ལི་པུ་ཡཱའི་འཁྲུག་རྩོད་ཕྱོགས་ཁག་གཉིས་ཀྱིས་མུ་མཐུད་དུ་ཞི་བའི་གྲོས་མོལ་བྱེད་པར་ཡིད་འཐད་བྱུང་།
ལི་པུ་ཡཱའི་འཁྲུག་རྩོད་ཕྱོགས་ཁག་གཉིས་ཀྱིས་ཚེས19ཉིན་མའོ་ལོ་ཀི་ཡི་པུའུ་ཙི་ནེ་ཀའེ་ནས་གསལ་སྒྲོག་སྤེལ་ཏེ། མུ་མཐུད་དུ་གྲོས་མོལ་སྲུང་འཛིན་དང་ཕྱོགས་སོ་སོའི་འགྲིག་མཐུན་ལ་ཡར་སྐུལ་བྱས་ནས། ལི་པུ་ཡཱའི་ཉམས་ཉེན་ཞི་བའི་སྒོ་ནས་ཐག་གཅོད་བྱེད་པ་མངོན་འགྱུར་བྱེད་པར་ཡིད་འཐད་བྱུང་།
ཉིན་དེར་ལི་པུ་ཡཱའི་འཁྲུག་རྩོད་ཕྱོགས་ཁག་གཉིས་ཀྱི་ཚབ་བྱེད་པའི་རྒྱལ་ཁབ་ཆེས་མཐོའི་ཨུ་ཡོན་ལྷན་ཁང་དང་རྒྱལ་དམངས་འཐུས་མིའི་ཚོགས་ཆེན་གྱིས་པུའུ་ཙི་ནེ་ཀའེ་ནས་ཚོགས་ཡུན་ཉིན་གཉིས་ཀྱི་གྲོས་མོལ་མཇུག་སྒྲིལ། གྲོས་མོལ་མཇུག་སྒྲིལ་སྐབས་སྤེལ་བའི་གསལ་སྒྲོག་ལྟར་ན། ཕྱོགས་གཉིས་ཀྱིས་ཐུན་མོང་ལྟ་ཚུལ་བཀོད་ནས་མཉམ་འབྲེལ་འགུལ་སྐྱོད་སྤེལ་བར་གྲ་སྒྲིག་བྱེད་ཅིང་། འདེམ་བསྐོ་དང་སྲིད་འཛིན་དབང་ཤུགས་བསྐྱར་འཛུགས་བྱེད་པ། ལས་ཁུངས་དང་དངུལ་ལོར་བཅོས་བསྒྱུར་བྱེད་པ། མི་རིགས་འགྲིག་མཐུན་མངོན་འགྱུར་བྱེད་པ་སོགས་ཀྱི་བྱེད་ཐབས་ལ་བརྟེན་ནས་ལི་པུ་ཡཱའི་མདུན་དུ་ལྷགས་པའི་གནད་དོན་སྣ་ཚོགས་ཐག་གཅོད་བྱེད་རྩིས་ཡོད་པ་རེད།
ཕྱོགས་གཉིས་ཀྱིས་གཅིག་གྱུར་སྒོས་བལྟས་ན། རང་དབང་དང་མངོན་གསལ་གྱི་འདེམ་བསྐོ་དེ་ལི་པུ་ཡཱའི་གཏན་འཇགས་སླར་གསོ་དང་ཆབ་སྲིད་བར་བརྒལ་ཡོངས་འགྲུབ་བྱེད་པར་གལ་འགངས་ཧ་ཅང་ཆེ་བར་འདོད། ཕྱོགས་གཉིས་ཀྱིས་ད་རུང་ཕྱིན་ཆད་རིམ་པ་སོ་སོའི་མི་སྣའི་འབྲེལ་འདྲིས་སྲུང་འཛིན་བྱས་ནས་མུ་མཐུད་དུ་མཉམ་འབྲེལ་རྒྱལ་ཚོགས་ཀྱི་འབྲེལ་ཡོད་ལས་ཁུངས་བར་མཉམ་ལས་བྱེད་པ་དང་། ལི་པུ་ཡཱའི་མི་རིགས་འགྲིག་མཐུན་འཕེལ་རིམ་ལ་ཡར་སྐུལ་བཏང་སྟེ། ལི་པུ་ཡཱའི་ཉམས་ཉེན་ཞི་བའི་སྒོ་ནས་ཐག་གཅོད་བྱེད་པ་དང་ལི་པུ་ཡའི་རྒྱལ་ཁབ་ལས་ཁུངས་གཅིག་གྱུར་ཡོང་བ་མངོན་འགྱུར་བྱེད་པར་ཡིད་འཐད་བྱུང་།
མའོ་ལོ་ཀིའི་ཕྱི་འབྲེལ་བློན་ཆེན་པུའུ་ལི་ཏཱ་ཡིས་ཚེས18ཉིན་གྲོས་མོལ་མགོ་རྩོམ་པའི་མཛད་སྒོའི་སྟེང་ལི་པུ་ཡཱའི་འཁྲུག་རྩོད་ཕྱོགས་ཁག་གཉིས་ཀྱིས་ཡང་བསྐྱར་ལི་པུ་ཡཱའི་ཆབ་སྲིད་གྲོས་མཐུན་གྱི་དགོངས་དོན་ལག་བསྟར་བྱེད་དགོས་པའི་འབོད་སྐུལ་བཏང་བ་དང་། ཐེངས་འདིའི་གྲོས་མོལ་དེ་ལི་པུ་ཡཱའི་ཞི་བདེའི་འཕེལ་རིམ་སླར་གསོ་བྱེད་པའི་མགོ་རྩོམ་སར་འགྱུར་བའི་རེ་བ་ཡོད་ཟེར།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注