​སུའུ་ཏན་དུ་འཇབ་རྒོལ་དོན་རྐྱེན་ཐེངས་གཉིས་བྱུང་ནས་མི8རྐྱེན་ལམ་དུ་ཤོར།

སུའུ་ཏན་གྱི་འཕྲོད་བསྟེན་སྡེ་ཁག་དང་དྲག་ཆས་དམག་དཔུང་གིས་ཚེས4ཉིན་ཁྱབ་བསྒྲགས་བྱས་པའི་གནས་ཚུལ་ལྟར་ན། ཚེས4ཉིན་དང་ཚེས3ཉིན་གཉིས་ལ་སོ་སོར་རྒྱལ་ཁབ་དེའི་དབུས་རྒྱུད་ཀྱི་ཁར་ཐུའུ་མུའུ་མངའ་སྡེ་དང་ནུབ་རྒྱུད་ཀྱི་ཏ་ཨར་ཧྥུའུ་ཨར་བྱང་མ་མངའ་སྡེ་རུ་སུའུ་ཏན་མྱུར་སྐྱོབ་དམག་དཔུང་གི་མེ་སྒྱོགས་ཀྱི་འཇབ་རྒོལ་ཐེབས་ནས་མི8རྐྱེན་ལམ་དུ་ཤོར་བ་དང་མི53ལ་རྨས་ཕོག་ཡོད། ཚེས4ཉིན། ཁར་ཐུའུ་མུའུ་མངའ་སྡེའི་འཕྲོད་བསྟེན་པུའུ་ཡིས་གསལ་བསྒྲགས་སྤེལ་ནས་བཤད་རྒྱུར། སུའུ་ཏན་གྱི་མྱུར་སྐྱོབ་དམག་དཔུང་གིས་ཉིན་དེར་མངའ་སྡེ་དེའི་བྱང་རྒྱུད་ཨེན་ཐུའུ་མན་གྲོང་ཁྱེར་ཁ་ལ་ལིས་ས་ཁུལ་དང་ཤར་རྒྱུད་ཀྱི་ཧྲ་ཨར་ཀེ་ཉི་ལེ་ས་ཁུལ་ལ་མེ་སྒྱོགས་འཕངས་ནས་མི4རྐྱེན་ལམ་དུ་བཏང་བ་དང་མི43རྨས་ཡོད་ཅིང་། རྨས་མ་རྣམས་སྨན་ཁང་དུ་བསྐྱལ་ནས་སྨན་བཅོས་བྱས་ཟེར།

ཉིན་དེར་སུའུ་ཏན་གྱི་དྲག་ཆས་དམག་དཔུང་གིས་གསལ་བསྒྲགས་སྤེལ་ནས་བཤད་རྒྱུར། ཚེས3ཉིན། ཏ་ཨར་ཧྥུའུ་ཨར་བྱང་མ་མངའ་སྡེ་ཡི་ལྟེ་བའི་གྲོང་ཁྱེར་ཧྥ་ཞི་ཨར་གྱི་སྡོད་དམངས་ས་ཁུལ་ལ་སུའུ་ཏན་གྱི་མྱུར་སྐྱོབ་དམག་དཔུང་གི་མེ་སྒྱོགས་ཐེབས་ནས་མི4རྐྱེན་ལམ་དུ་ཤོར་བ་དང་མི10ལ་རྨས་ཕོག་ཡོད་ཟེར།

སུའུ་ཏན་གྱི་མྱུར་སྐྱོབ་དམག་དཔུང་གིས་གོང་གསལ་གྱི་འཇབ་རྒོལ་དོན་རྐྱེན་ལ་ད་དུང་ལན་བཏབ་མེད།

2023ལོའི་ཟླ4པའི་ཚེས15ཉིན། སུའུ་ཏན་གྱི་དྲག་ཆས་དམག་དཔུང་དང་མྱུར་སྐྱོབ་དམག་དཔུང་བར་རྒྱལ་ས་ཁ་ཐུའུ་མུའུ་རུ་གདོང་ཐུག་དྲག་པོ་བྱུང་བ་དང་། དེའི་རྗེས་དམག་འཁྲུག་གི་མེ་ལྕེ་དེ་ས་ཁུལ་གཞན་དུ་མཆེད་པ་རེད། ལོ་གཅིག་ལྷག་ཙམ་རྒྱུན་མཐུད་པའི་གདོང་ཐུག་དེ་ལས་སུའུ་ཏན་གྱི་མི་ཁྲི་གཉིས་དང་སྟོང་དགུ་ལྷགརྐྱེན་ལམ་དུ་ཤོར་བ་དང་། མི་བྱེ་བ་གཅིག་དང་ས་ཡ་གཉིས་འབུམ་གཉིས་ཁྲི་ལྔ་ལྷག་ཙམ་ཡུལ་གྱར་པར་གྱུར་ཡོད་པ་རེད།