2024འཛམ་གླིང་གི་སྲོལ་རྒྱུན་གསོ་རིག་ཚོགས་ཆེན་པེ་ཅིང་དུ་བསྡུས།

 ཚེས3ཉིན། 2024ལོའི་འཛམ་གླིང་གི་སྲོལ་རྒྱུན་གསོ་རིག་ཚོགས་ཆེན་པེ་ཅིང་དུ་བསྡུས།  ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་ཨུ་ཡོན། པེ་ཅིང་གྲོང་ཁྱེར་ཏང་ཨུའི་ཧྲུའུ་ཅི་དབྱིན་ལི་ཡིས་ཚོགས་ཆེན་འགོ་རྩོམ་པའི་མཛད་སྒོའི་ཐོག་ཀྲུའུ་ཞི་ཞི་ཅིན་ཕིང་གི་རྟེན་འབྲེལ་འཕྲིན་ཡིག་སྒྲོག་འདོན་བྱས། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་ཨུ་ཡོན། རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ་ལིའུ་གོ་ཀྲུང་ཚོགས་ཆེན་འགོ་རྩོམ་པའི་མཛད་སྒོར་ཕེབས་པར་མ་ཟད་ཤིས་ཚིག་ཕུལ།

ལིའུ་གོ་ཀྲུང་གིས་ནན་གྱིས་བསྟན་དོན། ཀྲུའུ་ཞི་ཞི་ཅིན་ཕིང་གིས་ཆེད་དུ་རྟེན་འབྲེལ་ཞུ་བའི་འཕྲིན་ཡིག་བསྐུར་བ་དེས་སྲོལ་རྒྱུན་གྱི་གསོ་རིག་དང་ཐེངས་འདིའི་ཚོགས་ཆེན་ལ་ཚད་མཐོའི་མཐོང་ཆེན་གནང་བ་མཚོན་ཡོད། མིའི་རིགས་ཀྱི་དཔལ་ཡོན་གསར་གཏོད་ཀྱི་གྲུབ་འབྲས་ཤིག་ཡིན་པའི་ཆ་ནས། སྲོལ་རྒྱུན་གསོ་རིག་གིས་མིའི་རིགས་ཀྱི་འཕེལ་རྒྱས་དང་འཛམ་གླིང་དཔལ་ཡོན་ཡར་ཐོན་ཡོང་བར་ལེགས་སྐྱེས་གལ་ཆེན་ཕུལ་བ་དང་། འཛམ་གླིང་གསོ་རིག་མ་ལག་གི་གྲུབ་ཆ་གལ་ཆེན་ཞིག་ཏུ་གྱུར་ཡོད་ལ།  ནད་རིགས་གསོ་བཅོས་དང་། བདེ་ཐང་ཡར་སྐུལ།  རྒྱུན་འཛིན་གསར་གཏོད་སོགས་ཀྱི་ཐད་ཐུན་མོང་མ་ཡིན་པའི་ནུས་པ་དང་མི་མངོན་པའི་སྟོབས་ཤུགས་ཆེན་པོ་ལྡན་ཡོད།

