ཤ་བོ་སྐྱབས་ཁུལ་སྲིད་གྲོས་སྐབས་བཅོ་ལྔ་པའི་གྲོས་ཚོགས་ཐེངས་ལྔ་པའི་མཉམ་འབྲེལ་ཚན་ཆུང་གི་གྲོས་བསྡུར་ནང་ཞུགས་སྐབས་ལྟེ་བ་དང་ཁྱོན་ཡོངས་ལ་དམ་པོར་དམིགས་ཏེ་སྲིད་ཞུགས་སྲིད་གླེང་མང་དུ་བྱས་ནས་དེང་རབས་ཅན་གྱི་མཚོ་སྔོན་གསར་པ་འཛུགས་སྐྲུན་ཧུར་ཐག་བྱེད་པའི་མཚོ་བྱང་གི་ལེའུ་རྩོམ་དགོས་པ་ནན་གྱིས་བསྟན།

ཟླ1པོའི་ཚེས31ཉིན་གྱི་ཕྱི་དྲོར། ཁུལ་ཨུའི་ཧྲུའུ་ཅི་ཤ་བོ་སྐྱབས་ཁུལ་སྲིད་གྲོས་སྐབས་བཅོ་ལྔ་པའི་གྲོས་ཚོགས་ཐེངས་ལྔ་པའི་གྲངས་ཉུང་མི་རིགས་དང་ཆོས་ལུགས་ལས་རིགས་མཉམ་འབྲེལ་ཚན་ཆུང་དང་། དཔལ་འབྱོར། བཟོ་ཚོང་མཉམ་འབྲེལ་ལྷན་ཚོགས། ཞིང་ལས་ལས་རིགས་བཅས་ཀྱི་མཉམ་འབྲེལ་ཚན་ཆུང་གི་གྲོས་བསྡུར་ནང་ཞུགས་ནས་ནན་གྱིས་བསྟན་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་འབྲེལ་ཡོད་མི་དམངས་སྲིད་གྲོས་ཀྱི་བྱ་བར་ཤུགས་སྣོན་དང་ཇེ་ལེགས་སུ་གཏོང་རྒྱུའི་སྐོར་གྱི་དགོངས་པ་གལ་ཆེན་སློབ་སྦྱོང་དང་ལག་བསྟར་གཏིང་ཟབ་བྱས་ནས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་ལ་གནང་པའི་གསུང་བཤད་གལ་ཆེན་དང་མཛུབ་སྟོན་གལ་ཆེན་གྱི་དགོངས་དོན་དོན་འཁྱོལ་ནན་ཏན་བྱས་ཏེ་ཁྱོན་ཡོངས་ལ་དམ་པོར་དམིགས་པ་དང་སྲིད་ཞུགས་སྲིད་གླེང་མང་དུ་བྱས་ནས་དེང་རབས་ཅན་གྱི་མཚོ་སྔོན་གསར་པ་འཛུགས་སྐྲུན་ཧུར་ཐག་བྱེད་པའི་མཚོ་བྱང་གི་ལེའུ་ནུས་ཤུགས་ཡོད་རྒུས་རྩོམ་དགོས་ཟེར།

