དབྱི་སི་རལ་གྱིས་ལེ་པ་ནོན་གྱི་འཕྲིན་གཏོང་སྒྲིག་ཆས་ལ་འབར་གས་དོན་རྐྱེན་བཟོས་པ་ཐོག་མར་ཁས་བླངས།

ཚེས10ཉིན།  དབྱི་སི་རལ་ཕྱོགས་སྨྱན་བྱད་ཀྱིས་གནས་ཚུལ་སྤེལ་བ་ལྟར་ན། ཙུང་ལི་ནེ་ཐ་ཉི་ཡ་ཧུའུ་ཡིས་ཉིན་དེར་བསྡུས་པའི་ནང་བློན་ཁང་གི་གྲོས་ཚོགས་སྟེང་། ལེ་པ་ནོན་གྱི་ཀྲིན་ཀྲུའུ་ཏང་གི་ཁོངས་མིར་འཕྲིན་གཏོང་སྒྲིག་ཆས་འབར་གས་བྱུང་བའི་དོན་རྐྱེན་བཟོས་པར་ཐོག་དང་པོར་ཁས་ལེན་བྱས་པ་རེད།

གནས་ཚུལ་དེ་ལས་ནེ་ཐ་ཉི་ཡ་ཧུའུ་ཡི་སྐད་ཆ་དྲངས་ནས་བཤད་རྒྱུར། དབྱི་སི་རལ་གྱི་རྒྱལ་ཁབ་འགོག་སྲུང་སྒྲིག་གཞིའི་འགན་འཁུར་བ་དང་སྲིད་གཞུང་གི་མཐོ་རིམ་དཔོན་རིགས་ཁག་ཅིག་གིས་ངོ་རྒོལ་བྱས་ཀྱང་དབྱི་སི་རལ་གྱིས་སྔར་བཞིན“བརྒྱུད་འབོད་འཕྲུལ་ཆས་ཀྱི་བྱ་སྤྱོད”ལག་བསྟར་བྱས་པར་མ་ཟད། ཀྲིན་ཀྲུའུ་ཏང་གི་འགོ་ཁྲིད་ཟུར་པ་ན་སི་ལུའུ་ལ་ཚར་གཅོད་བྱས་ཟེར།

ཟླ9བའི་ཚེས17ཉིན་ནས་ཚེས18ཉིན་བར། ལེ་པ་ནོན་དུ་བསྟུད་མར་བརྒྱུད་འབོད་འཕྲུལ་ཆས་དང་ཁ་འཕྲུལ་སོགས་འཕྲིན་གཏོང་སྒྲིག་ཆས་ལ་འབར་གས་ཀྱི་དོན་རྐྱེན་བྱུང་ནས་མི37རྐྱེན་ལམ་དུ་ཤོར་བ་དང་།  མི3000ཙམ་ལ་རྨས་ཕོག་ཡོད་པ་རེད། དབྱི་སི་རལ་ཕྱོགས་ཀྱིས་ཐོག་མཐའ་བར་གསུམ་དུ་དོན་རྐྱེན་དེར་དྲང་ཕྱོགས་ཀྱི་ཨ་ལན་བྱིན་མེད།

གཞན་ཡང་དབྱི་སི་རལ་གྱི་དམག་དཔུང་གིས་ཚེས10ཉིན་སྤེལ་བའི་གསལ་བསྒྲགས་ལྟར་ན།  ལེ་པ་ནོན་གྱི་ཀྲིན་ཀྲུའུ་ཏང་གི“འཕེན་རྫས”མང་པོ་ཞིག་ལེ་པ་ནོན་གྱི་ས་མཚམས་བརྒལ་ཏེ་དབྱི་སི་རལ་དུ་ཐོན་ཡོད་པ་རེད། ཞིན་ཧྭ་གསར་འགྱུར་ཁང་གི་གསར་འགོད་པས་ལག་ཁྱེར་ཁ་པར་སྟེང་ནས་སྒྲིག་སྦྱོར་བྱས་པའི་སྔོན་བརྡའི་མ་ལག་ལས།  དབྱི་སི་རལ་གྱི་བྱང་རྒྱུད་གྲོང་ཁྱེར་ཧེ་ཧྥ་དང་ཅ་ལི་ལི་མཚེའུ་རྒྱུད་ཀྱི་གྲོང་རྡལ་མང་པོ་ཞིག་ཏུ་ཉིན་དེར་མཁའ་ཟོན་ཉེན་བརྡ་ཡང་ཡང་བཏང་པ་མངོན་ཡོད།

ན་ནིང་ཟླ10བའི་ཚེས7ཉིན།   ཕ་ལེ་སི་ཐན་དང་དབྱི་སི་རལ་གྱི་བར་སྐོར་ཐེངས་གསར་བའི་གདོང་ཐུག་བྱུང་པ་ནས་བཟུང་།  ལེ་པ་ནོན་གྱི་ཀྲིན་ཀྲུའུ་ཏང་གིས་དབྱི་སི་རལ་གྱི་བྱང་རྒྱུད་ལ་འཇབ་རྒོལ་ཡང་ཡང་བྱས་པ་དང་། དབྱི་སི་རལ་གྱི་དམག་དཔུང་གིས་ལེ་པ་ནོན་གྱི་ལྷོ་རྒྱུད་ཀྱི་དམིགས་འབེན་ས་ཁུལ་ལ་འཁོན་ལན་སློག་བཞིན་ཡོད་པ་རེད། ད་ལོའི་ཟླ9པར། ལེ་པ་ནོན་དུ་འཕྲིན་གཏོང་སྒྲིག་ཆས་འབར་གས་ཀྱི་དོན་རྐྱེན་བྱུང་རྗེས།  ལེ་པ་ནོན་དང་དབྱི་སི་རལ་བར་གྱི་གདོང་ཐུག་ཛ་དྲག་ཏུ་ཕྱིན་ཡོད། དབྱི་སི་རལ་གྱིས་ལེ་པ་ནོན་གྱི་རྒྱལ་ས་པེ་རུ་ཐེའི་ལྷོ་འདབས་སོགས་སུ་མུ་མཐུད་དུ་མཁའ་རྒོལ་བྱས་པ་དང་།  ན་སི་ལུའུ་ལ་དང་ས་ཧྥེ་ཏིང་སོགས་ཀྲིན་ཀྲུའུ་ཏང་གི་མཐོ་རིམ་དཔོན་པོ་མང་པོ་ཞིག་དབྱི་སི་རལ་གྱི་དམག་དཔུང་གི་མཁའ་རྒོལ་འོག་ཚེ་ལས་འདས་པ་རེད།   ལེ་པ་ནོན་གྱི་སྤྱི་པའི་འཕྲོད་བསྟེན་པུའུ་ཡིས་ཟླ་འདིའི་ཚེས9ཉིན་ཁྱབ་བསྒྲགས་བྱས་པའི་བསྡོམས་རྩིས་གཞི་གྲངས་ལྟར་ན།  ན་ནིང་ཟླ10པའི་ཟླ་སྟོད་ནས་བཟུང་།  ལེ་པ་ནོན་གྱི་ཀྲིན་ཀྲུའུ་ཏང་དང་དབྱི་སི་རལ་བར་གྱི་གདོང་ཐུག་དེ་ལས་ལེ་པ་ནོན་དུ་མི3136རྐྱེན་ལམ་དུ་ཤོར་ཡོད་པ་རེད།