ཧོ་ལན་གྱི་ཧའེ་ཡ་སྤྱི་ཤག་གི་ཐོག་ཁང་ཞིག་ཏུ་འབར་གས་དོན་རྐྱེན་བྱུང་ནས་མི4རྐྱེན་ལམ་དུ་ཤོར།

ཚེས7ཉིན་གྱི་དགོང་མོ་ཧོ་ལན་ཉེན་རྟོག་ཕྱོགས་ཀྱིས་རྒྱལ་ཁབ་དེའི་ཧའེ་ཡ་གྲོང་ཁྱེར་གྱི་ཐོག་སོ་གསུམ་ལྡན་གྱི་སྤྱི་ཤག་ཐོག་ཁང་ཞིག་ལ་ཉིན་དེའི་སྔ་དྲོ་འབར་གས་དོན་རྐྱེན་བྱུང་བར་མ་ཟད་  ཁང་པའི་ཁག་ཅིག་བརྡིབས་པས་མི4རྐྱེན་ལམ་དུ་ཤོར།

ཉེན་རྟོག་ཕྱོགས་ཀྱིས་རོགས་སྐྱོབ་མི་སྣས་ཉིན་དེའི་དགོང་མོར་ཞིག་རོའི་ཁྲོད་ནས་སླར་ཡང་སྟེས་དབང་གིས་གསོན་པའི་མི་གཅིག་བསྐྱབས་ཐུབ་པ་བྱུང་ནས་མྱུར་དུ་སྨན་ཁང་དུ་བསྐྱལ། མིག་སྔར་འཚོལ་སྐྱོབ་བྱ་བ་མུ་མཐུད་དུ་སྤེལ་བཞིན་ཡོད་པ་རེད། ཧོ་ལན་གྱི་བྲེལ་མྱུར་ཞབས་ཞུ་སྡེ་ཚན་གྱིས་བསྟན་དོན།  མི་མང་པོ་ཞིག་ཞིག་རོའི་འོག་ཏུ་ཤོར་མེད་ཀྱང་ཤི་རྨས་བྱུང་བའི་མི་གྲངས20ཙམ་ལ་འཕར་སྲིད་ཟེར།

ཉིན་དེའི་ཕྱི་དྲོ་ཧའེ་ཡ་གྲོང་ཁྱེར་གྱི་མགོ་གཙོ་ཧྥན་ཀྲ་ནན་གྱིས་གསར་འགྱུར་ཁྱབ་བསྒྲགས་ཚོགས་འདུའི་སྟེང་རྨས་མ3སྨན་ཁང་དུ་བསྐྱལ་བ་ཟེར།  ཁོས་བཤད་རྒྱུར། ཞིག་རོའི་འོག་ཏུ་ཤོར་བའི་མིའི་ཚེ་སྲོག་ལ་ཉེན་ཁ་ཆེན་པོ་ཡོད་པས་དབང་འཛིན་ལས་ཁུངས་ཀྱིས་གནས་ཚུལ་སྡུག་པོ་དེའི་ཐད་དེ་ལྟར་དུ་གྲ་སྒྲིག་བྱེད་བཞིན་ཡོད་ཟེར།

འབར་གས་བྱུང་བའི་སྤྱི་ཤག་ནི་ཧའེ་ཡ་གྲོང་ཁྱེར་གྱི་བྱང་ཤར་རྒྱུད་དུ་ཡོད་ཅིང་། འོག་རིམ་ནི་ཚོང་ཁང་དང་སྟེང་ཕྱོགས་གཉིས་ནི་སྡོད་ཁང་ཡིན།

ཧོ་ལན་གྱི་དབུ་བཞུགས་བློན་ཆེན་སི་ཧོ་ཕུའུ་ཡིས་སྤྱི་ཚོགས་སྨྱན་བྱད་སྟེང་ཡིག་ཆ་སྤེལ་ནས་སྤྱི་ཤག་ལ་འབར་གས་བྱུང་བའི་དོན་རྐྱེན་དེར་ཧ་ལས་པའི་ཚུལ་བསྟན།  ཧོ་ལན་གྱི་རྒྱལ་པོ་ཝའེ་ལེན-ཡ་ལི་ཧྲན་ཏ་དང་བཙུན་མོ་གཉིས་ཀྱིས་ཀྱང་སྤྱི་ཚོགས་འབྲེལ་བའི་སྨྱན་བྱད་བརྒྱུད་དེ་རྐྱེན་ལམ་དུ་ཤོར་བ་རྣམས་ལ་མྱ་ངན་ཞུས།

སྤྱི་ཤག་ལ་འབར་གས་དོན་རྐྱེན་བྱུང་བའི་རྒྱུ་རྐྱེན་ལ་ད་དུང་བརྟག་དཔྱད་བྱེད་བཞིན་པའི་སྒང་རེད། ཉེན་རྟོག་ཕྱོགས་ཀྱིས་བསྟན་དོན། འབར་གས་དོན་རྐྱེན་བྱུང་རྗེས་རླངས་འཁོར་ཞིག་མགྱོགས་མྱུར་ངང་ཡུལ་དངོས་དང་ཁ་བྲལ་ཞིང་། ད་ལྟ་གནས་ཚུལ་དེ་མཐོང་མཁན་ལ་འབྲེལ་ཡོད་ཁུངས་སྣེ་འདོན་སྤྲོད་བྱེད་དགོས་པའི་འབོད་སྐུལ་གཏོང་བཞིན་ཡོད་ཟེར།