ཚོགས་འདུའི་ཐོག བྱ་བྲལ་བློ་གྲོས་མཁྱེན་རབ་རྒྱ་མཚོ་དང་མ་རུའུ་ཡུན། སྨར་ཁམས་བློ་བཟང་ཕྱོགས་གླང་། མ་ཅིན་ཧྲན། ཆོས་དབྱིངས་རིག་འཛིན། འཇིགས་མེད་ཚེ་རིང་བཅས་ཀྱིས་སྲིད་གཞུང་གི་བྱ་བའི་སྙན་ཞུར་དམིགས་ནས་གྲོང་གསེབ་དར་སྤེལ་དང་བོད་ལུགས་གསོ་རིག་འཕེལ་རྒྱས། གཟུགས་འདས་ཤུལ་བཞག་རིག་གནས་རྒྱུན་འཛིན། ནོར་ལུག་བཤས་གཏོང་། དམངས་གཉེར་ཁེ་ལས་རོགས་སྐྱོར། ཞིང་ཕྱུགས་ཐོན་རྫས་ཆས་རྟགས་གཏོད་པ་སོགས་ཀྱི་ཐད་ནས་མྱོང་ཚོར་གླེང་བ་དང་ཉམས་མྱོང་བཤད་ཅིང་གྲོས་གཞི་བཏོན། ཤ་བོ་སྐྱབས་ཀྱིས་ཉན་ཞོར་དུ་ཟིན་བྲིས་བཀོད་ནས་ཚང་མ་དང་མཉམ་དུ་བརྗེ་རེས་གཏིང་ཟབ་བྱས་ཏེ་རེ་རེ་བཞིན་ལན་སློག་པ་དང་། ཁུལ་སྲིད་གྲོས་ཀྱི་མགོ་ཁྲིད་ཚན་ཁག་དང་སྲིད་གྲོས་ཨུ་ཡོན་ཡོངས་ཀྱིས“མཚོ་བྱང་ལྔའི”འཛུགས་སྐྲུན་ཁྲོད་ལེགས་སྐྱེས་དབུལ་བར་གདེང་འཇོག་གང་ལེགས་གནང་། ཁོས་བསྟན་དོན། ཨུ་ཡོན་ཚོའི་གཏམ་བཤད་ལ་བསམ་གཞིག་དང་ལྟ་སྟངས་ཡག་པོ་ཡོད་པས་བསམ་འཆར་དང་གྲོས་གཞི་བཏོན་པར་རིན་ཐང་དང་བསམ་ཕྱོགས་ལྡན་ཞིང་། ཆབ་སྲིད་ཀྱི་བྱང་ཚད་བཟང་པོ་དང་འགན་འཁྲི་འཁུར་སེམས་ཆེན་པོ་བསྟན་ཡོད་ལ།  སྲིད་གྲོས་རྩ་འཛུགས་ཀྱི་འབྲེལ་གཏུག་རྒྱ་ཁྱབ་དང་ཤེས་ལྡན་པ་འཛོམས་པ། རིག་སྟོབས་གཅིག་སྡུད་བཅས་ཀྱི་དམིགས་བསལ་ལེགས་ཆ་མངོན་ཡོད་ཟེར་ཞིང་། འབྲེལ་ཡོད་སྡེ་ཁག་ལ་ཞིབ་འཇུག་དང་བསྡུ་ལེན་ནན་ཏན་བྱས་ནས་བསམ་འཆར་དང་གྲོས་གཞི་དངོས་གཉེར་གྱི་ཐབས་སུ་བསྒྱུར་ཏེ་གནད་དོན་གྱི་དགོས་མཁོ་སྒྲུབ་རྒྱུར་ལྟ་སྐུལ་བྱ་རྒྱུའི་དོན་གནད་ནང་བཅུག་ནས་དུས་ཐོག་ཏུ་ཐག་གཅོད་དང་དོན་འཁྱོལ་བྱ་རྒྱུར་དམ་འཛིན་ཡག་པོ་བྱེད་དགོས་པའི་བླང་བྱ་བཏོན།

