ཁུལ་ཨུའི་རྒྱུན་ལས་ཨུ་ལྷན་གྱིས་གྲོས་ཚོགས་འཚོགས།

ཁུལ་ཨུའི་རྒྱུན་ལས་ཨུ་ལྷན་གྱིས་གྲོས་ཚོགས་འཚོགས། 

ཟླ11པའི་ཚེས11ཉིན། ཁུལ་ཨུའི་ཧྲུའུ་ཅི་ཤ་བོ་སྐྱབས་ཀྱིས་མངགས་བཅོལ་ལྟར། ཁུལ་ཨུའི་ཧྲུའུ་ཅི་གཞོན་པའམ་ཁུལ་དཔོན་ཀྲང་ཧྲིང་ཡོན་གྱིས་གཙོ་སྐྱོང་གནང་སྟེ་ཁུལ་ཨུའི་སྐབས་བཅུ་གསུམ་པའི་རྒྱུན་ལས་ཨུ་ལྷན་གྱི་གྲོས་ཚོགས80འཚོགས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ཉེ་དུས་ཀྱི་གསུང་བཤད་མཛུབ་སྟོན་གལ་ཆེན་དང་། ཀྲུང་དབྱང་དང་ཞིང་ཆེན་ཏང་ཨུའི་འབྲེལ་ཡོད་ཚོགས་འདུའི་ཡིག་ཆའི་དགོངས་དོན་བརྒྱུད་སྒྲོག་དང་སློབ་སྦྱོང་བྱས། འབྲེལ་ཡོད་བྱ་བའི་སྙན་ཞུར་ཉན་པ་དང་། འབྲེལ་ཡོད་ཡིག་ཆར་གྲོས་ཞིབ་གནང་།

ཚོགས་འདུའི་ཐོག་བསྟན་དོན། ཟླ10པའི་ཚེས28ཉིན་འཚོགས་པའི་ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཚོགས་འདུའི་དགོངས་དོན་སློབ་སྦྱོང་དོན་འཁྱོལ་བྱེད་དགོས་པ་དང་། ཞིང་ཆེན་ཏང་ཨུའི་སྐོར་ཞིབ་བྱ་བའི་བཀོད་སྒྲིག་བླང་བྱ་མཐའ་གཅིག་ཏུ་ལག་བསྟར་བྱེད་པ། ཞིང་ཆེན་ཏང་ཨུའི་སྐོར་ཞིབ་ཚན་ཆུང་གི་བྱ་བ་སོ་སོའི་བཀོད་སྒྲིག་ལ་མཐའ་གཅིག་ཏུ་བརྩི་ལེན་བྱས་ཏེ་རང་འགུལ་ངང་སྐོར་ཞིབ་ལྟ་སྐུལ་དང་ལེན་བྱེད་དགོས། "དོན་འཁྱོལ་བཞི"ལ་དམིགས་ནས་རང་བཤེར་རང་བཅོས་གཏིང་ཟབ་ཏུ་སྤེལ་བ་དང་གནད་དོན་དང་མི་འདང་ས་ཁྱོན་ཡོངས་ནས་མཐིལ་རྟོགས་བྱས་ཏེ་འཕྲལ་ཤེས་འཕྲལ་བཅོས་དང་འཕྲལ་སྒྲུབ་འཕྲལ་བཅོས་མཐའ་གཅིག་ཏུ་བྱེད་དགོས། ཆབ་སྲིད་ཀྱི་སྒྲིག་ཁྲིམས་དང་ཆབ་སྲིད་ཀྱི་སྒྲིག་ལམ་ནན་སྲུང་བྱས་ནས་ཏང་སྲོལ་སྲིད་གཙང་འཛུགས་སྐྱོང་དང་རུལ་སུངས་ལ་ངོ་རྒོལ་བྱེད་པའི་འཐབ་རྩོད་ལ་སྐུལ་འདེད་གཏིང་ཟབ་གཏོང་བ་དང་། མངོན་མེད་གཞན་འགྱུར་གྱི"སྤྱོད་ཚུལ་བཞིའི"གནད་དོན་བཅོས་སྒྲིག་མཐའ་གཅིག་ཏུ་བྱས་ཏེ་ཁུལ་ཡོངས་ཀྱི་སྤྱོད་གཙང་གཞུང་དྲང་གི་ཆབ་སྲིད་སྐྱེ་ཁམས་སྲ་བརྟན་དུ་གཏོང་དགོས་ཟེར། 

