ཁྲིན་ཀང་གིས་ཀྲུང་དབྱང་སྐྱེ་ཁམས་ཁོར་ཡུག་སྲུང་སྐྱོབ་ལྟ་ཞིབ་ཀྱི་འཕྲིན་བཅར་ཞུ་གཏུག་དོན་བྱ་དག་ཐེར་ལེགས་བཅོས་བྱེད་པའི་བྱ་བར་ལྟ་སྐུལ་མཛུབ་སྟོན་གནང་པ།
ཟླ12པའི་ཚེས6ཉིན། མཚོ་སྔོན་ཞིང་ཆེན་ཏང་ཨུའི་ཧྲུའུ་ཅིའམ་ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རིན་ཁྲིན་ཀང་ཟི་ལིང་གྲོང་ཁྱེར་མཁར་དཀྱིལ་ཆུས་དང་ཧོང་ཀྲུང་ཆུས་སུ་སོང་ནས། ཀྲུང་དབྱང་སྐྱེ་ཁམས་ཁོར་ཡུག་སྲུང་སྐྱོབ་ལྟ་ཞིབ་ཀྱི་འཕྲིན་བཅར་ཞུ་གཏུག་དོན་བྱ་དག་ཐེར་ལེགས་བཅོས་བྱེད་པའི་བྱ་བར་ལྟ་སྐུལ་མཛུབ་སྟོན་གནང་ནས་ནན་གྱས་བསྟན་དོན། ཞི་ཅིན་ཕིང་གི་སྐྱེ་ཁམས་དཔལ་ཡོན་གྱི་དགོངས་པ་སློབ་སྦྱོང་དང་ལག་བསྟར་བྱེད་པ་དང་། ཀྲུང་དབྱང་སྐྱེ་ཁམས་ཁོར་ཡུག་སྲུང་སྐྱོབ་ལྟ་ཞིབ་ཀྱི་དོན་སྙིང་གལ་ཆེན་ལ་ངོས་འཛིན་ཟབ་མོ་བྱེད་པ། རྩ་ལག་མཉམ་བཅོས་བྱེད་པར་དོ་སྣང་བྱེད་པ་དང་འགན་འཁྲི་ལག་བསྟར་བྱེད་པ། ཕྱོགས་ཡོངས་ནས་མཐའ་གཅིག་ཏུ་དག་ཐེར་ལེགས་བཅོས་བྱེད་པ། ལྟ་ཞིབ་ཚན་ཆུང་གིས་སྤྲད་ནས་བསྒྲུབ་ཏུ་བཅུག་པའི་དོན་བྱ་ཇི་མ་ཇི་བཞིན་དུ་ལག་བསྟར་བྱས་ནས། མང་ཚོགས་ཀྱི་ཚུར་སྣང་ཆེན་པོ་ཐོབ་པའི་སྐྱེ་ཁམས་ཁོར་ཡུག་ཐད་ཀྱི་འབུར་ཐོན་གནད་དོན་ཐག་གཅོད་དགོས་ཟེར།
མཁར་དཀྱིལ་ཆུས་ནན་ཡོའུ་ཧྲན་ཞང་ལུང་སྲུབ་དཀྲུག་ས་ཚིགས་སུ་ཁྲིན་ཀང་གིས་ཡུལ་དངོས་ནས་འཕྲུལ་ཆས་ཅན་གྱི་ཐོན་སྐྱེད་བྱེད་ས་དང་རྡུལ་འགོག་ཆུ་གཏོར་སྒྲིག་ཆས་སོགས་ལ་ལྟ་ཞིབ་བྱས་པ་དང་། གནད་དོན་གྱི་རྒྱུ་རྐྱེན་དང་ཁོར་ཡུག་སྲུང་སྐྱོབ་སྒྲིག་ཆས་འཁོར་རྒྱུག དག་ཐེར་ལེགས་བཅོས་བྱེད་ཐབས་ལ་རྒྱུས་ལོན་གསལ་བོ་བྱས་ཤིང་། ཁེ་ལས་ཀྱིས་ཁོར་ཡུག་སྲུང་སྐྱོབ་ཁྲིམས་སྲོལ་བརྩི་སྲུང་ནན་མོ་བྱེད་པ་དང་། ལས་སྒྲུབ་དུས་ཚོད་ཚད་ལྡན་དུ་གཏོང་བ། ཚན་རིག་དང་མཐུན་པ་དང་གོ་ཆོད་པའི་བྱེད་ཐབས་སྤྱོད་པ། ཐོན་སྐྱེད་གོ་རིམ་ཁྲོད་ཀྱི་ཁོར་ཡུག་བཙོག་བཟོ་གནད་དོན་མྱུར་དུ་ཐག་བཅད་དེ། དཔལ་འབྱོར་ཁེ་ཕན་གྱི་ཆེད་དུ་ཁོར་ཡུག་སྲུང་སྐྱོབ་གནད་དོན་ལ་སྣང་ཆུང་བྱེད་མི་རུང་། འབྲེལ་ཡོད་སྡེ་ཁག་གིས་སྐོར་ཞིབ་ལྟ་སྐུལ་ལ་ཤུགས་སྣོན་པ་དང་། བྱ་བའི་བྱེད་ཐབས་དོན་འཁྱོལ་བྱས་ནས། གནད་དོན་མྱུར་དུ་དག་ཐེར་ལེགས་བཅོས་བྱེད་པར་ཁག་ཐེག་བྱེད་རྒྱུའི་རེ་བ་བཏོན།