གྲངས་ཉུང་མི་རིགས་དང་ཆོས་ལུགས་ལས་རིགས་མཉམ་འབྲེལ་ཚན་ཆུང་དུ་བསྟན་དོན། གྲངས་ཉུང་མི་རིགས་དང་ཆོས་ལུགས་ལས་རིགས་ཀྱི་མི་སྣ་ནི་ཆབ་སྲིད་གྲོས་མོལ་ཚོགས་འདུའི་གྲུབ་ཆ་གལ་ཆེན་ཞིག་ཡིན་ལ། རང་སྐྱོང་ཁུལ་གྱི་མི་རིགས་མཐུན་སྒྲིལ་ཡར་ཐོན་དང་ཆོས་ལུགས་འཆམ་མཐུན་ལ་སྐུལ་འདེད་གཏོང་བའི་སྟོབས་ཤུགས་གལ་ཆེན་ཞིག་ཀྱང་ཡིན་ཏེ། གཅིག་ནས་ཞིང་ཆེན་ཏང་ཨུའི་ཧྲུའུ་ཅི་ཁྲིན་ཀང་གིས་ཞིང་ཆེན་སྲིད་གྲོས་སྐབས་བཅུ་གསུམ་པའི་གྲོས་ཚོགས་ཐེངས་གཉིས་པའི་གྲངས་ཉུང་མི་རིགས་དང་ཆོས་ལུགས་ལས་རིགས་མཉམ་འབྲེལ་ཚན་ཆུང་གྲོས་བསྡུར་ནང་ཞུགས་སྐབས་ཀྱི་གསུང་བཤད་ཀྱི་དགོངས་དོན་ལག་བསྟར་དོན་འཁྱོལ་ནན་ཏན་བྱས་ཏེ་ཆོས་ལུགས་དགོན་སྡེའི་དོ་དམ་བྱ་བ་སོ་སོ་ཏན་ཏིག་སྤེལ་ནས་དགོན་སྡེ་ཚད་ལྡན་ཅན་དང་ཁྲིམས་སྐྱོང་ཅན་གྱི་དོ་དམ་ཆུ་ཚད་ཟམ་མི་ཆད་པར་མཐོ་རུ་བཏང་སྟེ་ཆོས་ལུགས་ཀྲུང་གོ་ཅན་གྱི་མཚོ་བྱང་ལག་ལེན་ཁྲོད་འགན་འཁྲི་འཁུར་ཕོད་པ་དང་ལེགས་སྐྱེས་དབུལ་དགོས། གཉིས་ནས་མཚོ་བྱང་གི་ལོ་རྒྱུས་དུས་སྐབས་སོ་སོའི་མི་རིགས་སོ་སོའི་དབར་འགྲོ་འོང་དང་བརྗེ་རེས། མཉམ་འདྲེས་བཅས་ཀྱི་སྲོལ་རྒྱུན་བཟང་པོ་དང་རིག་གནས་གསོག་འཇོག་སྔོག་འདོན་གཏིང་ཟབ་བྱེད་དགོས་པ་དང་། མཚོ་བྱང་དུ་རྒྱང་སྐྱོད་རིག་གནས་སྤྱི་གླིང་དང་རྨ་ཆུའི་རྒྱལ་ཁབ་རིག་གནས་སྤྱི་གླིང་། དར་གོས་ཚོང་ལམ་མཚོ་སྔོན་ཚོང་ལམ་སོགས་བརྒྱུད་རིམ་ཁྲོད་ཀྱི་གྲུབ་ཆ་གསེད་བཀྲོལ་བྱེད་པ་དང་། ལོ་རྒྱུས་ཀྱི་རིག་གནས་འབྲེལ་བ་རྒྱུན་མཐུད་དང་མི་རིགས་མཐུན་སྒྲིལ་ཡར་ཐོན་གྱི་གཏམ་རྒྱུད་ཡག་པོར་བཤད་པ་ཟུང་འབྲེལ་བྱས་ནས་མི་རིགས་སོ་སོའི་མང་ཚོགས་ཀྱི“ངོས་འཛིན་བཞི”རྒྱུན་ཆད་མེད་པར་ཆེ་རུ་གཏོང་དགོས། གསུམ་ནས་མི་རིགས་མཐུན་སྒྲིལ་ཡར་ཐོན་གྱི་དྲིལ་སྒྲོག་སློབ་གསོའི་བྱེད་སྒོ་དེ“གཅིག་ཅན་བཅུ་གསུམ”དང“བསྐྱོད་པ་བཅུ་གཉིས”ཀྱི་བྱེད་སྒོ་གཏིང་ཟབ་ཏུ་བཏང་ནས་དྲིལ་སྒྲོག་སློབ་གསོའི་ལག་ལེན་གྱི་གཞི་རྟེན་དང་རྣམ་པ་རྒྱུན་ཆད་མེད་པར་ཕུན་སུམ་ཇེ་ཚོགས་སུ་གཏོང་བ། རྟ་རྒྱུག་དང་མདའ་འཕེན། རྐང་བགྲོད།  