མཚོ་སྔོན་པོ་མདའ་བཞིའི་ཕྱོགས་ཀྱི་མཐོན་པོ་བཅུ་གསུམ་གྱི་བསྟོད་པ་དཀར་ཕྱོགས་དགྱེས་པའི་སྒྲ་དབྱངས།

ཡོང་ཁུངས། མཚོ་བྱང་མདོ་ལ་བོད་ཡིག་ཚགས་པར། རྩོམ་སྒྲིག་པ། དབང་ཆེན་དོན་འགྲུབ། 2023-09-21 10:08:45 ཀློག་གྲངས།260

1.སྐྱེས་མཆོག་སྨོན་ལམ་མཐོན་པོ།

མེ་ཏོག་སྣ་བརྒྱ་རྣམ་བཞད་སུམ་རྩེན་མཚུངས།།

ཞིམ་མངར་དྲི་འཐུལ་བུང་བས་གླུ་དབྱངས་ལེན།།

སྤྲིན་དཀར་བརྟོལ་བའི་རྩེ་མོ་མཁའ་ལ་འཕགས།།

རེས་འགར་ཆུ་འཛིན་ཐོད་བཅིངས་སྒེག་ཉམས་ངོམས།།

གླང་ཆེན་འཕྲེད་འགྱིང་སྨོན་ལམ་མཐོན་པོའི་སྤོར།།

སླེབས་ཚེ་ཁོར་ཡུག་སྣོད་བཅུད་མ་ཚང་མེ།།

ལག་མཐིལ་རྫས་བཞིན་མིག་གི་དགའ་སྟོན་ཞེས།།

སྐྱེ་བོ་འབུམ་རྒུས་བསྔགས་བརྗོད་མེ་ཏོག་གཏོར།།

2.གནས་རི་ཞལ་དཀར།

དྲི་མེད་ཤེལ་དཀར་ལས་གྲུབ་མཆོད་རྟེན་བཞིན།།

ཁོར་ཡུག་རི་ཕྲན་སྟོང་འཛོམས་བརྗིད་ལྷང་ལྷང་།།

དུས་བཞིར་ན་བུན་གོས་གྱོན་རི་ཡི་རྒྱལ།།

སྔ་དགུང་ཉི་ཟེར་རབ་བསྡུད་གསེར་གྱི་ཞྭས།།

རབ་མཛེས་གནམ་འདེགས་ཀ་བ་ལས་ཀྱང་བརྗིད།།

3.བསིལ་ལྡན་མཐོན་པོ།｛ཞོ་ཤན｝

རི་རྒྱལ་ལྷུན་པོ་ཞལ་དཀར་བཀའ་བློན་ཁྱོད།།

བསིལ་ལྡན་དར་རྒུད་ཕྲག་ཏུ་འཁུར་ནུས་ཤིང་།།

བདེ་སྐྱིད་བསྐྲུན་ལ་མཐུ་ནུས་ལྡན་ནོ་ཞེས།།

ནོར་བ་རྗེ་ཡི་བཀའ་ལུང་སྤྱི་བོ་མཛེས།།

4.དངུལ་རི་མཐོན་པོ།

ལྷུན་སྟུག་རྩེ་ཟླུམ་ཅུང་ཟད་ཁྲོ་ཉམས་མངོན།།

ཆུ་ཕྲན་ལྷུང་ལྷུང་གླུ་ལེན་གཡའ་སྤང་ནགས།།

འཇིག་རྟེན་བྱེད་པོའི་བློ་ལས་བཏོན་སྙམ་སྟེར།།

དམངས་ཀྱི་བླ་རི་སྲིད་འདིའི་རྒྱན་གཅིག་རྨད།།

5.ཀུན་བཟང་བཀྲ་ཤིས་མཐོན་པོ།｛ཤུ་ནག｝