ཧོང་ཀྲུང་ཆུས་ཞིང་སྐྱོང་གྲོང་རྡལ་ཞ་མིན་ཞོལ་མ་དང་ཞ་མིན་གོང་མ་སྡེ་བ་རུ། ཁྲིན་ཀང་གིས་མང་ཚོགས་ཀྱིས་ཞུ་གཏུག་བྱས་པའི་གད་སྙིགས་གང་སར་འཕེན་པ་དང་འཛེར་སྒྲས་མང་ཚོགས་ཀྱི་འཚོ་བར་གནོད་བསྐྱལ་བ་སོགས་ཀྱི་གནད་དོན་ལ་རྒྱུས་ལོན་གསལ་བོ་བྱས། ཁྲིན་ཀང་གིས་མཁར་གྲོང་འབྲེལ་མཚམས་སོགས་ཁུལ་ཁོངས་གཙོ་བོའི་ཁོར་ཡུག་བཅོས་སྐྱོང་རྒྱུན་མཐུད་ངང་དམ་འཛིན་བྱེད་པ་དང་། སྲ་གཟུགས་གད་སྙིགས་ཀྱི་གྲུབ་ཆར་ཞིབ་དཔྱད་བྱེད་པ། གད་སྙིགས་ཀྱི་གྲངས་ཀ་ཞིབ་བཤེར་གཏན་འབེབས་བྱེད་པ། ཞིབ་བཤེར་གཏན་འབེབས་ཀྱི་གྲུབ་འབྲས་ལྟར་ཚད་དང་མཐུན་པའི་སྒོ་ནས་གད་སྙིགས་ཐག་གཅོད་བྱེད་པ། ཁུངས་འཚོལ་བརྟག་བཤེར་བརྒྱུད་དེ་ཁྲིམས་སྲོལ་ལྟར་ཁྲིམས་འགལ་གནད་དོན་ཐག་གཅོད་དགོས། གཅིག་ཤེས་ཀུན་གྲོལ་བྱེད་པ་དང་། རྫོབ་བཙོག་གི་ཁེ་ལས་ལ་མཐའ་གཅིག་ཏུ་བཅོས་སྐྱོང་བྱེད་པ། ཁེ་ལས་ཀྱིས་མྱུར་དུ་རྗེས་ལུས་ཐོན་ནུས་འདོར་བར་སྣེ་ཁྲིད་བྱེད་པ། འཕེལ་རྒྱས་ཀྱི་རྣམ་པ་བསྒྱུར་བ། མགོ་ཁུངས་ནས་སྐྱེ་ཁམས་ཁོར་ཡུག་སྲུང་སྐྱོབ་ཀྱི་ཉེན་ཁ་དང་བདེ་འཇགས་ཐོན་སྐྱེད་ཀྱི་ཉེན་ཁར་ཚོད་འཛིན་བྱས་ཏེ། བཙོག་བཟོ་འགོག་བཅོས་རྒྱུན་མཐུད་ངང་གཏིང་ཟབ་ཏུ་གཏོང་རྒྱུའི་རེ་བ་བཏོན།
ཞིང་ཆེན་ཏང་ཨུའི་རྒྱུན་ལས་ཨུ་ཡོན་ནམ་ཟི་ལིང་གྲོང་ཁྱེར་གྱི་ཏང་ཨུའི་ཧྲུའུ་ཅི་ཝང་ཝེ་ཏུང་གིས་མཉམ་དུ་ལྟ་སྐུལ་མཛུབ་སྟོན་བྱས། ཁོས་བསྟན་དོན། ཟི་ལིང་གྲོང་ཁྱེར་ཏང་ཨུ་དང་གྲོང་ཁྱེར་སྲིད་གཞུང་གིས་འགན་འཁྲི་ཕྲག་ཏུ་ལེན་པ་དང་། མཐའ་གཅིག་ཏུ་དག་ཐེར་ལེགས་བཅོས་བྱེད་པ། ཁ་གཡར་ས་མི་བཙལ་བ། དུས་ཚོད་དང་པོའི་ནང་བྱེད་ཐབས་འཚོལ་བ་དང་གྲུབ་འབྲས་ལེན་ཐུབ་པར་བྱེད་པ། དག་ཐེར་ལེགས་བཅོས་ཀྱི་བྱ་བའི་ཐད་ནས་ཤུགས་ལྡན་པ་དང་དྲོད་ཁོལ་ལྡན་པར་བྱེད་པ། སྐྱེ་ཁམས་ཁོར་ཡུག་སྲུང་སྐྱོབ་བྱ་བའི་ཐད་ཀྱི་འགན་སྒྲུབ་ནན་མོ་མི་བྱེད་པ་དང་དག་ཐེར་ལེགས་བཅོས་ནན་མོ་མི་བྱེད་པའི་ལས་བྱེད་པའི་འགན་འཁྲི་རྩད་གཅོད་བྱེད་པ། རིམ་པ་སོ་སོའི་ལས་བྱེད་པས་འགན་འཁྲི་ཕྲག་ཏུ་ལེན་པར་སྣེ་ཁྲིད་བྱེད་པ། སྐྱེ་ཁམས་ཁོར་ཡུག་སྲུང་སྐྱོབ་ཀྱི་བྱ་བ་སྣ་ཚོགས་ཐད་ནས་གྲུབ་འབྲས་སྔར་ལས་བཟང་བོ་ལེན་པར་སྐུལ་འདེད་བཏང་སྟེ། མི་དམངས་ཡིད་ཚིམ་པར་བྱེད་རྒྱུ་ཡིན་ཟེར།
ཀྲུའུ་ཞང་ཧྥིན་གྱིས་མཉམ་དུ་ལྟ་སྐུལ་མཛུབ་སྟོན་བྱས།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注