ལྕགས་རྟ་འགྲན་བསྡུར་སོགས་འགྲན་བསྡུར་བྱེད་སྒོ་དར་སྤེལ་བཏང་ནས། ཀྲུང་ཧྭའི་ཕུལ་བྱུང་གི་སྲོལ་རྒྱུན་རིག་གནས་སྔར་ལས་རྒྱུན་འཛིན་བཅས་བྱས་ནས་མི་རིགས་སོ་སོའི་རིག་གནས་བརྗེ་རེས་མཉམ་འདྲེས་ལ་སྐུལ་འདེད་གཏོང་དགོས། བཞི་ནས་གཟུགས་འདས་ཤུལ་བཞག་རིག་གནས་ཁྱོན་ཡོངས་ནས་སྔོག་འདོན་དང་སྲུང་སྐྱོབ། རྒྱུན་འཛིན་བཅས་བྱས་ཏེ་གཟུགས་འདས་ཤུལ་བཞག་རིག་གནས་ཀྱི་ཁྱད་ལྡན་སྡེ་བ་དང་གྲོང་རྡལ།  གཟུགས་འདས་ཤུལ་བཞག་རིག་གནས་ཀྱི་བཟོ་ཁང་འཛུགས་སྐྲུན་ལ་མགྱོགས་མྱུར་སྐུལ་འདེད་གཏོང་བ་དང་། ནུས་ཤུགས་ཡོད་རྒུས་མཚོ་སྔོན་པོའི་མཚོ་མཆོད། ཨ་རིག་གླུ་ཤགས། ཧུའེ་རིགས་ཀྱི་གསོལ་སྟོན་འཁྲབ་སྟོན།  དཔའ་རིས་རྒྱན་གོས་འགྲེམས་སྟོན་སོགས་ཀྱི་བྱེད་སྒོ་གང་ལེགས་སྤེལ་ནས་འཚེམ་དྲུབ་དང་ལུག་ལྤགས་ཐང་ག འཚེམ་དྲུབ། ཤོག་དྲས་མ་སོགས་རིག་གནས་གསར་གཏོད་ཐོན་རྫས་ཞིབ་འཇུག་གསར་སྤེལ་བྱེད་ཤུགས་ཆེ་རུ་བཏང་ནས་ནོར་ལུག་གི་མགོ་རུས་དང་རྭ་ཅོ། ཀོ་བ་དང་པགས་པ། བལ་དང་ཁུ་ལུ་སོགས་ལས་སྣོན་ཞིབ་ཚགས་བྱེད་པ། ཁ་བཏགས་དང་སྣམ་བུ། མི་རིགས་ཀྱི་གྱོན་ཆས་བཟོ་བ་སོགས་མི་རིགས་ཀྱི་རིག་གནས་ཐོན་ལས་ལ་སྐུལ་འདེད་ཧུར་ཐག་གཏོང་དགོས། ལྔ་ནས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་རྒྱུ་གཙོ་རྐང་དུ་བྱས་ནས“རྒྱལ་ཡོངས་ཀྱི་མི་རིགས་མཐུན་སྒྲིལ་ཡར་ཐོན་གཏོད་པའི་དཔེ་སྟོན་ཁུལ”གྱི་གཟི་བརྗིད་མཚན་སྙན་སྲ་བརྟན་དུ་གཏོང་བ་དང་། “ངས་མང་ཚོགས་ལ་བདེ་སྐྱིད་ཀྱི་རྩིས་རྒྱག་པའི”བྱེད་སྒོ་ཏན་ཏིག་སྤེལ་ནས་རིགས་སོ་སོའི་མང་ཚོགས་ལ་ཏང་གི་བཀའ་དྲིན་ཚོར་བ་དང་ཏང་གི་རྗེས་སུ་འབྲངས་རྒྱུར་ཁྲིད་སྟོན་བྱེད་དགོས་ཟེར།

དཔལ་འབྱོར་དང་བཟོ་ཚོང་མཉམ་འབྲེལ་ལྷན་ཚོགས། ཞིང་ལས་ལས་རིགས་བཅས་ཀྱི་མཉམ་འབྲེལ་ཚན་ཆུང་དུ་ནན་གྱིས་བསྟན་དོན། རིམ་པ་སོ་སོའི་སྲིད་གྲོས་རྩ་འཛུགས་དང་རྒྱ་ཆེའི་སྲིད་གྲོས་ཨུ་ཡོན་གྱིས་གཅིག་ནས་རང་འགུལ་ངང་འཕེལ་རྒྱས་ཀྱི་རྣམ་པ་གསར་པ་དང་མཉམ་འདྲེས་བྱས་ནས་འཕེལ་རྒྱས་ལ་སྐུལ་འདེད་གཏོང་རྒྱུ་དེ་འགན་ནུས་སྒྲུབ་པ་དང་ནུས་པ་འདོན་སྤེལ་བྱེད་པའི་ལས་འགན་ཨང་དང་པོར་བརྩིས་ཏེ་རང་ངོས་ཀྱི་ལེགས་ཆ་འདོན་སྤེལ་གང་ལེགས་བྱས་ནས“མཚོ་བྱང་ལྔའི”འཛུགས་སྐྲུན་དང“ཞིང་ཆེན་ཡོངས་ཀྱི་མདུན་གྲལ་དུ་སྐྱོད་པ་གསུམ”གྱི་འཕེལ་རྒྱས་བཀོད་སྒྲིག་ལ་དམིགས་ནས་དོན་ཆེན་གྲོས་བསྡུར།  ཐབས་ཇུས་བཟང་པོ་འདོན་པ་དང་བཀོད་འདོམས་པ་བཅས་བྱེད་དགོས། གཉིས་ནས་ཡིད་ཆེས་བརྟན་དུ་གཏོང་བ་དང་སྔོན་དཔག་མང་དུ་བཏང་ནས་བསམ་བློ་དང་བྱ་སྤྱོད་དེ་ཀྲུང་དབྱང་དང་། ཞིང་ཆེན་ཏང་ཨུ། ཁུལ་ཨུས་དཔལ་འབྱོར་དུས་བབ་ལ་དབྱེ་ཞིབ་དང་བརྡར་ཤ་བཅད་པ་དང་དཔལ་འབྱོར་བྱ་བའི་ཐབས་ཇུས་བཀོད་སྒྲིག་ཐད་སྔར་བས་གཅིག་གྱུར་ཡོང་བར་བྱས་ཏེ་རང་འགུལ་ངང་ཁུལ་ཡོངས་ཀྱི་སྤུས་ཚད་མཐོ་བའི་འཕེལ་རྒྱས་ཁྱོན་ཡོངས་ནང་མཉམ་འདྲེས་དང་ཞབས་ཞུ་བྱེད་པ། ཐོན་ལས་ཀྱི“གནས་བཞི”འཛུགས་སྐྲུན་དང་གསར་བརྗེའི་ཉམས་ཞིབ་རྟེན་གཞི་བསྐྲུན་རྒྱུར་དམིགས་ནས་ཁེ་ལས་དང་ཐོན་ལས་སྟོབས་ལྡན་དུ་གཏང་སྟེ་