སྒྲུང་དཔེ«ཁ་ཆེ་གཡུ་རྫོང»གི་དཔེ་རྙིང་ལག་བྲིས་མ།
«ཁ་ཆེ་གཡུ་རྫོང»གི་གླེགས་བམ་འདི་ནི། ཕ་ཡུལ་གོ་འཇོ་རྫོང་ཇོ་རུ་ཡུལ་ཚོ་ནས་ཡིན་པའི་བླ་མ་འཆི་མེད་ཚེ་རིང་གིས་ཆེད་དུ་བཀྲ་ཤིས་ཁྲི་གླིང་གེ་སར་བཤམས་སྟོན་ཁང་ལ་ཕུལ་བ་ཞིག་སྟེ། ཁོང་གིས་གསུང་རྒྱུར་འདི་ནི་ངའི་ཕ་སྐལ་བཟང་རྒྱལ་མཚན་དང་དེའི་ཕ་ཨ་ཕྱུག ཨ་དར། ཨ་ནང་གསུམ་གྱི་དུས་སུ་ཡོད་པ་ཞིག་ཡིན་པས་མི་ཐོག་གསུམ་ཙམ་བརྒལ་ཟིན་ལ། ང་རང་ལོ་དྲུག་ཅུ་ཡིན་ལ་ངའི་ཕ་དེ་ཚེ་དུས་ལས་ཡོལ་ཟིན་ཀྱང་། ད་ལྟར་ཡོད་པའི་དབང་དུ་བྱས་ན་ལོ99རེད། ཨ་མྱེས་ཆུང་བ་དེ་ངས་ཕྱོགས་ཙམ་དྲན་གྱིན་འདུག འོན་ཀྱང་ཨ་མྱེས་གཞན་གཉིས་པོ་སྔོན་ཆད་ནས་དུས་ལས་ཡོལ་ཟིན་འདུག ཡི་གེ་འདི་ལོ་ཡི་དབང་དུ་བྱས་ན་ལོ་བརྒྱ་ལྷག་ཅིག་སོང་ཡོད་པ་འདྲ་གསུངས།
ཞིབ་འཇུག་གནས་གཞིའི་ཉར་དངོས། གླིང་གེ་སར་གྱི་སྒྲུང་ལས«ཁ་ཆེ་གཡུ་རྫོང»དཔེ་རྙིང་ལག་བྲིས་མའི་གླེགས་བམ།
ལག་བྲིས་རྙིང་པའི་འབྲི་གཞི་བོད་ཤོག་དང་། སྣག་ཚས་བྲིས་པ་ཡིན།
«ཁ་ཆེ་གཡུ་རྫོང»གི་རྒྱུ་ཆ་དང་འབྲི་སྟངས།
གནའ་བོའི་སྲོལ་རྒྱུན་ལྟར་བོད་ཤོག་ཐོག་ཏུ་སྣག་ཚས་བཤར་མའམ་དབུ་མེད་ཀྱི་ཡིག་ཆེན་དང་ཡིག་ཆུང་སྤེལ་མར་བྲིས་ཡོད་པའི་མཚལ་མགོ་ཅན་ཞིག་སྟེ། ཡིག་གཟུགས་ཆེ་ཆུང་གང་ལ་བལྟས་ན་སྒྲོས་ཉམས་ལྡན་ལ་ཧ་ཅང་བཀླག་བདེ་བ་ཞིག་འདུག
གཞན་ཡང་། གླེགས་ཤིང་དང་གླེགས་ཐག གླེགས་ཆབ་དག་ཀྱང་མེས་པོ་གོང་མ་དག་གི་ཕྱག་ལས་འཕྱུག་མེད་དེ། མཐོང་བ་ཙམ་གྱིས་ཚོར་བ་དམིགས་བསལ་བ་རེ་སྟེར་གྱིན་འདུག མདོར་ན་ཤོག་གུ་དང་ཡིག་གཟུགས། གླེགས་ཤིང་དང་གླེགས་ཐག་སོགས་གང་ལ་བལྟས་ཀྱང་རིན་ཐང་དང་ལྡན་པ་ཞིག་ཡིན་པ་བཞུགས་སུ་གསོལ་ཡོད་པ་འདི་གའོ། །
ལག་བྲིས་རྙིང་པའི་སྒྲུང་གི་ཡིག་གཟུགས་དབུ་མེད་ཆེ་ཆུང་བྱས་ཏེ་བྲིས་ཡོད།
«ཁ་ཆེ་གཡུ་རྫོང»ཞེས་པ་ནི་གླིང་གེ་སར་སྐྱེས་བུ་ཆེན་པོའི་མཛད་པའི་རྣམ་ཐར་གྱི་ཡན་ལག་གཅིག་ཡིན། འདིའི་ནང་དུ་གཙོ་བོ་ཁ་ཆེ་ཡུལ་གྱི་ཁྲི་བརྟན་རྒྱལ་པོའི་གཙོས་ཁེངས་དྲེགས་ཀྱིས་ཕྱུག་པའི་སྡེ་ཚོགས་ཐམས་ཅད་ཆམ་ལ་ཕབ་སྟེ། ཡུལ་ཁམས་དེ་དག་ལུགས་གཉིས་ཀྱི་སྒོ་ནས་བདེ་ལ་བཀོད་དེ་འབངས་རྣམས་འཚོ་བ་རོལ་དུ་བཅུག རིན་ཆེན་གཡུ་ཡི་གཏེར་སྒོ་ཕྱེས་ཏེ་གླིང་དཀར་མཐོང་བ་ཀུན་སྨོན་དུ་གཡུ་ཡི་ནོར་འགྱེད་རྒྱ་ཆེར་མཛད་པ་སོགས་ཀྱིས་འབངས་ལ་བདེ་སྐྱིད་བསྐྲུན་པའི་ལོ་རྒྱུས་དག་བརྗོད་བྱར་བྱས་པ་ཞིག་གོ །
དཔེ་ཐག་གི་ཀོ་རྒྱུན་དང་གླེགས་ཆབ་དག་ལའང་རིན་ཐང་ལྡན།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注