«ཉི་ཆོས་བཟང་པོའི་གཏམ་རྒྱུད་རིས་སྒྲུང་དཔེ་ཚོགས།»བོད་རྒྱ་ཤན་སྦྱར་མ།
དེ་ཡང་། ཉི་ཆོས་བཟང་པོ་ནི་བོད་ལྗོངས་ལྷོ་ཕྱོགས་ཀྱི་སྣེ་གདོང་རྒྱལ་པོའི་བློན་པོ་བློ་རྣོ་བ་ཞིག་ཡིན། «ཉི་ཆོས་བཟང་པོའི་གཏམ་རྒྱུད»དུ། ཉི་ཆོས་བཟང་པོ་ནི་རང་ཉིད་ཀྱི་བློ་དང་རིག་པ། ཐབས་དང་ཤེས་པ་ལ་བརྟེན་ནས་འབངས་མི་སེར་གྱི་བདེ་སྡུག་བསམ་མཁན་ཞིག་དང་། འབངས་མི་སེར་གྱི་ཆེད་དུ་དབང་སྒྱུར་གྲལ་རིམ་གྱི་ཁ་གཏད་དུ་ལངས་ཐུབ་པའི་དཔའ་མཛངས་གཉིས་ལྡན་གྱི་མི་སྣ་ཞིག་ཏུ་བཞེངས་ཡོད་པ་རེད། དེ་ནི་སྐབས་དེའི་ཞིང་བྲན་མང་ཚོགས་ཀྱི་བསམ་བློའི་རེ་འབོད་ཅིག་ཡིན་ངེས་པས། བཙན་པོའི་གཉའ་གནོན་མི་འཁུར་ཞིང་གཉོམ་ཆུང་མཐའ་ནས་སྐྱོང་མཁན་དེ་འདྲ་ཞིག་ལ་རེ་ལྟོས་བྱེད་པ་ནི་སྐབས་དེའི་སྤྱི་ཚོགས་སུ་དཔེ་སྲིད་པ་ཞིག་སྟེ། དེ་བས། «ཉི་ཆོས་བཟང་པོའི་གཏམ་རྒྱུད»ཀྱང་རང་རེའི་བོད་ཀྱི«ཨ་ཁུ་སྟོན་པའི་གཏམ་རྒྱུད»དང་སོག་རིགས་ཀྱི«དཔལ་ལྷ་ཀུན་བཟང་གི་གཏམ་རྒྱུད།» ཡུ་གུར་རིགས་ཀྱི«ཨ་ཧྥན་ཐུའི་གཏམ་རྒྱུད»ནང་བཞིན་དམངས་ཁྲོད་དུ་དར་ཁྱབ་ཆེན་པོ་ཡོད་པ་རེད།
«ཉི་ཆོས་བཟང་པོའི་གཏམ་རྒྱུད་རིས་སྒྲུང་དཔེ་ཚོགས»ཞེས་པའི་ཡིག་རིས་དེབ་ཚོམས་འདི་ནི་རྩོམ་པ་པོ་འབྲོང་ཕྲུག་ལྷ་ཆེན་རྒྱལ་དང་རི་མོ་བ་ཀླུ་ཚང་བསོད་ནམས་འབུམ་གཉིས་ཀྱིས་མཉམ་འབྲེལ་སྒོས་ཇུས་འགོད་དང་བཅོས་སྒྲིག ཡིག་རིས་སུ་ཕབ་པ་ཡིན་ལ། བོད་ལྗོངས་མི་དམངས་དཔེ་སྐྲུན་ཁང་གི༡༩༨༠ལོའི་པར་གཞི་དང་པོ་གཞིར་བཟུང་བ་དང་། གཏམ་རྒྱུད་ཀྱི་དགོས་མཁོ་དང་ཡིག་རིས་དེབ་ཀྱི་ཁྱད་ཆོས་མངོན་པར་འདོན་ཆེད་འཕྲི་སྣོན་གང་འཚམ་ཞིག་ཀྱང་བྱས་ཡོད་ལ། རྒྱ་ཆེའི་ཞིང་འབྲོག་མང་ཚོགས་གཙོ་བྱས་རང་རེའི་སྐྱེས་བུ་རྒན་དར་གཞོན་ཆུང་ཀུན་གྱིས་གོ་ཐུབ་པའི་སྐད་ཆའི་སྦྱོར་བ་ཁོ་ན་བེད་སྤྱད་པར་མ་ཟད། རྒྱ་ཆེའི་ཀློག་པ་པོའི་སློབ་སྦྱོང་གི་ཁོར་ཡུག་ལ་བསྟུན་ནས་བོད་རྒྱ་ཡིག་རིགས་གཉིས་སུ་ཤན་སྦྱར་ནས་བཀོད་ཡོད་དོ། །
«ཉི་ཆོས་བཟང་པོའི་གཏམ་རྒྱུད་རིས་སྒྲུང་དཔེ་ཚོགས»ཞེས་པའི་ཡིག་རིས་དེབ་ཚོམས་འདིའི་ནང་དུ། བོད་ལྗོངས་ལྷོ་ཁ་སྣེ་གདོང་ཡུལ་གྱི་དམངས་ཁྲོད་དུ་དར་ཁྱབ་ཆེ་བའི་བློན་པོ་ཉི་ཆོས་བཟང་པོ་ཞེས་བློ་རིག་བཀྲ་ཞིང་དམངས་ལ་བྱམས་པ་ཞིག་ཡོད་པ་དེས། གདུག་རྩུབ་ཆེ་བའི་སྣེ་གདོང་རྒྱལ་བོ་གཙོ་བྱས་ཡུལ་དེའི་ཞིང་བདག་དང་ཕྱུགས་བདག་དག་གིས་མི་དམངས་མང་ཚོགས་ལ་ཁྲལ་དང་འུ་ལག་མཐོན་པོ་བླངས་ནས་གནར་གཅོད་གཏོང་བ་དག་གི་རྒྱབ་རྩར་ལངས་ནས་དཀའ་ངལ་སེལ་རོགས་བྱས་པའི་གཏམ་རྒྱུད་གཞིར་བཟུང་སྟེ། ཉི་ཆོས་བཟང་པོས་རང་གི་བློ་དང་རིག་པ་ལ་བརྟེན་ནས་སྣེ་གདོང་རྒྱལ་པོར་དཀའ་ལས་བཟོས་པ་དང་མང་ཚོགས་ལ་ཕན་བདེ་བསྐྲུན་པའི་གཏམ་རྒྱུད་བཅུ་ཙམ་རི་མོར་བྲིས་ཡོད། གཏམ་རྒྱུད་དེ་དག་ལས་ཉི་ཆོས་བཟང་པོའི་མི་གཤིས་བཟང་པོ་དང་བློ་རིག་རྣོན་པོ། གཞན་ཕན་གྱི་ལྷག་བསམ་ཚོར་ཐུབ་པར་མ་ཟད། ང་ཚོས་དུས་རྒྱུན་གྱི་སློབ་སྦྱོང་དང་འཚོ་བའི་ཁྲོད་དུ། རང་ལས་གཞན་གཅེས་ཀྱི་མི་གཞི་བཟང་པོ་ཞིག་ཆགས་དགོས་པར་རེ་བ་ནན་མོ་བཏང་ཡོད་པ་རེད།
ཡིག་རིས་དེབ་ཚོམས་འདི་སྒྲིག་མཁན་འབྲོང་ཕྲུག་ལྷ་ཆེན་རྒྱལ་དང་རི་མོ་བ་ཀླུ་ཚང་བསོད་ནམས་འབུམ་གཉིས།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注