ཝང་དབྱི་དང་འཇར་མན་གྱི་ཕྱི་འབྲེལ་པུའུ་ཀྲང་པེར་པོ་ཁི་ཡིས་རེས་སྐོར་བདུན་པའི་ཀྲུང་གོ་དང་འཇར་མན་གྱི་ཕྱི་འབྲེལ་དང་བདེ་འཇགས་འཐབ་ཇུས་ཀྱི་གླེང་མོལ་བྱས།

ཚེས2ཉིན། ཀྲུང་གུང་ཀྲུང་དབྱང་ཆབ་སྲིད་ཅུའུ་ཨུ་ཡོན། ཕྱི་འབྲེལ་པུའུ་ཡི་པུའུ་ཀྲང་ཝང་དབྱི་ཡིས་པེ་ཅིན་དུ་འཇར་མན་གྱི་ཕྱི་འབྲེལ་པུའུ་ཀྲང་པེར་པོ་ཁི་དང་མཉམ་དུ་རེས་སྐོར་བདུན་པའི་ཀྲུང་གོ་དང་འཇར་མན་གྱི་ཕྱི་འབྲེལ་དང་བདེ་འཇགས་འཐབ་ཇུས་སྐོར་གླེང་མོལ་བྱས།

ཝང་དབྱི་ཡིས་བསྟན་དོན། ད་ལོ་ནི་ཀྲུང་གོ་དང་འཇར་མན་བར་དུ་ཕྱོགས་ཡོངས་ཀྱི་འཐབ་ཇུས་གྲོགས་པོའི་འབྲེལ་བ་བཙུགས་ནས་ལོ10འཁོར་བའི་ལོ་རེད། འཛམ་གླིང་ལ་ཟིང་ཆ་ཇི་ལྟར་ཆེ་ན་རྒྱལ་ཁབ་ཆེན་པོས་དེ་ལྟར་བརྟན་ཤུགས་སྲུང་འཛིན་བྱེད་དགོས། འཛམ་གླིང་གི་དཔལ་འབྱོར་དངོས་ཕུང་ཆེ་གྲས་གཉིས་པ་དང་གསུམ་པ་ཡིན་པའི་ཆ་ནས། ཀྲུང་གོ་དང་འཇར་མན་གྱིས་འགལ་རྐྱེན་སེལ་བ་དང་འགོག་ཤུགས་སེལ་བ། གླེང་མོལ་དང་མཉམ་ལས་ཀྱི་རྩ་བའི་དགོངས་གཞི་རྒྱུན་འཁྱོངས་དང་འཇམ་འཐབ་འགྲན་རྒོལ་གྱི་བསམ་བློ་རྙིང་པ་འདོར་བ། མཉམ་དུ་ཕྱི་ཕྱོགས་ཀྱི་ཉེན་ཁ་འགོག་པ་བཅས་བྱས་ཏེ། གོ་ལ་ཧྲིལ་པོའི་འགྲན་སློང་ལ་ཁ་གཏད་འཇལ་དགོས།

པེར་པོ་ཁི་ཡིས་བསྟན་དོན། འཇར་མན་དང་ཀྲུང་གོའི་མཉམ་ལས་ཁྱབ་ཁོངས་རྒྱ་ཆེ་བ་དང་། འཇར་མན་ཕྱོགས་ཀྱིས་ཀྲུང་གོའི་འབྲེལ་བར་མཐོང་ཆེན་བྱེད་བཞིན་ཡོད་ཅིང་། ཀྲུང་གོ་གཅིག་གི་སྲིད་ཇུས་བློ་བརྟན་འགྱུར་མེད་ངང་ལག་བསྟར་བྱེད་བཞིན་ཡོད། ཟིང་ཆ་ཆེ་ལ་ལྷིང་འཇགས་མིན་པའི་འཛམ་གླིང་གི་གནས་བབ་མདུན་དུ། ཀྲུང་གོ་ཕྱོགས་དང་ལྷག་བསམ་ཟོལ་མེད་ཀྱིས་གྲོས་མོལ་བྱེད་པ་དང་། འཐབ་ཇུས་སྤེལ་རེས་ལ་ཤུགས་སྣོན་བྱེད་པར་དོན་སྙིང་གལ་ཆེན་ལྡན། རྒྱལ་ཁབ་གཉིས་ཀྱི་འབྲེལ་བའི་འཕེལ་རྒྱས་ཀྱི་ཁ་ཕྱོགས་ཡང་དག་རྒྱུན་འཁྱོངས་བྱ་རྒྱུར་ཕན་པར་མ་ཟད། འཛམ་གླིང་ཞི་བདེ་དང་བརྟན་འཇགས་ཡོང་བར་བྱས་རྗེས་འཇོག་དགོས། འཇར་མན་ཕྱོགས་ཀྱིས་ཀྲུང་གོས་གནམ་གཤིས་འགྱུར་ལྡོག་ལ་ཁ་གཏད་འཇལ་བར་དགེ་མཚན་ལྡན་པའི་ནུས་པ་བཏོན་པར་བསྔགས་བརྗོད་བྱེད་བཞིན་ཡོད།