ལིའུ་གོ་ཀྲུང་གིས་བསྟན་དོན། ཀྲུང་གོས་ཀྲུང་ལུགས་གསོ་རིག་ལས་དོན་འཕེལ་རྒྱས་ལ་ཚད་མཐོའི་མཐོང་ཆེན་བྱེད་པ་དང་། སྙིང་བཅུད་རྒྱུན་འཛིན་དང་དུས་བསྟུན་མདུན་སྐྱོད་རྒྱུན་འཁྱོངས་བྱེད་པ། ཀྲུང་ལུགས་གསོ་རིག་གི་ལེགས་ཆ་གསབ་རེས་དང་མཐུན་སྦྱོར་འཕེལ་རྒྱས་ལ་སྐུལ་འདེད་གཏོང་བ་བཅས་བྱས་ཏེ། ཀྲུང་གོའི་ཁྱད་ཆོས་ཀྱི་སྲོལ་རྒྱུན་གསོ་རིག་འཕེལ་རྒྱས་ཀྱི་ལམ་བུའི་ཐོག་བསྐྱོད་ཡོད། ཀྲུང་གོ་འདི་ཉིད་འགན་འཁུར་བའི་རྒྱལ་ཁབ་ཆེན་པོ་ཞིག་དང་སྲོལ་རྒྱུན་གསོ་རིག་གི་རྒྱལ་ཁབ་ཆེན་པོ་ཞིག་ཡིན་པའི་ཆ་ནས། ཕྱོགས་སོ་སོ་དང་མཉམ་དུ་སྲོལ་རྒྱུན་གསོ་རིག་གོ་ལ་ཧྲིལ་པོའི་འཕྲོད་བསྟེན་མ་ལག་ཁྲོད་མཉམ་འདྲེས་གཏིང་ཟབ་བྱེད་པར་སྐུལ་འདེད་གཏོང་འདོད་ཡོད།  ཁོང་གིས་གྲོས་གཞི3བཏོན་པ་སྟེ། གཅིག་ནི་རང་ཚུགས་རང་རྟོན་རྒྱུན་འཁྱོངས་བྱས་ཏེ། སྲོལ་རྒྱུན་གསོ་རིག་འཕེལ་རྒྱས་དང་བཀོལ་སྤྱོད་བར་སྟོང་རྒྱ་བསྐྱེད་པ་དང་། རང་རྒྱལ་གྱི་གནས་ཚུལ་དང་མཐུན་པའི་འཕེལ་རྒྱས་བགྲོད་ལམ་འཚོལ་ཞིབ་བྱེད་དགོས།  གཉིས་ནི་དྲང་སྲུང་གསར་གཏོད་རྒྱུན་འཁྱོངས་བྱས་ཏེ། གསོ་རིག་དེང་རབས་ཅན་དུ་འགྱུར་བའི་སྤྱིར་བཏང་གི་ཆོས་ཉིད་བརྩི་སྲུང་དང་། སྲོལ་རྒྱུན་གསོ་རིག་དང་དེང་རབས་ཚན་རིག་ཕན་ཚུན་ཟུང་འབྲེལ་དང་སྐུལ་སྤེལ་བྱེད་དགོས། གསུམ་ནི་ཕན་ཚུན་སློབ་སྦྱོང་དང་ཕན་ཚུན་དཔྱད་གཞིར་འཛིན་པ་རྒྱུན་འཁྱོངས་བྱས་ཏེ། ཉམས་མྱོང་མཉམ་སྤྱོད་དང་སྲིད་ཇུས་མཐུན་སྦྱོར་བྱེད་པར་ཤུགས་སྣོན་དང་། སྲོལ་རྒྱུན་གསོ་རིག་བརྗེ་རེས་མཉམ་ལས་དང་མཉམ་དུ་འཕེལ་རྒྱས་ཡོང་བར་སྐུལ་འདེད་གཏོང་དགོས།

འཛམ་གླིང་འཕྲོད་བསྟེན་རྩ་འཛུགས་ཀྱི་སྤྱི་ཁྱབ་ལས་འཛིན་ཐན་ཏི་སའེ་ཡིས་བརྙན་ལམ་བརྒྱུད་ནས་ཤིས་ཚིག་ཕུལ། ཀྲུང་ཕྱིའི་སྲིད་གཞུང་གི་དཔོན་རིགས་དང་། འབྲེལ་ཡོད་རྒྱལ་སྤྱིའི་རྩ་འཛུགས་ཀྱི་འགན་འཁུར་བ།  ཆེད་མཁས་པ། དེ་མིན་སྨན་བཅོས་སྒྲིག་གཞིའི་འཐུས་མི་བཅས་ཚོགས་ཆེན་འགོ་རྩོམ་པའི་མཛད་སྒོར་ཞུགས།