ཚོགས་འདུའི་ཐོག་ནན་གྱིས་བསྟན་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སྐབས་ཉི་ཤུ་པའི་ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཐུན་མོང་སློབ་སྦྱོང་ཐེངས་བཅུ་བདུན་པའི་ཐོག་གནང་བའི་གསུང་བཤད་གལ་ཆེན་ལ་སློབ་སྦྱོང་དང་ལག་བསྟར་གཏིང་ཟབ་བྱས་ཏེ་བསམ་བློ་རིག་གནས་བྱ་བའི་དུས་བབ་གསར་བ་དང་ལས་འགན་གསར་བ་ཁོང་དུ་གཏིང་ཟབ་ཆུད་པར་བྱེད་དགོས་པ་དང་། རིག་གནས་ཀྱི་གདེང་ཚོད་བརྟན་དུ་བཏང་ནས་དུས་རབས་གསར་བ་དང་རིག་གནས་ཀྱི་ལས་འགན་གསར་བ་ཕྲག་ཐོག་ཏུ་ཏན་ཏིག་འཁུར་ཏེ་ཁུལ་ཡོངས་ཀྱི་རིག་གནས་བྱ་བ་སྤུས་ཚད་མཐོན་པོའི་སྒོ་ནས་འཕེལ་རྒྱས་འགྲོ་རྒྱུར་སྐུལ་འདེད་གཏོང་དགོས། ཏང་གི་གསར་གཏོད་རིགས་པའི་གཞུང་ལུགས་ལ་བརྟེན་ནས་སེམས་ཤུགས་གཅིག་སྒྲིལ་དང་བློ་སྒྲིལ་སེམས་སྐྱེད་བྱ་རྒྱུ་རྒྱུན་འཁྱོངས་ལྷོད་མེད་བྱས་ཏེ་སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་རྒྱ་ཁྱབ་ངང་སྐྱེད་སྲིང་དང་ལག་ལེན་བསྟར་ནས་རིག་གནས་བྱ་གཞག་དང་རིག་གནས་ཐོན་ལས་འཕེལ་རྒྱས་ལ་སྐུལ་འདེད་ཤུགས་ཆེན་བཏང་སྟེ་མཚོ་བྱང་གི་བསམ་བློ་རིག་གནས་དྲིལ་སྒྲོག་བྱ་བ་སྐས་རིམ་གསར་བ་ཞིག་ཏུ་སླེབས་པ་དང་རྣམ་པ་གསར་བ་གཏོད་རྒྱུར་རྒྱུན་ཆད་མེད་པར་སྐུལ་འདེད་གཏོང་དགོས། མཚོ་སྔོན་གྱི་རིག་གནས་དར་རྒྱས་གོང་འཕེལ་ལ་སྐུལ་འདེད་གཏོང་བའི་དམིགས་འབེན་གསར་བ་གཏན་འཁེལ་བྱེད་པ་དང་། "རིག་གནས་ལྔ"འཛུགས་སྐྲུན་བྱེད་པར་དམིགས་ཤིང་། ཀྲུང་གོའི་རྡུལ་ཕྲན་མཁར་གསར་བརྗེའི་ཐོན་ཁུངས་ལ་བརྟེན་ནས་མཚོ་བྱང་གི་ཁྱད་ཆོས་ལྡན་པའི་གསར་བརྗེའི་ཉམས་ཞིབ་ཐོན་ལས་གསོ་སྐྱོང་དང་འཕེལ་རྒྱས་ཤུགས་ཆེན་གཏོང་དགོས་ཟེར། 

