ཨུ་རུ་སི་དང་ཝུའུ་ཙི་པེ་ཁི་སི་ཐན་གྱི་ཙུང་ཐུང་གིས་ཁ་པར་གྲོས་མོལ་བྱས།

ཨུ་རུ་སི་དང་ཝུའུ་ཙི་པེ་ཁི་སི་ཐན་གྱི་ཙུང་ཐུང་གིས་ཁ་པར་གྲོས་མོལ་བྱས།

ཨུ་རུ་སིའི་ཙུང་ཐུང་ཕུའུ་ཅིན་གྱིས་ཚེས19ཉིན་དུས་བཅད་ལྟར་ཝུའུ་ཙི་པེ་ཁི་སི་ཐན་གྱི་ཙུང་ཐུང་མུས་ཨར་ཅི་ཡའོ་ཡེ་ཧྥུའུ་ལ་ཁ་པར་བཏང་།

ཨུ་རུ་སིའི་ཙུང་ཐུང་དྲ་ཚིགས་ཀྱིས་ཚེས19ཉིན་སྤེལ་བའི་གསལ་སྒྲོག་ལྟར་ན། མུས་ཨར་ཅི་ཡའོ་ཡེ་ཧྥུའུ་ཡིས་ཁ་པར་གཏོང་སྐབས་ཨུ་རུ་སིའི་དྲག་ཆས་སྟོབས་ཤུགས་དང་རྫས་འགྱུར་རིག་པ། སྐྱེ་དངོས་འགོག་སྲུང་དམག་དཔུང་གི་དམག་སྤྱི་ཅི་ལི་ལོ་ཧྥུའུ་དང་དེའི་ལས་རོགས་པ་ཉེ་སྔོན་འགས་གཏོར་ཁྲོད་རྐྱེན་ལམ་དུ་ཤོར་བར་མྱ་ངན་ཞུ་བཞིན་ཡོད་ཟེར།

གསལ་སྒྲོག་ལས་ནན་གྱིས་བསྟན་དོན། ཝུའུ་ཙི་པེ་ཁི་སི་ཐན་གྱིས་ཐ་ཤལ་གྱི་འཇིགས་སྐུལ་དོན་རྐྱེན་དེར་རྒོལ་གཏམ་དྲག་པོ་གཏོང་བཞིན་ཡོད། རྒྱལ་ཁབ་གཉིས་ཀྱི་བདེ་འཇགས་སྡེ་ཁག་གིས་འཇིགས་སྐུལ་ལ་ངོ་རྒོལ་བྱེད་པའི་ཁྱབ་ཁོངས་ནས་མུ་མཐུད་དུ་མཉམ་ལས་ཟབ་མོ་བྱེད་རྒྱུ་ཡིན། རྒྱལ་ཁབ་གཉིས་ཀྱི་མགོ་ཁྲིད་པས་མུ་མཐུད་དུ་རྒྱལ་ཁབ་གཉིས་ཀྱི་ཁྱབ་ཁོངས་སོ་སོའི་གཉིས་ཕན་མཉམ་ལས་འཕེལ་རྒྱས་སུ་གཏོང་རྒྱུའི་ཚུལ་བསྟན།

ཝུའུ་ཙི་པེ་ཁི་སི་ཐན་གྱི་ཙུང་ཐུང་གི་གསར་འགྱུར་དྲ་ཚིགས་ཀྱིས་ཉིན་དར་སྤེལ་བའི་གསལ་སྒྲོག་ལས་བཤད་རྒྱུར། མུས་ཨར་ཅི་ཡའོ་ཡེ་ཧྥུའུ་དང་ཕུའུ་ཅིན་གྱིས་ཉིན་དེར་ཁ་པར་གྲོས་མོལ་བྱས། ཕྱོགས་གཉིས་ཀྱིས་ས་ཁུལ་གྱི་རྩ་འཛུགས་སྒྲོམ་གཞིའི་ནང་གི་ཕྱོགས་གཉིས་ཀྱི་ཉིན་རིམ་དང་ཕྱོགས་མང་བོའི་མཉམ་ལས་ཀྱི་དགོས་གལ་ཆེ་བའི་གནད་དོན་སོགས་ལ་གྲོས་བསྡུར་བྱས། རྒྱལ་ཁབ་གཉིས་ཀྱི་བདེ་འཇགས་སྡེ་ཁག་གིས་མུ་མཐུད་དུ་ཕན་ནུས་ལྡན་པའི་སྒོ་ནས་རོགས་ལས་བྱས་ཏེ། བདེ་འཇགས་འགྲན་རྩོད་དང་ཉེན་ཁ་ཐག་གཅོད་བྱེད་པར་ཤུགས་སྣོན་རྒྱུ་ཡིན་ཟེར།

ཨུ་རུ་སིའི་མྱུལ་ཞིབ་ཨུ་ཡོན་ལྷན་ཁང་གིས་ཚེས18ཉིན་བདེན་དཔང་བྱས་དོན། ཅི་ལི་ལོ་ཧྥུའུ་བསད་པའི་དོགས་ཡོད་ཉེས་ཅན་ནི་ཝུའུ་ཙི་པེ་ཁི་སི་ཐན་གྱི་སྐྱེས་པ་ཞིག་ཡིན་པ་དང་། མིག་སྔར་ཨུ་རུ་སིའི་ཕྱོགས་ཀྱིས་འཛིན་བཟུང་བྱས་ཡོད་ཟེར།