ཀང་ཧྥུའུ་ཡིས་ཨ་མྱེས་སྟོང་སོ་ལྗོངས་ཁུལ་གྱི་འཛུགས་སྐྲུན་ལ་བརྟག་ཞིབ་རྟོག་འདོམས་བྱས།

ཀང་ཧྥུའུ་ཡིས་ཨ་མྱེས་སྟོང་སོ་ལྗོངས་ཁུལ་གྱི་འཛུགས་སྐྲུན་ལ་བརྟག་ཞིབ་རྟོག་འདོམས་བྱས།

ཟླ11པའི་ཚེས3ཉིན། རྫོང་ཨུའི་ཧྲུའུ་ཅི་ཀང་ཧྥུའུ་ཨ་མྱེས་སྟོང་སོ་མཛེས་ལྗོངས་ཁུལ་དུ་དགུན་དུས་གནས་སྐོར་ཐོན་ལས་འཕེལ་རྒྱས་དང་དགུན་དུས་གངས་འཁྱག་གནས་སྐོར་རྣམ་གྲངས་འཛུགས་སྐྲུན་སོགས་ཀྱི་ལས་དོན་ལ་བརྟག་ཞིབ་དང་རྟོག་འདོམས་སུ་ཕྱིན།

ཀང་ཧྥུའུ་ཡིས་སྔ་རྗེས་སུ་ཆུ་ལམ་བཅོས་སྐྱོང་དང་། མཛེས་ལྗོངས་ཁུལ་གྱི་སྒྲིག་བཀོད་འཛུགས་སྐྲུན། ལྗོངས་ཁུལ་གྲུབ་སྟངས་སོགས་ལ་གཟིགས་ཞིབ་དང་ཤེས་རྟོགས་བྱས་ཤིང་། ཨ་མྱེས་སྟོང་སོ་ཡི་དགུན་དུས་གནས་སྐོར་རྣམ་གྲངས་ཀྱི་སྤྱིའི་འཆར་འགོད་བཀོད་སྒྲིག་དང་། མཛེས་ལྗོངས་ཁུལ་འཛུགས་སྐྲུན། ཐོན་རྫས་གསར་སྤེལ་བཅས་ཀྱི་གནས་ཚུལ་ལ་རྒྱུས་ལོན་ཞིབ་ཕྲ་བྱས་པ་དང་འབྲེལ་མཛེས་ལྗོངས་ཁུལ་གྱི་རང་བྱུང་ཁུལ་གྱི་སྐྱེ་ཁམས་མངོན་གསལ་དོད་པོ་དང་། ཐོན་རྫས་མ་ལག་ཕུན་སུམ་ཇེ་ཚོགས་སུ་གཏོང་བ། འགྲུལ་ཁུངས་ཁྲོམ་ར་རྒྱ་བསྐྱེད་པ། ཞབས་ཞུའི་སྤུས་ཚད་མཐོར་གཏོང་སོགས་ཐད་འབྲེལ་ཡོད་སྡེ་ཚན་གྱི་འགན་འཁུར་བ་དང་སྤེལ་རེས་གྲོས་བསྡུར་བྱས།

