སེ་ནེ་ཀལ་ལ་རོགས་སྐྱོར་བྱེད་པའི་ཀྲུང་གོའི་སྨན་བཅོས་རུ་ཁག་སྐོར་ཐེངས20པས་སྐོར་སྐྱོད་འོས་འགན་སྨན་བཅོས་བྱ་འགུལ་སྤེལ།

སེ་ནེ་ཀལ་ལ་རོགས་སྐྱོར་བྱེད་པའི་ཀྲུང་གོའི(ཕུའུ་ཅན)སྨན་བཅོས་རུ་ཁག་སྐོར་ཐེངས20པས་སེ་ནེ་ཀལ་གྱི་ཀན་ཏུན་དང་ཅེ་སི། ཧྲེང་ལུའུ་དབྱི་སོགས་གྲོང་ཁྱེར་དུ་སྐོར་སྐྱོད་འོས་འགན་སྨན་བཅོས་བྱ་འགུལ་སྤེལ་ནས།  ས་གནས་དེའི་མང་ཚོགས་ལ་སྤུས་ལེགས་ཀྱི་སྨན་བཅོས་ཞབས་ཞུ་འདོན་སྤྲོད་བྱས།

སེ་ནེ་ཀལ་ལ་རོགས་སྐྱོར་བྱེད་པའི་ཀྲུང་གོའི་སྨན་བཅོས་རུ་ཁག་སྐོར་ཐེངས20པའི་སྐོར་སྐྱོད་འོས་འགན་སྨན་བཅོས་བྱེད་ཡུལ།

ཐེངས་འདིའི་བྱ་འགུལ་གྱི་དུས་ཡུན་ཉིན4ཡིན་ཞིང་། ཁོག་ནད་ཚན་ཁག་དང་ཕྱི་ནད་ཚན་ཁག བྱིས་ནད་ཚན་ཁག མིག་ནད་ཚན་ཁག པགས་ནད་ཚན་ཁག རུས་ནད་ཚན་ཁག ཀྲུང་ལུགས་གསོ་རིག་ཚན་ཁག དབང་ལྔའི་ཚན་ཁག་སོགས་སྨན་བཅོས་ཆེད་ལས་ཚན་ཁག8ཡོད་པ་དང་། དེ་དག་གིས་ཁྱོན་སྡོམ་འོས་འགན་སྨན་བཅོས་ཐེངས་4ལ་བྱས་པ་དང་། མྱུར་སྐྱོབ་ཤེས་བྱ་དང་ཀྲུང་ལུགས་གསོ་རིག་རིག་གནས། རྒྱུན་མཐོང་པགས་ནད་ཀྱི་རིགས་དང་། དེ་མིན་དབང་བོ་ལྔའི་བདེ་ཐང་གི་ཚན་རིག་ཁྱབ་གདལ་ཐེངས9ལ་བཏང་བ་དང་།  རིམ་རྩིས་བྱས་ན་མི་གྲངས1153ལ་སྨན་བཅོས་ཞབས་ཞུ་འདོན་སྤྲོད་བྱས་ཡོད་པ་རེད།

སེ་ནེ་ཀལ་ས་གནས་སྲིད་གཞུང་གིས་ཀྲུང་གོའི་སྨན་བཅོས་རུ་ཁག་གི་ཐེངས་འདིའི་འོས་འགན་སྨན་བཅོས་བྱ་འགུལ་ལ་ཚད་མཐོའི་མཐོང་ཆེན་བྱེད་ཀྱི་ཡོད། ཀན་ཏུན་གྲོང་ཁྱེར་གྱི་འགོ་གཙོ་ཨ་འར་ཧྥ·མ་མཱ་ཏུའུ·ཏིས་ཨའོ་ཕུའུ་དངོས་སུ་འོས་འགན་སྨན་བཅོས་བྱ་ཡུལ་དུ་མེ་བུམ་རྒྱག་པ་དང་མེ་བཙའ་སོགས་ཀྲུང་ལུགས་གསོ་རིག་གི་སྲོལ་རྒྱུན་སྨན་བཅོས་བྱེད་སྟངས་ཉམས་ལེན་བྱེད་དུ་འོངས་པ་དང་།  ཁོས་ས་གནས་དེའི་མང་ཚོགས་ཀྱི་ཚབ་བྱས་ནས་ཀྲུང་གོའི་སྨན་བཅོས་རུ་ཁག་གི་དགེ་ལས་ལ་ཐུགས་རྗེ་ཆེ་ཞུས་པ་དང་མཉམ་དུ།  ཀྲུང་གོའི་སྨན་བཅོས་རུ་ཁག་དུས་བཀག་ལྟར་འོས་འགན་སྨན་བཅོས་བྱེད་དུ་ཡོང་ནས་ས་གནས་དེའི་མང་ཚོགས་ཀྱི་དཀའ་སྡུག་དང་ན་ཚ་སེལ་རོགས་བྱ་རྒྱུའི་རེ་བའང་བཏོན་པ་རེད།

སེ་ནེ་ཀལ་ལ་རོགས་སྐྱོར་བྱེད་པའི་སྨན་བཅོས་རུ་ཁག་སྐོར་ཐེངས20པ་ད་ལོའི་ཟླ་4པར་སེ་ནེ་ཀལ་དུ་སོང་བའི་ཚུན་དུ། ཁྱོན་སྡོམ་རོགས་སྐྱོར་ཐོབ་པའི་སྨན་ཁང་གི་སྒོ་བསྟེན་སྨན་བཅོས་ནང་མི་གྲངས5376ཞུགས་ཡོད་ཅིང་།  གཞི་རིམ་དུ་འོས་འགན་སྨན་བཅོས་ཐེངས4དང་སྐོར་སྐྱོད་འོས་འགན་སྨན་བཅོས་ཐེངས2བྱས་པ་དང་། བདེ་ཐང་གི་ཚན་རིག་ཁྱབ་གདལ་འཆད་ཁྲིད་ཐེངས30བྱས་པས་སྤུས་ལེགས་སྨན་བཅོས་ཞབས་ཞུ་ལ་ས་གནས་དེའི་མང་ཚོགས་ཀྱི་བསྔགས་བརྗོད་ཆེན་པོ་ཐོབ་ཡོད་པ་རེད།