ཝང་དབྱི་ཡིས་ནན་གྱིས་བསྟན་དོན། ཀྲུང་གོ་དང་འཇར་མན་བར་གྱི་འབྲེལ་བ་བརྟན་པོའི་ངང་འཕེལ་རྒྱས་ཡོང་དགོས་ན་ཐོག་མར་འཐབ་ཇུས་ཀྱི་ངོས་ཟིན་ལེགས་བཅོས་བྱེད་དགོས། ཀྲུང་གོ་དང་འཇར་མན་དང་། ཀྲུང་གོ་དང་ཡོ་རོབ་ཀྱི་ལམ་ལུགས་མི་འདྲ་བ་ནི་སོ་སོའི་ལོ་རྒྱུས་དང་རིག་གནས་ཀྱི་སྲོལ་རྒྱུན་ལས་བྱུང་བ་ཡིན་ལ། མི་དམངས་ཀྱིས་གདམ་གསེས་བྱས་པ་ལས་བྱུང་བའང་ཡིན། ཕྱོགས་གཉིས་ཀྱིས་ཕན་ཚུན་བརྩི་འཇོག་དང་། ཕན་ཚུན་རྒྱུས་ལོན་བྱེད་པ་རྒྱུན་འཁྱོངས་བྱས་པའི་རྨང་གཞིའི་སྟེང་། གཉིས་ཕན་མཉམ་ལས་སྤེལ་དགོས། ཀྲུང་གོ་དང་འཇར་མན་གྱི་འབྲེལ་བ་དེ་ཕྱོགས་གསུམ་པར་དམིགས་པ་མིན་ལ། ཕྱོགས་གསུམ་པའི་ཤུགས་རྐྱེན་ཡང་ཐེབས་མི་རུང་། འཇར་མན་དང་ཡོ་རོབ་ཕྱོགས་ཀྱིས་དངོས་ཡོད་དང་མཐུན་པའི་སྒོ་ནས་ཀྲུང་གོའི་འཕེལ་རྒྱས་ལ་ལྟ་སྟངས་འཛིན་པ་དང་། དགེ་མཚན་ལྡན་པའི་སྒོ་ནས་ཀྲུང་གོར་འཛིན་པའི་སྲིད་ཇུས་ལག་བསྟར་བྱེད་པ། གླེང་མོལ་དང་གྲོས་མོལ་བྱས་པ་བརྒྱུད་ནས་ཉོ་ཚོང་གི་རྩོད་གཞི་ཐག་གཅོད་བྱེད་དགོས།

པེར་པོ་ཁི་ཡིས་འཇར་མན་ཕྱོགས་ཀྱིས་ཡོ་རོབ་མནའ་འབྲེལ་དང་ཀྲུང་གོས་གློག་སྒུལ་རླངས་འཁོར་གྱི་ཁ་གསབ་ལ་ངོ་རྒོལ་བྱེད་པའི་གནད་དོན་ཐད་མུ་མཐུད་དུ་གྲོས་མོལ་བྱེད་རྒྱུར་རྒྱབ་སྐྱོར་བྱས་ཏེ་ཕྱོགས་གཉིས་ཀྱིས་དང་ལེན་བྱེད་ཐུབ་པའི་ཐག་གཅོད་ཇུས་གཞི་འཚོལ་བར་བརྩོན་ལེན་བྱེད་རྒྱུ་ཡིན་ཞེས་བསྟན།