ཚོགས་འདུའི་ཐོག་བསྟན་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཞིང་ཆེན་དང་པུའུ་རིམ་པའི་མགོ་ཁྲིད་ལས་བྱེད་པ་གཙོ་བོའི་ཆེད་དོན་ཞིབ་བསྡུར་འཛིན་གྲྭའི་མགོ་རྩོམ་མཛད་སྒོའི་ཐོག་གནང་བའི་གསུང་བཤད་གལ་ལ་ཆེན་སློབ་སྦྱོང་དང་ལག་བསྟར་གཏིང་ཟབ་བྱེད་དགོས་པ་དང་། ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་བཅོས་སྒྱུར་བཀོད་སྒྲིག་གལ་ཆེན་ལ་དཔེ་བསྡུར་བྱེད་པ་དང་ཞིང་ཆེན་དང་ཁུལ་ཨུའི་ཚང་འཛོམས་གྲོས་ཚོགས་ཀྱི་བཀོད་སྒྲིག་གཞིར་བཟུང་ནུས་ཤུགས་ཡོད་རྒུས་བཅོས་སྒྱུར་གྱི་ལས་འགན་སོ་སོ་མཚོ་བྱང་དུ་དོན་འཁྱོལ་དང་ཕན་འབྲས་ཐོན་རྒྱུར་སྐུལ་འདེད་གཏོང་དགོས། སྐྱེ་ཁམས་དཔལ་ཡོན་དང་དཔལ་འབྱོར་སྒྲིག་སྲོལ། དམངས་འཚོའི་ཁྱབ་ཁོངས། ཏང་གི་འཛུགས་སྐྱོང་སོགས་གཙོ་གནད་ཁྱབ་ཁོངས་བཅོས་སྒྱུར་གྱི་འབྲེལ་ཡོད་བྱེད་ཐབས་ལག་བསྟར་གཏིང་ཟབ་བྱེད་པ་དང་། གཟེར་འདེབས་ཀྱི་སྙིང་སྟོབས་ལ་བརྟེན་ནས་ཏང་ཀྲུང་དབྱང་གི་བཅོས་སྒྱུར་བྱེད་ཐབས་གལ་ཆེན་ཞིབ་ཕྲ་ཅན་དང་དངོས་ཡོད་ཅན་དུ་ཏན་ཏིག་གཏོང་དགོས། ཞིང་ཆེན་དང་ཁུལ་གྱི་ཚང་འཛོམས་གྲོས་ཚོགས་ཐོག་གཏན་ལ་ཕབ་པའི་དམིགས་འབེན་དང་ལས་འགན་ལ་རང་འགུལ་གྱིས་དཔེ་བསྡུར་ཚད་འཛིན་བྱས་ནས་སྲིད་ཇུས་ཞིབ་འཇུག་བྱེད་ཤུགས་ཆེ་རུ་གཏོང་བ་དང་། བྱ་བའི་ལམ་སྲོལ་འཐུས་ཚང་དུ་གཏོང་བ། ཚན་རིག་དང་མཐུན་པའི་ཇུས་འགོད་དང་བཀོད་སྒྲིག་བྱེད་པ། བཅོས་སྒྱུར་གྱི་སྒྲིལ་ཤུགས་གཅིག་བསྡུས་བཅས་བྱས་ཏེ་བློ་བརྟན་འགྱུར་མེད་ཀྱི་སེམས་ཤུགས་བརྟན་པོས་བཅོས་སྒྱུར་བྱེད་ཐབས་དོན་འཁྱོལ་དང་ཕན་འབྲས་ཐོན་པར་སྐུལ་འདེད་གཏོང་དགོས་ཟེར།