ཀང་ཧྥུའུ་ཡིས“དགུན་དུས་མདོ་ལར་སྐོར་བའི”ལས་དོན་སྤེལ་འགོ་ཚུགས་ཤིང་། “ཞིང་ལས་ལུས་རྩལ་རིག་གནས་གནས་སྐོར་ཚོང་ལས”དང་ལས་རྣམ་མང་པོ་མཉམ་དུ་སྤེལ་བ་དང་མཉམ་དུ་སྐུལ་འདེད་གཏོང་བའི་འཕེལ་རྒྱས་ཀྱི་འདུ་ཤེས་གསར་བ་དང་བསམ་ཕྱོགས་གསར་བ་མཐའ་འཁྱོངས་བྱས་ཏེ“མདོ་ལར་ཕྱིན་ཚེ་རི་གཞན་བལྟ་འདོད་མེད”པ་ཡི་མཛེས་ལྗོངས་ཉམས་འགྱུར་དང་གངས་འཁྱགས་ཐོན་ཁུངས་ཀྱིས་གྲོང་ཁྱེར་དང་གྲོང་གསེབ་ཀྱི་མང་ཚོགས་ལ་དཔལ་འབྱོར་འཕེལ་རྒྱས་དང་ཡོང་འབབ་འཕར་སྣོན་ཡོང་རྒྱུར་རོགས་རམ་བྱེད་དགོས། མདོ་ལའི་ཁངས་འབབ་སྔ་བ་དང་འབབ་ཡུན་རིང་བ་སོགས་ཀྱི་ལེགས་ཆ་འདོན་སྤེལ་གང་ལེགས་བྱས་ཏེ་གངས་འཁྱགས་གནས་སྐོར་འཕེལ་རྒྱས་ཀྱི་བསམ་ཕྱོགས་སྔར་བས་གསལ་བོ་བཟོ་བ་དང་། རང་ངོས་ཀྱི་ལེགས་ཆར་གཞི་ཚུགས་པ། གངས་འཁྱགས་ཡུལ་སྐོར་གྱི་ཁྱད་ཆོས་ལ་གཞིགས་ནས“དགུན་དུས་མདོ་ལར་སྐོར་བའི”ཁྲོད་ཆས་རྟགས་འཛུགས་པའི་འདུ་ཤེས་དང་། གངས་འཁྱགས་གནས་སྐོར་རྣམ་གྲངས་གསར་སྤེལ་བྱེད་རིམ་ལ་སྐུལ་འདེད་མགྱོགས་སུ་གཏོང་བ། གནས་སྐོར་བ་སྔར་བས་མང་པོ་ལ་གངས་འཁྱགས་ཀྱིས་སྦྱིན་པའི་སྤྲོ་སྣང་ལ་ཉམས་སུ་མྱོང་བའི་མདོ་ལའི་ཁྱད་ཆོས་འབུར་ཐོན་གྱི་གནས་སྐོར་ཐོན་རྫས་སྤུས་ལེགས་བཏོད་ནས་དགུན་དུས་མདོ་ལའི་གནས་སྐོར་གྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་དགོས་ཞེས་བསྟན།

ཀང་ཧྥུའུ་ཡིས་གནས་སྐོར་ནི་ལྗང་མདོགGDPཡིན་ལ། ལྗང་མདོག་གནས་སྐོར་འཕེལ་རྒྱས་གཏོང་བ་དང་། “དགུན་དུས་མདོ་ལ་སྐོར་བ”ལ་བཀྲག་མདངས་སྣོན་པར་དགུན་དུས་མདོ་ལ་རིང་མོར་གནས་སྐོར་བྱེད་པའི་རྩ་བ་དང་བླ་སྲོག་ལ་དམ་འཛིན་བྱས་ཏེ་དགུན་དུས་ཀྱི་གནས་སྐོར་ལས་རིགས་ཀྱི་ཐོན་རྫས་ཕུན་སུམ་ཇེ་ཚོགས་སུ་གཏོང་བ་དང་། ཁྲོམ་རའི་བྱེད་པོ་དེ་བས་མང་བ་སྐྱེད་སྲིང་བྱེད་པ། དྲིལ་སྒྲོག་འོས་སྦྱོར་བྱེད་ཤུགས་རྒྱུན་མཐུད་ཆེ་རུ་གཏོང་བ། དགུན་དུས་ཀྱི་གནས་སྐོར་འཕེལ་ཤུགས་ཆེ་རུ་བཏང་སྟེ“གངས་འཁྱགས་རི་ཀློང”དཔལ་འབྱོར་སྤྱི་ཚོགས་འཕེལ་རྒྱས་གཏོང་བའི“གསེར་དངུལ་རི”རུ་བསྒྱུར་དགོས། དེ་དང་ཆབས་ཅིག་གནས་སྐོར་བདེ་འཇགས་དེ་གལ་ཆེའི་ནང་གི་འགངས་ཆེན་དུ་བརྩིས་ནས་ཁེ་ལས་དང་སྡེ་ཚན་དབར་གྱི་གཞོགས་འདེགས་ལ་ཤུགས་སྣོན་རྒྱག་པ་དང་། སེམས་ཤུགས་གཅིག་སྒྲིལ་གྱིས་ཨར་ལས་བདེ་འཇགས་དང་བཟའ་བཅའ། མལ་ཁང་། དྲོད་སྲུང་སོགས་ཀྱི་བདེ་འཇགས་འགན་ལེན་ལས་དོན་ཧུར་ཐག་གིས་བསྒྲུབས་ཏེ་གནས་སྐོར་བ་ཡོང་བར་བློ་བདེ་པོ་དང་། གནས་སྐོར་ལ་བློ་བདེ་པོ། སྤྲོ་གསེང་ལ་བློ་བདེ་བོ་ཡོང་བ་བཅས་བྱེད་དགོས། ཁྲོམ་རའི་དགོས་མཁོ་ཕྱོགས་སྟོན་དུ་བྱས་ཏེ་ཁྲོམ་ར་ཅན་གྱི་བྱེད་ཐབས་སྤྱད་དེ་གཉེར་སྐྱོང་བྱེད་སྟངས་འཚོལ་ཞིབ་དང་གནས་སྐོར་འཛད་སྤྱོད་ཀྱི་བོགས་ནུས་འཕེལ་བ་བྱས་ནས་དཔལ་འབྱོར་འཕར་རྒྱུར་སྐུལ་ཁྲིད་ནུས་ལྡན་བྱེད་དགོས། ཞབས་ཞུའི་བྱ་སྤྱོད་ཚད་ལྡན་དུ་གཏོང་བ་དང་གནས་སྐོར་ཐོན་རྫས་ཀྱི་ཞབས་ཞུའི་སྤུས་ཚད་མཐོ་རུ་བཏང་ནས་གནས་སྐོར་བའི་གནས་སྐོར་གྱི་མྱོང་ཚོར་དང་བློ་ཡིད་ཚིམ་ཚད་ཟམ་མི་ཆད་པར་མཐོ་རུ་གཏོང་དགོས་ཞེས་ནན་གྱིས་བསྟན། 