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་ནུས་པ་སྣོན་དགོས། གསུམ་ནས“མཚོ་སྔོན་གྱི་ཕྱུགས་ལས་མཚོ་སྐོར་ལ་ལྟ་བ་དང་མཚོ་སྐོར་གྱི་ཕྱུགས་ལས་མཚོ་བྱང་ལ་ལྟ་བར”དམིགས་ནས་ཞིང་ཕྱུགས་ལས་ཀྱི་ཤེས་ལྡན་མི་སྣ་ནང་འདྲེན་དང་སྐྱེད་སྲིང་བྱེད་ཤུགས་མུ་མཐུད་ཆེ་རུ་བཏང་སྟེ་སྐྱེ་ཁམས་ཕྱུགས་ལས་ཀྱི“གཅིག་ཅན་བཅུའི”བཟོ་སྐྲུན་ཆ་ཚང་ལ་བརྟེན་ནས“མདོ་ལ་རི་འདབས་ཀྱི་ཕྱུགས་ར་བཟང་པོ”དང“རླབས་ཕྲེང་དགུང་དུ་འཕྱོ་བའི་མཚོ་སྔོན་པོའི”ཞིང་ཕྱུགས་ཐོན་རྫས་ས་ཁོངས་ཀྱི་སྤྱི་སྤྱོད་ཆས་རྟགས་ཟུར་སྣོན་རིན་ཐང་མང་དུ་གཏོང་བ་དང་ནོར་ལུག་བཤས་གཏོང་ཚད་ཇེ་མང་དུ་གཏོང་བ། ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་ཕྱིར་གཏོང་ཐབས་ལམ་རྒྱ་ཆེར་གཏོང་རྒྱུའི་ཐད་ཐབས་འདོན་ཇུས་འབུལ་བྱེད་དགོས། བཞི་ནས་རྒྱལ་སྤྱིའི་སྐྱེ་ཁམས་ཡུལ་སྐོར་བྱ་ཡུལ་གཏོད་རྒྱུར་དམིགས་ནས་རི་སྔོ་ཆུ་དྭངས་ནི་གསེར་རི་དངུལ་རིར་བསྒྱུར་བའི་ནུས་ལྡན་ཐབས་ལམ་རྒྱ་ཆེར་བཏང་སྟེ་སྒར་འདེབས་དཔལ་འབྱོར་དང་མཚན་མོའི་དཔལ་འབྱོར། ནགས་ཤོད་དཔལ་འབྱོར་སོགས་ཡུལ་སྐོར་གྱི་ལས་རྣམ་གསར་པ་འཕེལ་རྒྱས་ཤུགས་ཆེན་བཏང་ནས་ཁུལ་ཡོངས་ཀྱི་ལྗོངས་ཁུལ་གཏོད་རྒྱུར་རོགས་རམ་བྱས་ཏེ་ཡུལ་སྐོར་བར་སྣེ་ལེན་ཞུ་བའི་ཞབས་ཞུའི་བྱ་བ་ནུས་ཤུགས་ཡོད་རྒུས་ཡག་པོ་བསྒྲུབ་ནས་ས་ཁོངས་ཧྲིལ་པོའི་དུས་ཚིགས་ཧྲིལ་པོའི་ཡུལ་སྐོར་འཕེལ་རྒྱས་ཀྱི་རྣམ་པ་གསར་པ་གཏོད་ཆེད་སྟོབས་ཤུགས་ལེགས་སྐྱེས་སུ་དབུལ་དགོས་ཟེར།

པད་རྒྱལ་བཀྲ་ཤིས་དང་མགོན་པོ་ཚེ་བརྟན། ཁུལ་འཕེལ་སྒྱུར་ཨུ་ལྷན་གྱི་འགན་འཁུར་བློ་མཐུན་གཙོ་བོ་ཞུགས།