ཚོགས་འདུའི་ཐོག་ནན་གྱིས་བསྟན་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཧྥུའུ་ཅན་དང་ཨན་ཧུའེ་རུ་རྟོག་ཞིབ་སྐབས་གནང་བའི་གསུང་བཤད་གལ་ཆེན་གྱི་དགོངས་དོན་ལ་སློབ་སྦྱོང་དང་ལག་བསྟར་གཏིང་ཟབ་བྱེད་དགོས་པ་དང་། རང་འགུལ་ངང་དཔལ་འབྱོར་གྱི་དམིགས་ཚད་སོ་སོར་དཔེ་བསྡུར་བྱེད་པ་དང་དཔལ་འབྱོར་འཁོར་སྐྱོད་བཀོད་གཏོང་ལ་ཤུགས་བསྣན་ནས་དུས་ཐོག་ཏུ་གནད་དོན་ཤེས་རྟོགས་དང་འགུལ་རྣམ་ཁོང་དུ་ཆུད་པ། འཕེལ་ཕྱོགས་ཞིབ་འཇུག་དང་བརྡར་ཤ་གཅོད་པ། དོན་འཁྱོལ་དམ་འཛིན་བཅས་བྱས་ཏེ་ནུས་ཤུགས་ཡོད་རྒུས་དམིགས་འབེན་འགན་སྲུང་དང་གནས་འཕར་བརྩོན་ལེན་བྱེད་དགོས། སྐྱེ་ཁམས་ཞིང་ཕྱུགས་ལས་ཀྱི"གཅིག་ཅན་དགུའི"བཟོ་སྐྲུན་གྱི་ཚད་འདེགས་རྒྱ་སྐྱེད་ལ་ནུས་ཤུགས་ཡོད་རྒུས་སྐུལ་འདེད་གཏོང་བ་དང་། ཁྱད་ལྡན་ཞིང་ཕྱུགས་ཐོན་རྫས་ལས་སྣོན་ཞིབ་ཚགས་བྱེད་པའི་ཐོན་ལས་སྐྱེད་སྲིང་ཤུགས་ཆེན་བྱས་ཏེ། ཞིང་ཕྱུགས་ཐོན་རྫས་ཀྱི་ཟུར་སྣོན་རིན་ཐང་ཁྱོན་ཡོངས་ནས་མཐོ་རུ་གཏོང་དགོས། འོད་ཤུགས་དང་རླུང་གློག་རྟེན་གཞི་ཅན་དང་གཞི་ཁྱོན་ཅན་དུ་གསར་སྤེལ་བྱེད་པར་སྐུལ་འདེད་ཧུར་ཐག་གཏོང་བ་དང་། བདེ་འཇགས་རིག་ནུས་རྩིས་ནུས་ལྟེ་གནས་དང་ཁུངས་དྲ་ཐེག་གསོག་གཞི་གཅིག་ཅན་གྱི་ལས་གཞི་སོགས་འཛུགས་སྐྲུན་ལ་སྐུལ་འདེད་ཏན་ཏིག་བཏང་སྟེ་ཁུལ་ཡོངས་ཀྱི་གཙོ་གནད་བཟོ་ལས་གླིང་ཁུལ10རིགས་སྒྱུར་རིམ་སྤར་བྱེད་པར་སྐུལ་འདེད་ཇེ་མགྱོགས་སུ་གཏོང་དགོས། ཇུས་འགོད་ཞིབ་ཚགས་དང་དྲིལ་སྒྲོག་བྱེད་ཤུགས་ཆེ་རུ་བཏང་ནས"དགུན་དུས་མཚོ་བྱང་ཡུལ་སྐོར"གྱི་མཚན་སྙན་དང་ཡིད་དབང་འཕྲོག་ཤུགས་སྔར་ལས་ཆེ་རུ་བཏང་སྟེ། དགུན་དུས་ཡུལ་སྐོར་གྱི"མེ་སྒྱོགས་དང་པོ"ཕྱོགས་ཡོངས་ནས་རྒྱག་དགོས། ཏང་གི་སྒྲིག་ཁྲིམས་སློབ་སྦྱོང་སློབ་གསོ་རྒྱུན་རྣམ་ཅན་དང་ཕུགས་ཕན་ཅན་དུ་འགྱུར་བར་སྐུལ་འདེད་ཏན་ཏིག་གཏོང་བ་དང་། "གཞི་རིམ་དུ་བསྐྱོད་པ་བཞི"ཡི་ལམ་ལུགས་ཁྱོན་ཡོངས་ནས་དོན་འཁྱོལ་བྱེད་པ། ཕྱི་ཚུལ་རིང་ལུགས་བཅོས་སྐྱོང་རྒྱུན་མཐུད་བྱས་ནས་གཞི་རིམ་གྱི་ཁུར་བོ་ཇེ་ཡང་དུ་གཏོང་དགོས་ཟེར།

