དབྱི་ལིང་དང་དབྱིན་ཇི། ཧྥ་རན་སི། འཇར་མན་བཅས་ཀྱིས་རི་ནེ་ཝ་ནས་སྐོར་ཐེངས་གསར་བའི་གྲོས་མོལ་སྤེལ།

དབྱི་ལིང་དང་དབྱིན་ཇི། ཧྥ་རན་སི། འཇར་མན་བཅས་ཀྱི་ཕྱི་འབྲེལ་དཔོན་པོས་ཚེས13ཉིན་སུའེ་ཙེར་གྱི་རི་ནེ་ཝ་ནས་སྐོར་ཐེངས་གསར་བའི་གྲོས་མོལ་སྤེལ། དབྱི་ལིང་གི་ཕྱི་འབྲེལ་བློན་ཆེན་གཞོན་པ་ཅཱ་ལི་པཱ་པཱ་ཏིས་ཀྱིས་བསྟན་དོན། གྲོས་མོལ་དེར་འཛུགས་སྐྲུན་རང་བཞིན་ངེས་ཅན་ལྡན་ཟེར།

ཅཱ་ལི་པཱ་པཱ་ཏིས་ཀྱིས་ཉིན་དེར་སྨྱན་བྱད་སྟེང་རྩོམ་ཡིག་སྤེལ་ཏེ། ཐེངས་འདིའི་གྲོས་མོལ་ནི་གཟབ་ནན་དང་ལྷག་བསམ་རྣམ་དག་ཡིན་པར་མ་ཟད་འཛུགས་སྐྲུན་རང་བཞིན་ངེས་ཅན་ལྡན། ཕྱོགས་སོ་སོས་གྲོས་མཐུན་འགོད་པར་མཁོ་བའི་བཀག་སྡོམ་མེད་པར་གཏོང་བ་དང་ཉིང་རྡུལ་ནུས་པའི་གནད་དོན་སོགས་ཀྱི་བྱེ་བྲག་གི་དོན་ལ་གྲོས་བསྡུར་བྱས་པ་དང་། གཅིག་གྱུར་སྒོས་བལྟས་ན་གྲོས་མོལ་སླར་གསོ་བྱེད་དགོས་པ་དང་། ཞོར་དུ་སྣང་ཚུལ་འོས་འཚམ་བསྐྲུན་ནས་གྲོས་མཐུན་འགོད་པར་སྐུལ་འདེད་གཏོང་དགོས་པར་འདོད། ཕྱོགས་སོ་སོས་མུ་མཐུད་དུ་གྲོས་མོལ་བྱེད་པར་འཐད་པ་བྱུང་།

དེའི་སྔོན་དབྱི་ལིང་དབྱི་སི་ལན་སྤྱི་མཐུན་རྒྱལ་ཁབ་འཕྲིན་གཏོང་ཁང་གིས་བསྒྲགས་པ་ལྟར་ན། ཅཱ་ལི་པཱ་པཱ་ཏིས་ཀྱིས་ཚེས་གཅིག་ཉིན་བསྟན་དོན། ཚེས13ཉིན་སྤེལ་རྒྱུ་ཡིན་པའི་གྲོས་མོལ་དེའི་དམིགས་ཡུལ་ནི་འབྲེལ་ཡོད་གྲོས་གཞི་རྒྱས་བཤད་དང་དེར་གྲོས་བསྡུར་ཞིབ་མོ་བྱས་ཏེ། གལ་ཏེ་མ་འོངས་པར་གྲོས་མོལ་བྱེད་ན་སྒྲོམ་གཞི་དང་བྱེད་ཐབས་ག་འདྲའི་འོག་སྤེལ་དགོས་པ་གཏན་འཁེལ་བྱེད་ཆེད་ཡིན་ཟེར།