སྤྲོ་སྐྱིད་བག་ཕེབས་གནས་ཀྱི་གཡང་བརྒྱ་འཛོམས།།

རི་དྭགས་ཤྭ་བའི་ཁྱུ་ཚོགས་སྤྲིན་ལ་འཁུ།།

མེ་ཏོག་སྣ་མང་སུམ་རྩེན་ལས་ཀྱང་མཛེས།།

ཀུན་བཟང་མཆེད་གསུམ་ཞེས་གྲགས་རྨད་བྱུང་གནས།།

6.གེ་སར་མཐོན་པོ། ｛གེ་དར།｝

སྔོན་བྱོན་དཔའ་བོ་གེ་སར་ནོར་བུ་མཆོག།

ཕྱོགས་བཞིའི་ནག་ཚོགས་དགྲ་རྣམས་འདུལ་བའི་ཚེ།།

སོ་བལྟ་མཛད་པའི་གནས་ལ་གེ་སར་རི།།

རི་ཚོགས་ཀུན་ལས་རྒྱལ་མཚན་ཏོག་གི་ཟླ།།

7.བཀྲ་ཤིས་ཆོས་ལུང་མཐོན་པོ།

བློ་བཟང་སྙན་བརྒྱུད་འཛིན་མར་དབང་བསྒྱུར་ཤིང་།།

མཁས་གྲུབ་རྒྱུ་སྐར་བྱེ་བའི་མགོན་པོ་ཞེས།།

རྒྱ་མཚོའི་གོས་ཅན་སྙན་པའི་བ་དན་གཡོ།།

སངས་རྒྱས་ཀུན་ངོས་ཞབས་ཀྱིས་བཅགས་པའི་གནས།།

ཤར་གྱི་རྒྱ་སྟག་ལྷོ་ཡི་གཡུ་འབྲུག་དང་།།

ནུབ་ཀྱི་བྱ་དམར་བྱང་གི་རུས་སྦལ་སོགས།།

སྲུང་བཞི་ཡོངས་ཚང་ས་དཔལ་ཀུན་འདུས་ཡུལ།།

རིན་ཆེན་ཚོམ་སྤུངས་བསམ་བཞིན་བཟོས་སམ་སྙམ།།

ངོ་མཚར་དཔལ་འཛོམས་བག་ཡངས་དགེ་སྦྱོར་འཕེལ།།

གནས་མཆོག་ཁོད་སྙོམས་ཆུ་སྐྱེས་འདབ་བརྒྱད་ཕྱེ།།

ས་དགེ་བཅུ་འཛོམས་དབེན་གནས་ཁྱད་ཆོས་རྫོགས།།

སྐྱེ་དགུའི་མཆོད་གནས་དགེ་འདུན་ཆུ་གཏེར་ཆེའི།།

སྟོང་གྲངས་ལོངས་ངེས་མ་འོངས་ལུང་དུ་བསྟན།།

8.སྟོབས་ལྡན་དགྲ་ལས་རྣམ་རྒྱལ་མཐོན་པོ། {རྫ་རྒན།}

སྐྱེ་དགུའི་གཙུག་ནོར་ཡོངས་འཛིན་རྡོ་རྗེ་འཆང་།།

གཙུག་བསྟེན་དགེ་བསྙེན་རྟེན་གྱུར་མཚན་གསོལ་བ།།

སྟོབས་ལྡན་དགྲ་ལས་རྣམ་རྒྱལ་མཐོན་པོ་ཞེས།།

དཀར་ཕྱོགས་སྐྱོང་དབུས་རྒྱལ་མཚན་ཏོག་བཞིན་མཛེས།།

9.བོ་རོ་མཐོན་པོ།

གོར་མོའི་གླེགས་བུ་དགུང་བརྩེགས་གཞལ་མེད་ཁང་།།

དཀར་ཐང་མར་ཁུའི་མཚོ་འཁྱིལ་གོང་བའི་རྒྱན།།