ཚོགས་འདུའི་ཐོག་བསྟན་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་དམངས་སྲིད་བྱ་བའི་ཐད་གནང་བའི་མཛུབ་སྟོན་གལ་ཆེན་གྱི་དགོངས་དོན་ལ་སློབ་སྦྱོང་དང་ལག་བསྟར་གཏིང་ཟབ་བྱེད་དགོས་པ་དང"ཀྲུང་གོའི་རྣམ་པའི་དེང་རབས་ཅན་ལ་དམངས་འཚོ་ནི་ཆེས་གལ་ཆེ་བ་ཡིན"ཞེས་པའི་ཡང་སྙིང་ལ་གོ་བ་གཏིང་ཟབ་བླངས་ནས། དཀའ་ངལ་ཡོད་པའི་མང་ཚོགས་ཀྱི་བདེ་སྡུག་སེམས་ལ་བཟུང་སྟེ་མིག་གིས་འཚོ་དགོས། རིམ་དབྱེ་རིགས་དབྱེའི་སྤྱི་ཚོགས་རོགས་སྐྱོབ་མ་ལག་འཐུས་ཚང་དུ་གཏོང་བ་དང་བྱིས་པ་དང་དབང་བོ་སྐྱོན་ཅན་གྱི་ཕན་བདེའི་ལམ་ལུགས་འཐུས་ཚང་དུ་གཏོང་བ། རྒན་གསོའི་ཞབས་ཞུའི་མ་ལག་སྔར་བས་འཐུས་ཚང་དུ་གཏོང་བ་དང་པུར་འཇུག་ཞབས་ཞུའི་ཁྲོམ་རའི་སྒྲིག་ལམ་ཚད་ལྡན་དུ་གཏོང་རྒྱུར་ཤུགས་སྣོན་པ་དང་། གཉེན་སྒྲིག་དོ་དམ་ཞབས་ཞུ་རྒྱུན་མཐུད་ངང་ཇེ་ལེགས་སུ་བཏང་ནས་ཁུལ་ཡོངས་ཀྱི་དམངས་སྲིད་བྱ་གཞག་སྤུས་ཚད་མཐོན་པོའི་སྒོ་ནས་འཕེལ་རྒྱས་འགྲོ་རྒྱུར་སྐུལ་འདེད་གཏོང་དགོས། དམངས་སྲིད་ཞབས་ཞུའི་སྒྲིག་གཞིའི་སྒྲིག་བཀོད་སྣ་ཚོགས་ཀྱི་དོ་དམ་འགན་འཁྲི་ནན་དུ་གཏོང་བ་དང་། བདེ་འཇགས་དོ་དམ་བྱེད་ནུས་དང་མཁོ་བསྟུན་ཐག་གཅོད་བྱེད་ནུས། གླེང་ཕྱོགས་ལ་ཁ་གཏད་འཇལ་ནུས་བཅས་ཆེ་རུ་བཏང་ནས་ཉེན་ཁ་དང་མངོན་མེད་རྐྱེན་ངན་སྣ་ཚོགས་སྔོན་འགོག་ནུས་ལྡན་བྱ་དགོས་ཟེར།

ཚོགས་འདུའི་ཐོག་ནན་གྱིས་བསྟན་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་དམག་ཡོངས་ཀྱི་དམག་དོན་རིགས་པའི་གཞུང་ལུགས་བྱ་བའི་ཚོགས་འདུའི་ཐོག་གནང་བའི་མཛུབ་སྟོན་གལ་ཆེན་གྱི་དགོངས་དོན་ལ་སློབ་སྦྱོང་དང་ལག་བསྟར་གཏིང་ཟབ་བྱེད་དགོས་པ་དང་། ཏང་གིས་དྲག་ཆས་ལ་དོ་དམ་བྱེད་པའི་ལམ་ལུགས་སོ་སོ་ལག་བསྟར་ཡག་པོ་དང་ཏན་ཏིག་བྱས་ནས་ཏང་གིས་དྲག་ཆས་ལ་དོ་དམ་བྱེད་པའི་བྱ་བ་དོན་འཁྱོལ་བྱ་རྒྱུར་སྐུལ་འདེད་ཏན་ཏིག་གཏོང་དགོས། ཚད་གཞི་མཐོ་བ་དང་བླང་བྱ་ནན་མོའི་སྒོ་ནས་ཁུལ་ཨུའི་དམག་དོན་གྲོས་མོལ་ཚོགས་འདུའི་ཐོག་གཏན་འཁེལ་བྱས་པའི་དོན་ཚན་དོན་འཁྱོལ་ཡག་པོ་བྱས་ཏེ། ཏང་གིས་དྲག་ཆས་ལ་དོ་དམ་བྱེད་པའི་ནུས་པ་དང་ཆུ་ཚད་རྒྱུན་ཆད་མེད་པར་མཐོ་རུ་གཏོང་དགོས། མཚོ་བྱང་གི་ཕུན་སུམ་ཚོགས་པའི་གསར་བརྗེའི་ཐོན་ཁུངས་བེད་སྤྱོད་ཡག་པོ་བྱེད་པ་དང་། རྒྱལ་སྲུང་སློབ་གསོ་དང་དམག་དོན་རིགས་པའི་གཞུང་ལུགས་གསོ་སྐྱོང་བྱེད་ཤུགས་ཆེ་རུ་བཏང་ནས་གསར་བརྗེའི་གཞི་རྒྱུ་བླ་སྲོག་ཏུ་ཟུག་སྟེ་ཁྲག་རྒྱུན་དུ་འདྲེས་པར་བྱ་དགོས་ཟེར།

