ཧན་གོའི་གནམ་གྲུ་སར་ལྷུང་བའི་དོན་རྐྱེན་ལས་མི179རྐྱེན་ལམ་དུ་ཤོར།

ཐེ་གོའི་མན་ཀུའུ་ནས་འཕུར་བའི་ཧན་གོའི་ཅི་ཀྲོའུ་མཁའ་འགྲུལ་གྱི་གནམ་གྲུ7C2216རྟགས་ཅན་དེ་སྔ་དྲོའི་དུས་ཚོད་དགུ་དང་སྐར་མ་བདུན་ཡས་མས་སུ། ཆོན་ལོ་ལྷོ་ལམ་གྱི་ཝུའུ་ཨན་གནམ་གྲུ་ཐང་དུ་འབབ་སྐབས་སར་ལྷུང་། གནམ་གྲུའི་སྟེང་གི་འགྲུལ་བ175དང་གནམ་གྲུའི་སྟེང་གི་ལས་བྱེད་མི་སྣ6བཅས་ལས་གནམ་གྲུའི་སྟེང་གི་ལས་བྱེད་མི་སྣ་གཉིས་སྲོག་ཉེན་ལས་ཐར་བ་མ་གཏོགས། དེའི་འཕྲོའི་མི179རྐྱེན་ལམ་དུ་ཤོར་ཟེར།

ཧན་གོའི་མེ་གསོད་སྡེ་ཁག་གིས་ཉིན་དེར་བསྟན་དོན། འདས་པོའི་གྲས་སུ་ཐེ་གོའི་འགྲུལ་བ་གཉིས་ཡོད་པ་ལས་གཞན་ཚང་མ་ཧན་གོའི་མི་རེད། གནམ་གྲུར་གཏོར་བརླག་ཚབས་ཆེན་ཐེབས་ཡོད་པའི་དབང་གིས་ཉིན་དེའི་དགོང་མོའི་དུས་ཚོད་བཅུའི་བར། འདས་པོ88ཙམ་ལས་ཐོབ་ཐང་ངོས་བཟུང་བྱེད་ཐུབ་མེད་ཟེར།

ཧན་གོའི་སྨྱན་བྱད་ཀྱིས་བསྒྲགས་པ་ལྟར་ན། སར་ལྷུང་བའི་གནམ་གྲུ་དེ་བེད་སྤྱོད་བྱས་ནས་ལོ15འགོར་ཡོད་པ་དང་། འགྲུལ་སྐྱེལ་གནམ་གྲུ་དེ་ཝུའུ་ཨན་གནམ་གྲུ་ཐང་གི་རྒྱུག་ལམ་དང་པོའི་སྟེང་འབབ་རྩིས་བྱེད་སྐབས་རྒྱུན་ལྡན་ལྟར་སར་འབབ་མ་ཐུབ་པར་ཡང་བསྐྱར་འཕུར་བ་དང་། ཐེངས་གཉིས་པར་རྒྱུག་ལམ་གཞན་པ་ཞིག་གི་སྟེང་འབབ་པར་ཚོད་ལྟ་བྱེད་སྐབས་གནམ་གྲུའི་ལྟོ་བ་སར་དྲུད་ནས་སར་ལྷུང་བ་རེད། བརྙན་རིས་རྒྱུ་ཆ་ལས་མངོན་པ་ལྟར་ན། འགྲུལ་སྐྱེལ་གནམ་གྲུ་དེ་རྒྱུག་ལམ་སྟེང་ནས་མཐའ་སྣེ་བར་དུ་རྒྱུག་ཀྱང་མྱུར་ཚད་ཇེ་དལ་དུ་གཏོང་མ་ཐུབ་པ་དང་། གནམ་གྲུའི་སྟེང་གི་ཕྱིའི་ལྕགས་རིར་ཐོ་བརྒྱབ་ནས་འགས་གཏོར་བྱུང་སྟེ་མེར་འབར་བ་རེད་ཟེར།