ཡུལ་ཁམས་དབང་བསྒྱུར་ལྷ་གཉན་བོ་རོ་ཞེས།།

ཤེལ་དཀར་ས་འཛིན་དབང་བོ་སྲིད་འདིའི་རྒྱན།།

10 བཀྲ་ཤིས་ཡག་རི་མཐོན་པོ།

རིན་ཆེན་རི་བོ་བཀྲ་ཤིས་བུམ་པའི་དབྱིབས།།

རྩ་རྩེར་སྨན་དང་བྲག་རི་ཤེལ་དཀར་ཚོམ།།

སྐེད་པར་གོར་མོའི་གླེགས་བུའི་བ་གམ་ཆེ།།

གསུང་རབ་བང་མཛོད་ཡིན་སྙམ་འཕྱངས་མོ་ཉུག།

11.བཀྲ་ཤིས་སྨན་རི་མཐོན་པོ། ｛ཨེམ་ཐུ།｝

རྩེ་མོ་མངོན་མཐོ་འབིག་བྱེད་རི་བོའི་སྤུན།།

རྩ་བར་ནད་བརྒྱ་དྲུང་འབྱིན་བདུད་རྩིའི་སྨན།།

སྐྱེ་དགུའི་བསོད་ནམས་ལས་གྲུབ་སྐྱེད་མོའི་ཚལ།།

མ་ལའི་ཚལ་མཚུངས་བརྗོད་འདོད་སུ་ཡིས་འགོག།

12.ཤར་གྱི་གྲོགས་ལྷ་མཐོན་པོ།｛ཧ་ཞ་རྫ་རྒན།｝

སྣང་མཐའི་སྒྱུ་འཕྲུལ་དཔལ་ལྡན་ཡེ་ཤེས་ཀྱིས།།

ཕྱག་ཕྲེང་བརྒྱ་རྩས་རབ་གནས་མེ་ཏོག་གི།།

བྱིན་རླབས་མངོན་གྱུར་ཆུ་མིག་བརྒྱ་རྩ་བརྡོལ།།

འགྲོ་བའི་བསོད་ནམས་ཞིང་གྱུར་འབབ་པ་ཡོད།།

ལྷུན་ཆགས་རི་བོ་མ་ཧཱ་དེ་ཝ་འམ།།

ཤར་གྱི་གྲོགས་ལྷ་དཀར་པོའི་མཚན་ཀྱང་གསོལ།།

13.བཀྲ་ཤིས་རིན་ཆེན་འདུས་རི།｛ཁུ་ཁུ་བུ་ལག｝

བཀྲ་ཤིས་ཀུན་འདུས་རི་བོའི་རྩེ་མོ་ནས།།

མཐོ་མཐོ་ཀུན་ལས་མི་མཐོང་མདོ་སྨད་ཀྱི།།

གནས་བདག་ཆེན་པོ་རྨ་རྒྱལ་སྦོམ་ར་ཡི།།

ངོ་མཚར་བཀོད་པའི་བལྟད་མོ་མིག་གི་དཔྱིད།།

རྩོམ་ཡིག་ཚིག་བཅད་མ་འདི་སྔོན་ཆད་ཁོ་བོས་བྲིས་བའི་མཐོན་པོ་བཅུ་གསུམ་གྱི་བསྟོད་པ་དེར་འཕྲི་སྣོན་བཟོ་བཅོས་ཅུང་ཟད་དང་བཅས་སླར་ཡང་སྤྱི་ལོ2023ལོའི་ཟླ8པའི་ཚེས1ཉིན་རང་ཤག་ཆོས་རིག་དགའ་ཚལ་དུ་མདའ་གངས་དགས་བྲིས།

རྩོམ་གོང་མ། > ལོ་ངོ་ཁྲིའི་སྔོན་གྱི་བྲག་རིས་གསར་རྙེད།
རྩོམ་གཞུག་མ། > གངས་ལུང་བྲག་ཕུག