ཚོགས་འདུའི་ཐོག་བསྟན་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས"སྦྲང་ཟ་གྲོག་རུལ"ལ་ཆད་གཅོད་བྱས་ནས་རུལ་སུངས་ལ་ངོ་རྒོལ་བྱེད་པའི་འཐབ་རྩོད་གཞི་རིམ་དུ་སྣུར་སྲིང་བྱ་རྒྱུར་སྐུལ་འདེད་གཏོང་བ་དང"པུར་འཇུག་ནི་དུད་ཚང་ཁྲི་སྟོང་མང་པོ་དང་འབྲེལ་བ་ཡོད་པའི་དམངས་འཚོའི་གནད་དོན་ཞིག་ཡིན་པ"སོགས་ཀྱི་མཆན་བཀོད་མཛུབ་སྟོན་གྱི་དགོངས་དོན་ལ་ལག་བསྟར་དོན་འཁྱོལ་གཏིང་ཟབ་བྱེད་དགོས་པ་དང་། མང་ཚོགས་ཉེ་འགྲམ་གྱི་ཚུལ་མིན་སྤྱོད་ཚུལ་དང་རུལ་སུངས་ཀྱི་གནད་དོན་གཅིག་སྡུད་ཐོག་བཅོས་སྒྲིག་བྱ་རྒྱུར་སྐུལ་འདེད་གཏིང་ཟབ་གཏོང་བ་དང་པུར་འཇུག་ཁྱབ་ཁོངས་ཀྱི་རུལ་སུངས་དང་ཟང་ཟིང་ལ་ཆེད་དོན་བཅོས་སྒྲིག་བྱ་བ་ཏན་ཏིག་སྤེལ་ཏེ། མང་ཚོགས་ཀྱི་བདེ་རྩར་ཐུག་པའི་ཁེ་ཕན་ལ་གནོད་འཚེ་གཏོང་བའི་རུལ་སུངས་ཀྱི་གྱོད་གཞི་ཁག་ཅིག་ཞིབ་བཤེར་ཐག་གཅོད་མཐའ་གཅིག་ཏུ་བྱེད་པ་དང་། མང་ཚོགས་ཀྱིས་ཚོར་ཐུབ་པའི་དོན་དངོས་སྒྲུབ་ནས། དངོས་སྒྲུབ་འགན་འཁུར་ལ་བརྟེན་ནས་ཞིང་ཆེན་ཏང་ཨུའི"ལས་བྱེད་པས་བྱ་བ་སྒྲུབ་པ་དང་བསམ་ཕྱོགས་གསལ་བ། རང་གཅུན་ནན་མོ་བྱེད་པ"བཅས་ཀྱི་བླང་བྱ་དོན་འཁྱོལ་ཡག་པོ་བྱ་དགོས་ཟེར།

ཁུལ་གྱི་མགོ་ཁྲིད་ལིའུ་ཏུང་དང་ཧ་ཝུན་ཞུག་གིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་ལ་ཐོས་བསམ་མྱོང་རྟོགས་བྱས་པའི་སྐོར་ནས་བྱ་བའི་དོན་དངོས་དང་ཟུང་འབྲེལ་གྱིས་བགྲོ་གླེང་གཏམ་བཤད་བྱས།

ཚོགས་འདུའི་ཚོག་དོན་ཚན་གཞན་དག་ལ་ཞིབ་འཇུག་བྱས།