངོགས་བརྒྱུད་ནས་བལྟས་ན།
སྔར་བཞིན་གནས་དེ་ག་ན།
མིག་ཟུང་དྭངས་མོ་བཞིན་འཇམ་ཐིང་ཐིང་དུ་ཨེ་ཡོད་དམ།