ཧན་གོའི་རྒྱལ་ཁོངས་འགྲིམ་འགྲུལ་པུའུ་ཡིས་ཁྱབ་བསྒྲགས་བྱས་དོན། ཝུའུ་ཨན་གནམ་གྲུའི་སྟེང་གི་གནམ་གྲུའི་རྒྱུག་ལམ་དེ2025ལོའི་ཟླ་དང་པོའི་ཚེས་གཅིག་ཉིན་གྱི་ཞོགས་པའི་དུས་ཚོད་ལྔའི་བར་བཀག་སྡོམ་བྱེད་རྒྱུ་ཡིན་ཟེར།

ཧན་གོའི་ཞིབ་དཔྱོད་ཕྱོགས་ཁག་གིས་ཉིན་དེར་དོན་རྐྱེན་ཐག་གཅོད་ཚན་ཆུང་རྩ་འཛུགས་བྱས་ཏེ། ཉེན་རྟོག་ཕྱོགས་དང་མེ་གསོད་སོགས་འབྲེལ་ཡོད་སྡེ་ཁག་བར་མཉམ་ལས་བྱས་ནས། མཉམ་དུ་གནམ་གྲུ་སར་ལྷུང་བའི་དོན་རྐྱེན་དེར་རྟོག་ཞིབ་བྱེད་རྒྱུ་ཐག་བཅད།

ཧན་གོའི་རྒྱལ་ཁོངས་འགྲིམ་འགྲུལ་པུའུ་ཡིས་ཉིན་དེར་བསྟན་དོན། སར་ལྷུང་བའི་གནམ་གྲུ་དེར་དོན་རྐྱེན་མ་བྱུང་གོ། གནམ་གྲུ་ཐང་གི་ལམ་སྟོན་སྟེགས་བུས་འགྲུལ་སྐྱེལ་གནམ་གྲུ་དེའི་འཕུར་སྐྱོད་མཁན་ལ་བྱ་ཁྱུར་ཐོ་བརྒྱག་པའི་ཉེན་བརྡ་བཏང་མྱུང་བ་དང་། སྐར་མ་གཅིག་གི་རྗེས་སུ་འཕུར་སྐྱོད་མཁན་གྱིས་ཉེན་སྐྱོབ་ཀྱི་བརྡ་བཏང་བ་ཡིན་ལ། སྐར་མ་ལྔའི་རྗེས་སུ་འགྲུལ་སྐྱེལ་གནམ་གྲུ་དེ་སར་ལྷུང་བ་རེད། མིག་སྔར་དོན་རྐྱེན་རྟོག་ཞིབ་ཨུ་ཡོན་ལྷན་ཁང་གིས་སར་ལྷུང་བའི་འགྲུལ་སྐྱེལ་གནམ་གྲུའི་འཕུར་སྐྱོད་ཟིན་འགོད་སྒྲིག་ཆས་དང་སྐད་བརྡའི་ཟིན་འགོད་སྒྲིག་ཆས་ཀྱི་གཞི་གྲངས་སྒམ་རྙེད་ཡོད། གནམ་གྲུ་སར་ལྷུང་བའི་རྒྱུ་རྐྱེན་ངོ་མར་རྟོག་ཞིབ་གསལ་བོ་བྱེད་ཆེད། དུས་ཡུན་རིང་བོར་རྟོག་ཞིབ་བྱེད་དགོས་པ་དང་། ཚོང་དོན་འགྲུལ་སྐྱེལ་གནམ་གྲུ་སར་ལྷུང་བའི་དོན་རྐྱེན་ལ་རྟོག་ཞིབ་བྱེད་པར་ཆེས་ཐུང་ན་ཟླ་ངོ་དྲུག་གི་དུས་ཚོད་དགོས་པ་དང་། ཐ་ན་ལོ་འགའི་དུས་ཚོད་འགོར་སྲིད་ཟེར།

ཧན་གོའི་དོན་རྐྱེན་རྟོག་ཞིབ་ཨུ་ཡོན་ལྷན་ཁང་གི་མི་སྣས་ཉིན་དེའི་དགོང་མོར་བཤད་རྒྱུར། འཕུར་སྐྱོད་ཟིན་འགོད་སྒྲིག་ཆས་སྐོར་ཞིག་ལ་གཏོར་བརླག་ཐེབས་ཐེབས་ཡོད་པས། གཞི་གྲངས་ལྟ་ཀློག་བྱེད་པར་ཟླ་ངོ་གཅིག་གི་དུས་ཚོད་དགོས་ཟེར།