དེ་དང་ཆབས་ཅིག་རིག་གནས་གནས་སྐོར་དང་སྤྱི་བདེ། འཕྲལ་སེལ། མེ་ཟོན་སོགས་འབྲེལ་ཡོད་སྡེ་ཚན་གྱིས་བདེ་འཇགས་ཞིབ་བཤེར་བྱེད་ཤུགས་ཆེ་རུ་གཏོང་བ་དང་། བདེ་འཇགས་དོ་དམ་བྱེད་ཐབས་དོན་འཁྱོལ་བྱེད་པ། གཙོ་གནད་མངོན་གསལ་དོད་པ། གནམ་གཤིས་འགྱུར་ལྡོག་ལ་དོ་ཁུར་བྱེད་པ། རྒྱུན་གཏན་གྱི་ལྟ་ཞིབ་ཚད་ལེན་ལ་ཤུགས་སྣོན་རྒྱག་པ། རོགས་སྐྱོབ་སྒྲིག་ཆས་གྲ་སྒྲིག་བྱེད་པ། མི་སྣ་བཀོད་སྒྲིག་ལ་ཤུགས་སྣོན་རྒྱག་པ་བཅས་བྱས་ནས་སྒྲིག་ལམ་གྱི་ཁྲིད་སྟོན་དང་བདེ་འཇགས་ཀྱི་དྲན་སྐུལ་ལེགས་པོར་བསྒྲུབ་དགོས། སྔོན་ཇུས་འདང་ངེས་བཟོས་ནས་འཕྲལ་སེལ་གྲ་སྒྲིག་ལ་ཤུགས་སྣོན་རྒྱག་པ་དང་། ལས་ཞུགས་མི་སྣའི་བདེ་འཇགས་གསོ་སྦྱོང་དང་། ཉེན་ཟོན་སློབ་གསོ། འཕྲལ་སེལ་རོགས་སྐྱོབ་སྔོན་ཇུས་སྦྱོང་བརྡར་བཅས་ལ་ཤུགས་སྣོན་བརྒྱབ་སྟེ་འཕྲལ་སེལ་ཐག་གཅོད་ནུས་པ་ཆེ་རུ་ཏན་ཏིག་བཏང་ནས་གནས་སྐོར་བར་བདེ་འཇགས་དང་བརྟན་ལྷིང་གི་གནས་སྐོར་ཁོར་ཡུག་ཅིག་གཏོད་དགོས།

རྫོང་ཨུའི་ཧྲུའུ་ཅི་གཞོན་པའམ་སྲིད་ཁྲིམས་ཨུ་ལྷན་གྱི་ཧྲུའུ་ཅི་བསམ་འགྲུབ་ཚེ་རིང་ལྷན་དུ་བསྐྱོད། རྫོང་ཨུ་གཞུང་ལས་ཁང་དང་ཨ་རིག་ཡུལ་ཚོ། རྫོང་རིག་གནས་གནས་སྐོར། སྡོད་ཁང་འཛུགས་སྐྲུན་སོགས་སྡེ་ཚན་གྱི་འགན་འཁུར་བ་བཅས་ཀྱང་ལྷན་དུ་བསྐྱོད།