ཆོས་དབྱིངས་སྐྱིད་དང་ཁྲེང་ཁའེ་ལ་གཟེངས་བསྟོད་བྱས།

ཆོས་དབྱིངས་སྐྱིད་དང་ཁྲེང་ཁའེ་ལ་གཟེངས་བསྟོད་བྱས།

ཡང་གཏམ་བཟང་ཞིག་གྲགས་ཡོང་སྟེ། ཞིང་ཆེན་སྲིད་གཞུང་གིས་ཉིན་ཤས་གོང་ཁྱབ་བསྒྲགས་བྱས་པར། མཚོ་སྔོན་ཞིང་ཆེན་གྱིས་ཧང་ཀྲོའུ་ཨེ་ཤེ་ཡའི་ལུས་རྩལ་འགྲན་ཚོགས་སྐབས19པའི་ཐོག་ཕུལ་བྱུང་གི་གྲུབ་འབྲས་ཐོབ་པའི་ལུས་རྩལ་པར་གཟེངས་བསྟོད་བྱས་པ་དང་། ཆོས་དབྱིངས་སྐྱིད་དང་ཁྲེང་ཁའེ་སོ་སོར་བྱས་རྗེས་ཆེན་པོ་བཞག་པ་ཐོ་འགོད་དང་བྱས་རྗེས་བཞག་པ་ཐོ་འགོད་ཀྱི་གཟེངས་བསྟོད་བྱས།

རྒྱུས་ལོན་བྱུང་བ་ལྟར་ན། ཧང་ཀྲོའུ་ཨེ་ཤེ་ཡ་ལུས་རྩལ་འགྲན་ཚོགས་སྐབས19པའི་ཐོག་མཚོ་སྔོན་ཞིང་ཆེན་གྱི་ལུས་རྩལ་པ་ཚོ་འགྲན་ཡ་ལ་མི་སྐྲག་ཅིང་སྙིང་རུས་ཆེན་པོས་རྩལ་འགྲན་ལུས་རྩལ་རྣམ་གྲངས་ལས་ཨང་དང་པོ་དང་ཨང་གསུམ་པའི་ཕུལ་བྱུང་གི་གྲུབ་འབྲས་བླངས་ནས་ཨོ་ལིམ་ཕིག་གི་སྙིང་སྟོབས་དང་ཀྲུང་ཧྭའི་ལུས་རྩལ་གྱི་སྙིང་སྟོབས་གསོན་ཉམས་དོད་པོས་གསལ་འགྲེལ་བྱས་ཏེ་མེས་རྒྱལ་ལ་མཚན་སྙན་བསྩལ་ཞིང་མཚོ་སྔོན་ལ་གཟི་བརྗིད་བསྣན་ཡོད། སྔོན་ཐོན་ལ་གཟེངས་བསྟོད་དང་ངར་ཤུགས་འཕེལ་ཆེད། མཚོ་སྔོན་ཞིང་ཆེན་མི་དམངས་སྲིད་གཞུང་གིས་ཧང་ཀྲོའུ་ཨེ་ཤེ་ཡའི་ལུས་རྩལ་འགྲན་ཚོགས་སྐབས19པའི་ལུས་རྩལ་རྣམ་གྲངས་ཀྱི་ཨང་རིམ་ཐོབ་མཁན་གྱི་ལུས་རྩལ་པར་གཟེངས་བསྟོད་བྱ་རྒྱུའི་གཏན་འབེབས་བྱས་པ།

གཟེངས་བསྟོད་ལས་ཆོས་དབྱིངས་སྐྱིད་ལ་ཧང་ཀྲོའུ་ཨེ་ཤེ་ཡའི་ལུས་རྩལ་འགྲན་ཚོགས་སྐབས19པའི་མཉམ་བསྲེས་སྤྱི་ལེ35ཡི་འདུར་རྒྱུག་འགྲན་བསྡུར་ཁྲོད་ཨང་དང་པོ་བླངས་པས་བྱས་རྗེས་ཆེན་པོ་བཞག་པའི་ཐོ་འགོད་ཀྱི་གཏན་འབེབས་བྱས། ཁྲེང་ཁའེ་ལ་ཧང་ཀྲོའུ་ཨེ་ཤེ་ཡའི་ལུས་རྩལ་འགྲན་ཚོགས་སྐབས19པའི་དྲག་རྩལ་སྐྱེས་པའི་སྤྱི་རྒྱ58རིམ་པའི་འགྲན་བསྡུར་རྣམ་གྲངས་ཀྱི་ཨང་གསུམ་པ་ཐོབ་ནས་བྱས་རྗེས་བཞག་པའི་ཐོ་འགོད་ཀྱི་གཏན་འབེབས་བྱས།

གཞན་ཡང་། ཞིང་ཆེན་སྲིད་གཞུང་གིས་ཞིང་ཆེན་ཡོངས་ཀྱི་ལུས་རྩལ་པར་རེ་བ་ཟབ་མོ་བཅོལ་ཡོད་པ་སྟེ། གཟེངས་བསྟོད་ཐོབ་པའི་ལུས་རྩལ་པས་གཟི་བརྗིད་མཚན་སྙན་ལ་གཅེས་སྤྲས་དང་། ཡང་འབད་བསྐྱར་འབད་ཀྱིས་སླར་ཡང་གྲུབ་འབྲས་བཟང་པོ་ལེན་རྒྱུའི་རེ་བ་བྱེད་ཀྱིན་ཡོད་ལ། ས་གནས་སོ་སོ་དང་སྡེ་ཁག་སོ་སོ། རྒྱ་ཆེའི་ལས་བྱེད་པ་དང་མང་ཚོགས་ཀྱིས་ཞི་ཅིན་ཕིང་གི་འབྲེལ་ཡོད་ལུས་རྩལ་སྐོར་གྱི་རྣམ་བཤད་གལ་ཆེན་དང་མཚོ་སྔོན་ལ་རྟོག་ཞིབ་གནང་སྐབས་ཀྱི་གསུང་བཤད་གལ་ཆེན་གྱི་དགོངས་དོན་ལག་བསྟར་གཏིང་ཟབ་བྱས་ཏེ། མི་དམངས་ཀྱི་གཟུགས་གཞི་ཇེ་ཐང་དུ་གཏོང་བ་དང་མི་དམངས་ཀྱི་བདེ་ཐང་ཇེ་ལེགས་སུ་གཏོང་རྒྱུ་དེ་རྩ་བའི་ལས་འགན་དུ་བརྩིས་ནས་བདེ་ཐང་མཚོ་སྔོན་དང་དམངས་ཡོངས་ཀྱི་ལུས་སྦྱོང་འཐབ་ཇུས་ལ་སྐུལ་འདེད་གཏིང་ཟབ་གཏོང་བ་དང་། མཐོ་སྒང་གི་ཁྱད་ལྡན་ལུས་རྩལ་སྤུས་ཚད་མཐོན་པོའི་སྒོ་ནས་འཕེལ་རྒྱས་འགྲོ་རྒྱུར་སྤྱི་འདོམས་སྐུལ་འདེད་བཏང་སྟེ། མཐོ་སྒང་གི་ལུས་རྩལ་སྟོབས་ལྡན་ཞིང་ཆེན་ཞིག་ཏུ་ཧུར་ཐག་སྒོས་བསྐྲུན་རྒྱུའི་རེ་བ་ཡོད་པར་བསྟན།