མཚོ་བྱང་ཁུལ་གྱི་གྲོང་གསེབ་ཀྱི་ན་གཞོན་སྟོང་གཅིག་དང་བརྒྱད་བརྒྱ་སོ་དྲུག་གིས་སྤུས་ཚད་མཐོ་བའི་ལས་ཞུགས་མངོན་འགྱུར་བྱས།
ཟླ12པའི་ཚེས10ཉིན། གསར་འགོད་པས་མཚོ་བྱང་བོད་རིགས་རང་སྐྱོང་ཁུལ་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་ཅུའུ་ནས་རྒྱུས་ལོན་བྱུང་བ་ལྟར་ན། ད་ལོར། མཚོ་བྱང་ཁུལ་གྱིས་ན་གཞོན་མི་ཚོགས་ཀྱི་ལས་ཞུགས་ལས་སྐྲུན་ལ་སྐུལ་འདེད་གཏོང་རྒྱུ་དེ་སྤུས་ཚད་མཐོ་བའི་ལས་ཞུགས་ལ་སྐུལ་འདེད་གཏོང་བའི་བྱེད་ཐབས་གལ་ཆེན་དུ་བརྩིས་ནས། ན་གཞོན་ལས་ཞུགས་ཀྱི་ཞབས་ཞུའི་ཕྲེང་འབྲེལ་དང་ལས་སྐྲུན་གྱི་སྐྱེ་ཁམས་མུ་ཁྱུད་གསར་སྐྲུན་བྱས་པ་དང་། ལས་ཞུགས་ཀྱི་ཆུ་གསོག་རྫིང་བུ་ཕྱོགས་ཡོངས་ནས་རྒྱ་སྐྱེད། མིག་སྔའི་བར་དུ། མཚོ་བྱང་ཁུལ་གྱི་གྲོང་གསེབ་ཀྱི་ན་གཞོན་སྟོང་གཅིག་དང་བརྒྱད་བརྒྱ་སོ་དྲུག་གིས་སྤུས་ཚད་མཐོ་བའི་ལས་ཞུགས་མངོན་འགྱུར་བྱས།
མཚོ་བྱང་ཁུལ་གྱིས་རིགས་ཆེན་བདུན་གྱི་བྱེད་ཐབས་ཉེར་བརྒྱད་ཀྱི་ལས་འགན་གཙོ་བོ་གཏན་ཁེལ་གསལ་བོ་བྱས་ནས། དངོས་གཉེར་གྱི་སྲིད་ཇུས་བྱེད་ཐབས་ལ་བརྟེན་ནས་ན་གཞོན་གྱི་ལས་ཞུགས་བྱ་བ་ཇེ་བཟང་དང་ཇེ་ལེགས་སུ་སྤེལ་བར་སྣེ་ཁྲིད་བྱས་པ་དང་། རིགས་མི་འདྲ་བའི་རོགས་སྐྱོར་སྲིད་ཇུས་སྣ་ཚོགས་བཟང་བོར་སྤྱད་ལ། ཆ་རྐྱེན་དང་མཐུན་པའི་ན་གཞོན་ལས་སྐྲུན་མི་སྣར་གཏན་ཁེལ་ལྟར་སྒོར་འབུམ་གསུམ་ལས་མི་བརྒལ་བ་དང་། རོགས་སྒྲིག་ལས་སྐྲུན་བྱེད་མཁན་ལ་སྒོར་ས་ཡ་གཉིས་དང་འབུམ་གཉིས་ལས་མི་བརྒལ་བའི་ལས་སྐྲུན་འགན་ལེན་དངུལ་བུན་གྱི་རྒྱབ་སྐྱོར་འདོན་སྤྲོད་བྱས། མ་དངུལ་སྒོར་ས་ཡ་གཉིས་དང་འབུམ་གསུམ་གྱི་ལས་སྐྲུན་འགན་ལེན་དངུལ་བུན་སྟེར་བ་བརྒྱུད་དེ། ཐད་ཀར་ན་གཞོན་བཅུ་བཞི་ཡིས་ལས་ཞུགས་བྱེད་པར་རོགས་སྐྱོར་བྱས་པ་དང་། མི་ལྔ་བཅུ་ལྷག་གིས་ལས་ཞུགས་བྱེད་པར་སྣེ་ཁྲིད་བྱས། ལས་སྐྲུན་མི་སྣ་བཅུ་བཞི་ལ་ཐེངས་གཅིག་རང་བཞིན་གྱི་ལས་སྐྲུན་ཁ་གསབ་སྒོར་འབུམ་གཅིག་དང་ཁྲི་བཞི་བྱིན་པ་དང་། ཆ་རྐྱེན་དང་མཐུན་པའི་ན་གཞོན་མཐར་ཕྱིན་སློབ་མ་བཅུ་གཅིག་ལ་ཐེངས་གཅིག་རང་བཞིན་གྱི་ལས་སྐྲུན་ཁ་གསབ་སྒོར་ཁྲི་གཅིག་དང་སྟོང་གཅིག་བྱིན།
མཚོ་བྱང་ཁུལ་གྱིས་ན་གཞོན་སོགས་རིགས་མི་འདྲ་བའི་མི་ཚོགས་ལ་ཁ་ཕྱོགས་ནས་མི་སྟོང་བཞི་དང་བདུན་བརྒྱ་དང་གཅིག་ལ་སྲིད་གཞུང་གི་ཁ་གསབ་རང་བཞིན་གྱི་ལས་རིགས་རྩལ་ནུས་གསོ་སྦྱོང་བྱས། ཧྲན་ཏུང་གི་རོགས་སྐྲུན་མ་དངུལ་སྒོར་འབུམ་གཉིས་བརྩོན་ལེན་བྱས་ནས། མཚོ་བྱང་གི་ན་གཞོན་མཐར་ཕྱིན་སློབ་མ་བཞི་བཞི་རྩ་འཛུགས་བྱས་ནས་ཧྲན་ཏུང་དུ་མངག་སྟེ་གློག་ཚོང་དང་ལས་སྐྲུན་མཉམ་འབྲེལ་གྱི་ནུས་པ་མཐོར་འདེགས་གསོ་སྦྱོང་ལ་ཞུགས་སུ་བཅུག ན་གཞོན་མཐར་ཕྱིན་སློབ་མ་ཉིས་བརྒྱ་བསྡུས་ནས་རྒྱབ་སྐྱོར་གསུམ་དང་རོགས་སྐྱོར་གཅིག་གི་འཆར་གཞི་ལ་ཞུགས་སུ་བཅུག ལས་ཞུགས་དངོས་སྦྱོང་རྟེན་གཞི་ཞེ་བདུན་བཙུགས་ཏེ། མཐོ་རིམ་སློབ་གྲྭའི་མཐར་ཕྱིན་སློབ་མ་རེ་དགུར་དངོས་སྦྱོང་བྱེད་དུ་བཅུག་པ་དང་། ཧྲན་ཏུང་གི་ཁ་གཏད་རོགས་སྐྲུན་གྲོས་མཐུན་ལག་བསྟར་བྱས་ནས། ལོ་རེར་ཧྲན་ཏུང་གི་ལས་དོན་སྡེ་ཁག་གི་མཚོ་སྔོན་ལ་རོགས་སྐྱོར་བྱེད་པའི་ལས་རྐང་བཅུ་བརྩོན་བྱས་པ་དང་། ད་ལོར་མི་བདུན་དངོས་སུ་བསྡུ་ལེན་བྱས། ལོ་ཧྲིལ་བོར་མཐོ་རིམ་སློབ་གྲྭའི་མཐར་ཕྱིན་སློབ་མ་དགུ་བརྒྱ་དང་སོ་དགུ་ཐོ་འགོད་བྱས་པ་དང་། མི་བརྒྱད་བརྒྱ་དང་སོ་གསུམ་ལས་ཞུགས་བྱས།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注